II Pêtrôs 2:1-3
“Kơplah noh sơ̆ đei lu bơngai mơ’nah hơlĕnh pơdăr khan sư bơngai pơtruh nơ̆r ‘Bok Kei-Dei. Na đei ‘bok bơtho lu iĕm mơ’nah dang ei kư̆m lei-lăi, lu sư mơ̆t chur tơ tŏk-bŏk lu iĕm pơm chă bơtho pơjing kơdih khan tơdrong ‘Bok Kei-Dei. Tơdrong lu sư chă bơtho noh wă pơrăm lu bơngai lui đĕch păng lu sư sơngah kơ Yŏng bơ̆n Yêsu Krist tơ’ngla mă huai iŏk lu sư tăm. Lu sư pơm thoi noh, ‘Bok Kei-Dei Sư ưh kơ anat ôh, Sư gô phak hloi tơpă.” (II Pêtrôs 2:1)
Nơ̆r jet tơchĕng pơwao:
– ‘Bok Pêtrôs đei bơtho khan Khul Bơngai Lui athei kơchăng gah tơdrong krê hơmơt ayơ?
– Tơdrong răm ‘nâu krưp tih thoi yơ?
– Lĕch đơ̆ng lu bơngai pơrăm lăm Khul Bơngai Lui thoi yơ?
Tuch luch lăm chăl 1 jơ̆ nơ̆r pơma hơđăl gah tơdrong mơsêh lăm Sơ̆p Hla bơar nơ̆r Kră Yang ‘Bok Kei-Dei đei tơ’bôh lăm noh (II Pêtrôs 1:20-21), păng lăm chăl 2 pơtơm hăm nơ̆r “kơplah noh sơ̆” yua kơ đei minh tơdrong sơ’ngon tơpă păng noh tơdrong răm tih tơpă na mă bơngai ayăt gô pơrăm Khul bơngai lui, noh bơih lu bơngai bơtho ưh kơ trŏ chă hơlĕnh, păng lu ‘bok bơtho chă hơlĕnh “chă bơtho hơlĕnh”. Lu bơ̆n kăl kơ băt kon bơngai, tơdrong păng tơdrong pơma dơnuh lu sư hơdrol kơ pơma gah tơdrong Kră Yang wă phak. “Chă bơtho hơlĕnh” wă khan bơtho ưh kơ trŏ nơ̆r ‘nâu wă pơma khan “rơih iŏk” păng blŭng a wă khan nơ̆r pơma ‘lơ̆ng dêh, mălei đơ̆ng rŏng kơ noh đei tơplih păng wă khan pơma nơ̆r noh rai ưh kơ ‘lơ̆ng. Bơngai kiơ̆ tơdrong lui hơlĕnh đơ̆ng rŏng kơ noh jing bơngai lui kơ bơngai noh ‘maih lui, tơplih kơ chu iŏk tơdrong ‘nao ‘lơ̆ng ‘Bok Kei-Dei jơ̆ tơdrong rim bơngai kăl kơ lui. Lăm Khul Bơngai lui đei lu bơngai bơtho hơlĕnh păng ‘bok bơtho hơlĕnh yua kơ lu tơdrong kơnê̆ hlơp hrĕp wă chă pơhlŭ păng pơtơm lu bơngai lui weh ataih đơ̆ng tơdrong ‘nao ‘lơ̆ng Kră Yang na wă arih kiơ̆ tơdrong tơchĕng bơngai nai, noh wă khan “Bơtho hơlĕnh”.
Lăm noh Tơdrong ‘Nao ‘Lơ̆ng Kră Yang Yêsu ba ăn kơ bơngai lui “mălei inh truh tơ âu wă ăn kơ triu arih păng hiôk chơt tơpă” (Yôhan 10:10). Lei na lu ‘bok bơtho ưh kơ trŏ păng lu ’bok khan lê̆ adrol chă hơlĕnh bơtho ưh kơ trŏ “wă pơrăm” pơma pơtôm noh wă khan pơrăm dah pơtôch lê̆, păng chăl arih lu sư. “Lu sư pơm thoi noh, ‘Bok Kei-Dei Sư ưh kơ anat ôh, Sư gô phak hloi tơpă” (trong 1). Lu bơngai thoi noh mă oei lăm Khul Bơngai Lui mălei đei tơdrong bơtho “lu sư sơngah kơ yŏng bơ̆n Yêsu Krist Tơ’ngla mă huai iŏk lu sư tăm”. “Chă bơtho hơlĕnh”, sơngah kơ tơdrong pơgơ̆r đơ̆ng Kră Yang Yêsu.
‘Bok bơtho păng ‘bok khan lê̆ adrol chă hơlĕnh ưh kơ trŏ lu sư lui kơ Kră Yang tơpă ôh adrol sơ̆, mălei dang ei sơngah achăng tŭk tơdrong lui. Sơ̆p hla bơar nơ̆r Kră Yang bơtho rơđah tơpă minh ‘nu bơngai rơih iŏk păng ăn tơdrong dŏng pơklaih na tơ’ngla Kră Yang pơsĭt dŏng pơklaih bơngai noh tơpă păng ưh kơ đei layơ hiong tơdrong dŏng pơklaih noh (Yôhan 10:27-29; Rôm 8:1, 29-30; Philip 1:6). Mălei hăm lu ‘bok bơtho hơlĕnh păng ‘bok khan lê̆ adrol bơtho ưh kơ trŏ “Mă đơ̆ng sơ̆ ‘Bok Kei-Dei phak lu bơngai thoi noh ngăl, na lu bơngai noh kơnh ‘Bok Kei-Dei kư̆m phak mơ̆n, ưh kơ lê̆ ôh.” (trong 3b). Lu sư tam mă layơ jing kon Kră Yang, tam mă layơ tơpŭ ming ‘nao păng dŏng pơklaih (I Yôhan 2:19; Jut trong 4, 19). Đơ̆ng rŏng kơ noh, ‘bok Pêtrôs păng ‘bok Pôl krao lu sư khan “Kŏ”, “Nhŭng” (trong 22; Philip 3:2). Kơnhăm pơma kơ tơdrong hiong răm păng lu tơdrong jang kơnê̆ ‘mê ‘mach chă pơhlŭ lơ bơngai kiơ̆ trong hiong răm. Rim ‘nu kơ lu bơ̆n kăl kơ pơhrăm nơ̆r Kră Yang rim năr wă kơ mưh bơ̆n mơ̆ng đe bơtho, na bơ̆n băt kơnăl tơdrong ayơ đe chă bơtho hơlĕnh, tơdrong ayơ đe bơtho trŏ.
Ơ Kră Yang, inh bơnê kơ Ih yua kơ tơdrong dŏng pơklaih Ih ăn kơ inh. Apinh Ih tơgŭm inh wei kơjăp đon lui kơ Ih păng nơ̆r Ih wă kơ inh kơjăp kơplah đe chă bơtho hơlĕnh wă pơrăm đon lui lu nhôn. Krao khan yua anăn Kră Yang Yêsu Krist, Amen.
Lu bơ̆n hăm đei pơ’lơ̆ng kơplah bơ̆n tơchĕng mơ̆ng đe bơtho nơ̆r Kră Yang ưh?
Đŏk Sơ̆p Hla bơar ‘Bok Kei-Dei lăm pêng sơnăm: Nêhêmi 2
Kênh Youtube BHKTHN:
