II Pêtrôs 2:10-16
“Lu bơngai noh, lu sư thoi sem brem mă ưh kơ gơh tơchĕng, sư hơ̆r kơ wă pơm kiơ sư pơm hloi. Mĕ ‘bă sem brem noh pơjing sư sơ̆ lăp pơjing ăn kơ đe rôp ‘buh sa đĕch. Lu bơngai mă pơma kơnê̆ kơ đe kư̆m thoi noh, lu sư ưh kơ hlôh na lu sư gô răm thoi sem brem noh tơpă.” (II Pêtrôs 2:12)
Nơ̆r jet tơchĕng pơwao:
– ‘Bok Pôl pơma pơtih lu thây bơtho hơlĕnh păng lu ‘bok khan lê̆ adrol hơlĕnh noh sư pơtih thoi rup kiơ?
– Lu sư arih pha ra kơ đe thoi yơ păng tơdrong arih lu sư Kră Yang hơgăt thoi yơ?
– Bơ̆n pơm kiơ wă kơ huay kơ puh pơ̆k kơ tơdrong lu ‘bok bơtho hơlĕnh chă đon pơhlŭ pơlung?
‘Bok Pôl pơtih lu ‘bok bơtho hơlĕnh noh thoi “sem brem ưh kơ gơh tơchĕng”. Lu sư tol gah bơhngol nhen thoi lu sem brem kơtul kơhlôh kơbăt săt, tơdrong lu sem brem chă yak năm, pơm kiơ noh lu sư kiơ̆ kơ tơdrong mơn lăm akâu lu sư thoi yơ noh đĕch, ưh kơ đêl lu sư tơchĕng hlôh băt ‘mơ̆i na yak năm na pơm ôh. Lu ‘bok bơtho hơlĕnh ‘nâu hei kư̆m lei-lăi thoi noh mơ̆n, lu sư yak năm, oei sa pơma dơnuh, jang pơm ưh kơ đơ̆ng nơ̆r sĭt Kră Yang tơ̆k pơchrang, chông anhăk, bơtho tơ’bôh ôh. Kơlih yua kơ thoi noh bơih na lu sư ngăl “pơjăm tơdrong mă lu sư ưh kơ băt” dah mă pơjăm tơdrong kiơ mă lu sư tam mă mơn đêl đei, tam mă mơn đêl pơm. Lu sư achăng tŭk tơdrong Kră Yang ‘Bok Kei-Dei tơ’bôh ăn kơ lu sư; lu sư kiơ̆ tơdrong kon bơngai pơma tơblang; lu sư kư̆m achăng tŭk lê̆ tơdrong kơ̆l ‘ngok tơchĕng păng kư̆m achăng tŭk lê̆ tơdrong hmă mă kon bơngai bơ̆n juăt kơ đei noh mơ̆n, lu sư huŏng lăm tơdrong kơtul kơmŭl ưh kơ gơh hơmet, ưh kơ gơh pơklaih. Mưh minh ‘nu bơngai ayơ achăng tŭk lê̆ Nơ̆r Kră Yang, ưh kơ lăng Nơ̆r Kră Yang thoi hơnă tơm, kư̆m ưh kơ lăng ’bôh Nơ̆r Kră Yang noh mơsêh pran gơh pơm tôm tơdrong lăm chăl arih sư lei bơngai noh gô jing bơngai kơtul kơhlôh, bơngai tol gah bơhngol. Kơnê̆ hloh dơ̆ng,bơngai noh ưh kơ băt kơ sư kơdih kơtul kơhlôh mă-lei nŏng kơ pơang pơtrat kơ đe khan sư gơh hơgei,khan sư dêh, đĭ-đăng bôl buăl nai bơngai jih ‘ma, sư lăng ưh kơ rơa kiơ.
Lu bơngai khan lê̆ adrol păng lu ‘bok bơtho hơlĕnh, tơdrong lu sư tol, ưh kơ đei đon tơchĕng noh tơ’bôh pơdah ‘bơ̆t sư pơang thoi âu: “… lu bơngai mă hưch hanh kơ pơm tơdrong kơnê̆ kư̆ kă, lu sư ưh kơ băt chu yom kơ yŏng tơ’ngla kơdih, lu bơngai noh Sư hil dêh. Lu ‘bok bơtho mơ’nah lu sư juăt kơ pơm thoi noh. Lu sư pơma kư̆ kă ưh kơ băt hli kơ đe păng ưh kơ băt mơlâu kơ đe. Lu sư kư̆m ưh kơ hli pơma kơnê̆ kơ lu linh jang mơ̆n. Lu linh jang pran hloh tih hloh, mă-lei lu linh jang ưh kơ pơ̆n kơ pơma kơnê̆ kơ lu bôl sư mă pơm yoch ôh kơ sư roi kơ ‘Bok Ke-Dei. Mă-lei lu bơngai noh ưh kơ băt kơ hli, lu sư pơma kơnê̆ hloi lu linh jang.” (trong 10, 11). Lu sư noh ưh kơ đei Yang Bơhngol ‘Lơ̆ng pơgơ̆r chăl arih lu sư, lu sư nhen thoi lu sem brem đĕch ưh kơ đei đon tơchĕng.
Lu bơngai khan lê̆ adrol, lu ‘bok bơtho hơlĕnh,tơdrong lu sư tol gah bơhngol ‘nei ‘bơ̆t lu sư arih kiơ̆ kơ sĕch akar ‘maih wă.Lu sư pơm dôm tơdrong kiơ kiơ noh wă yua ăn kơ lu sư kơdih đĕch.Lu sư bơtho đe tơdrong lu sư noh, lu sư wă kơ đei jên na lu sư yua jên tơmam lăm tơdrong kư̆ kă wơ̆l jrok kiơ̆ trong‘Balam sơ̆. (trong 15, 16). Lu bơngai ‘nâu “ngôi kư̆ kă kơ ‘năr”(13), ưh kơ kăl pĕng ôn tơdrong yoch glăi lu sư, lu sư yua Sơ̆p Hla bơar ’Bok Kei-Dei wă pĕng dŏng tơdrong yoch kơnê̆ kư̆ kă lu sư pơm noh. Truh tơ tơdrong sŏng sa, lu sư kư̆m oei plêl kơplah sŏng sa hơdai bôl buăl ‘nhŏng oh (trong 13), ‘noh wă pơma kơ tơdrong sŏng sa ‘mêm mơnat năm hơdai hăm tơdrong sa pơgơ̆p ‘lơ̆ng rơgoh (I Kôrintô 11:17-22).
‘Bok Pêtrôs pơma pran rơđah hơđăl Kră Yang đĭ hơgăt lê̆ bơih tơdrong arih lu bơngai noh (trong 12). Mĕ ’bă lu sư pơjing lu sư, “lu sư arih thoi lu sem brem ưh kơ đei tơdrong tơchĕng” na tuch luch sư “lôch răm thoi sem brem”. Lu sư ưh kơ pôm arih kơnê̆ răm, arih ưh kơ đei yua, yua kơ đơ̆ng ưh kơ pơyom kơ Nơ̆r Kră Yang noh đĕch ôh, mă-lei lu sư khŏm mă pŭ iŏk tơdrong lôch răm, iŏk tơdrong apah đêl tơdrong yoch lu sư kơdih pơm. Wă khan tơdrong yoch ưh kơ ba ăn tơdrong lơi yua, mă-lei tơplơ̆ kơ ‘noh, tơdrong yoch gô hơlĕnh pơdăr lu sư păng tơgar iŏk tơdrong arih lu sư pơm kơ lu su răm. Wă huay kơ puh pơ̆k kơ tơdrong lu ‘bok bơtho hơlĕnh chă đon pơhlŭ pơlung noh, bơ̆n kăl dêh pơhrăm hlôh Nơ̆r Kră Yang păng pơm kiơ̆ kơ Nơ̆r Kră Yang bơtho.
Ơ Kră Yang, apinh Yang Sĭt Ih yua Nơ̆r Ih tơ̆k pơchrang jơhngơ̆m tơdrong tơchĕng inh, păng apinh Ih dŏng pơklaih inh đơ̆ng tơdrong kơtul kơhlôh gah bơhngol lĕch yua đơ̆ng jơhngơ̆m inh arăng noh.Inh krao khan yua anăn Kră Yang Yêsu Krist, Amen!
Wă huay kơ tol gah bơhngol, bơ̆n kăl kơ đei jơhngơ̆m liơ kơplah đŏk, hŏk pơhrăm Nơ̆r Kră Yang rim năr?
Đŏk Sơ̆p Hla bơar‘Bok Kei-Dei lăm pêng sơnăm: Nêhêmi 3.
Kênh Youtube BHKTHN:
