Klei Aê Diê Blŭ: II Y-Pêtrôs 2:1-3
Êlan kliăng: “Ƀiădah msĕ mơh mâo leh phung khua pô hưn êlâo soh hlăm phung ƀuôn sang, msĕ si srăng mâo phung khua pô mtô soh hlăm phung diih. Hŏng klei hgăm diñu srăng mtô mta klei đăo soh dưi bi rai, wăt hngah kơ Khua pô bi tui diñu, leh anăn diñu srăng bi truh kơ diñu pô klei bi rai djăl” (II Y-Pêtrôs 2:1)
Klei êmuh ksiêm mĭn: Ya mta klei huĭ hyưt Khua ƀĭng kna Y-Pêtrôs hưn êlâo brei Phung Sang Aê Diê dôk răng? Si klei bi hmăi jhat kjham mơ̆ng klei anei? Ya boh tŭ jhat truh kơ phung ba klei bi rai anei mŭt hlăm Phung Sang Aê Diê?
Ti knhal tuč kdrêč 1 jing klei blŭ bi klă kơ klei ktang myang Klei Aê Diê Blŭ, jing klei bi êdah mơ̆ng Aê Diê (II Y-Pêtrôs 1:20-21), leh anăn kdrêč 2 kčưm dơ̆ng hŏng boh blŭ “ƀiădah msĕ mơh” kyuadah mâo sa klei boh sĭt năng ênguôt êdi, anăn jing klei huĭ hyưt bi rai prŏng hĭn phung roh yua čiăng ksŭng ngă kơ Phung Sang Aê Diê, anăn jing phung khua pô hưn êlâo soh leh anăn phung khua pô mtô soh mtô “mta klei đăo soh”. Brei drei mâo klei thâo kral kơ anak mnuih, kơ bruă knuă leh anăn knuih klei jing diñu, êlâo kơ lač kơ klei Khua Yang bi kmhal. “Mta klei đăo soh” ăt pia đa jing klei đăo mdê amâodah klei đăo soh. Boh blŭ anei kbiă hriê mơ̆ng sa boh hră mblang jing “klei čuăn ruah”, leh anăn mphŭn êlâo mâo klei mblang jăk, ƀiădah êdei kơnăn bi mlih kluôm dhuôm leh anăn jing hĕ klei mblang amâo jăk ôh. Phung tui hlue klei đăo soh êdei kơnăn jing phung knŏng kơ ya mta klei diñu čiăng đăo đuč, hrô kơ klei mă tŭ jih klei sĭt nik Aê Diê, jing mta klei brei jih jang mnuih đăo. Hlăm Phung Sang Aê Diê mâo leh đa đa phung khua pô hưn êlâo soh leh anăn phung khua pô mtô soh yua hdră êlan hgăm mplư mă ai phung đăo klah đuĕ mơ̆ng klei sĭt nik Khua Yang, čiăng tui tiŏ klei mĭn mnuih mdê mdê, anăn jing “klei đăo soh” yơh .
Hlăk êjai Klei Mrâo Mrang Jăk Khua Yang Yêsu ba hriê kơ phung mă tŭ klei đăo “mâo klei hdĭp, leh anăn mâo klei hdĭp êbeh dlai” (Y-Yôhan 10:10), bi phung khua pô mtô soh leh anăn phung khua pô hưn êlâo soh bi lar klei mtô “bi rai”, hlăm klei blŭ phŭn jing ngă bi ram rai amâodah bi rai luč, leh anăn klei truh kơ diñu jing “diñu srăng bi truh kơ diñu pô klei bi rai djăl” (êlan 1). Phung mnuih anei, wăt tơdah dôk hlăm Phung Sang Aê Diê dưn ƀiădah bi lar leh klei mtô “hngah kơ Khua pô bi tui leh diñu”. “Klei đăo soh” hngah kơ klei ktang myang kiă kriê ti dlông hĭn mơ̆ng Khua Yang Yêsu.
Khua pô mtô soh leh anăn khua pô hưn êlâo soh êlâo anăn diñu ka tuôm đăo sĭt kơ Khua Yang ôh, ƀiădah ară anei hngah kơ klei đăo. Klei Aê Diê Blŭ mtô klă mngač, sa čô mnuih Khua Yang ruah leh anăn brei klei bi mtlaih snăn Khua Yang Pô yơh srăng rơ̆ng brei klei bi mtlaih kơ pô anăn, leh anăn amâo srăng tuôm luč klei bi mtlaih ôh (Y-Yôhan 10:27-29; Rôm 8:1, 29-30; Philip 1:6). Ƀiădah bi hŏng phung khua pô mtô soh leh anăn phung khua hưn êlâo soh snăn “ƀiădah mơ̆ng sui klei phat kđi mkra leh kơ diñu, leh anăn Pô bi rai diñu amâo pĭt ôh” (êlan 3). Diñu ka tuôm jing anak Aê Diê ôh, ka tuôm mâo klei lŏ kkiêng mrâo leh anăn klei bi mtlaih ôh (I Y-Yôhan 2:19; Y-Yut êlan 4, 19). Êdei kơnăn, Khua ƀĭng kna Y-Pêtrôs leh anăn Y-Pôl pia kơ diñu jing “asâo”, “ŭn” (êlan 22; Philip 3:2) čiăng lač kơ klei rai luč leh anăn bruă ngă čhŏ mrŏ diñu mplư lu mnuih hlue nao hlăm êlan rai luč msĕ si diñu. Grăp čô drei brei hriăm Klei Aê Diê Blŭ grăp hruê, čiăng kơ tơdah hmư̆ klei mtô, dưi thâo kral ti klei đăo soh, ti klei đăo sĭt.
Si ngă drei ksiêm dlăng bi nik mơ̆ êjai hmư̆ mtô mblang Klei Aê Diê Blŭ?
Wah lač: Ơ Khua Yang, bi mni lač jăk kơ Khua Yang kyua klei bi mtlaih Khua Yang brei. Akâo Khua Yang đru kâo djă pioh kjăp klei đăo hlăm Khua Yang leh anăn Klei Aê Diê Blŭ, čiăng kơ kâo dưi dôk kjăp ti anăp klei ksŭng blah mơ̆ng phung mplư, mtô mblang klei đăo soh bi rai klei đăo kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Nêhêmi 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
