Blŭng a 9:18-28
“Bơ̆n ‘nĕ kơ et sik suai hli kơ bơ̆n jing bơngai kư̆ kă; bơ̆n athei ăn kơ Yang Bơhngol ‘Lơ̆ng pơgơ̆r bơ̆n lăm tôm tơdrong” (Êphêsô 5:18)
Nơ̆r jet tơchĕng pơwao:
– ‘Bok Nôê đei yoch glăi pơm tơdrong kiơ?
– Lu kon ‘Bok Nôê đei pơm thoi yơ?
– Dôm lu tơdrong ‘noh tuch luch sư thoi yơ?
– Lu bơ̆n đei tơ’blŏk tơdrong kiơ đơ̆ng tơdrong âu?
Tơdrong đak lip tih mă ưh pă đei, tơdrong pơgơ̆p hiôk hian đei gơh pơjing, lăm tơdrong arih ‘nao pơtơm blŭng a. Hnam dơnŏ ‘bok Nôê pơtơm pơjing lăm tơdrong arih sa. Sư choh chŭn,pơtăm plei hơmu păng đei yua iŏk đơ̆ng ti sư jang. Plei hơmu đơ̆ng rŏng kơ phĕ sư chơpĕt iŏk jing sik hơmu. Păng đơ̆ng âu, ‘bok Nôê đei pơm glăi tih: “Sư huch sik hơmu na suai sư ‘bĭch akâu hoh lăm bơsŭn sư” (trong 21). Et sik ba kơ lơ bơngai đei jơhngơ̆m pran chhôk hal, chơt hiôk ‘măng yuh, mă ‘noh kư̆m tơdrong pơhlŭ krê hơmơt yua kơ sư gô ba ăn kơ kon bơngai gô suai sik, ưh pă gơh bơwei akâu kơdih, pơm tơdrong kơnê̆ kư̆ kă, Nơ̆r ‘BokKei-Dei bơtho khan: “‘Nĕ kơ et sik suai hli kơ bơ̆n jing bơngai kư̆ kă; bơ̆n athei ăn kơ Yang Bơhngol ‘Lơ̆ng pơgơ̆r bơ̆n lăm tôm tơdrong” (Êphêsô 5:18).
Kơplah đĭ-đăng teh đak răm rai păng pơm kư̆ kă, ‘bok Nôê oei kơjăp gơh gơ̆t. Mă-lei kơplah oei minh ‘nu minh drô̆ tơ’bơ̆p hăm tơdrong ‘maih wă kiơ̆ kơ sĕch akar, sư druh kiơ̆ sĕch akar. Nhen thoi ‘bok Ađam yă Ewơ sơ̆, tơdrong yoch pơm kơ măr sư lăng ‘bôh bre sư akâu hoh păng mơlâu pă băt dang yơ, na tơdrong yoch ‘bok Nôê et sik suai kư̆m ba sư truh akâu hoh păng mơn kơ kơdơ̆ mơlâu.
‘Bơ̆t anăp đei truh kơ ‘bă, lu kon ‘bok Nôê đei pơm pha ra băl. ‘Bok Cham ‘bôh ‘bă sư akâu hoh mă-lei sư ưh kơ tơgŭm mă-lei năm roi ăn kơ bơngai nai, tơ’bôh ăn ‘bă sư akâu hoh, pơm kơ sư rai mơlâu (trong 22). Mă khan lei ră, mă lei oei đei ‘bar ‘nu kon, ‘bok Sem păng ‘bok Japhet chă đon tơsu klơ̆p lê̆ akâu hoh ‘bă sư (trong 23). ‘Bar tơdrong đei pơm ‘noh ba ăn đơ̆ng rŏng kơnoh phara băl. Adrĕch adrŭng ‘bok Cham đei hiap pơtê̆, mă-lei adrĕch adrŭng ‘bok Sem păng Japhêt đei sơkat ăn pŭn hiôk (trong 24-27). Tơdrong yoch ling-lang đei ‘măn ăn đơ̆ng rŏng kơ ‘noh trăp dêh, ưh kơ sĭ kơplah noh đĕch mă oei oei ling -lang.
Tơdrong ‘bok Nôê suai sik pơm kơdih kâu akâu hoh, kơdơ̆ mơlâu, đơ̆ng noh dui iŏk tơdrong yoch ăn kơ ‘bok Cham kơplah noh ưh kơ băt pơyom kơ ‘bă kơdih, wă tơ’bôh ăn kon bơngai đei Kră Yang dŏng pơklaih đơ̆ng đak lip khan kon bơngai klaih đơ̆ng tôm tơdrong bơih. Kră Yang dŏng pơklaih lu sư ưh kơ sĭ khan ‘lơ̆ng tôm tơdrong mă ‘noh yua kơ tơdrong mơnat ăn đĕch đơ̆ng Sư. Păng đĭ dêh char đơ̆ng rŏng kơ đak lip ưh kơ sĭ khan ‘lơ̆ng tôm tơdrong. Đơ̆ng noh, kon bơngai tơblah hăm tơdrong ‘maih wă kiơ̆ kơ sĕch akar, kư̆m gô pŭ iŏk tơdrong yoch. Thoi noh lu bơ̆n athei gơnang kơ tơdrong mơnat đơ̆ng Kră Yang wă kơ gơh kĕ jei đơ̆ng tơdrong yoch păng năm hăm Kră Yang rim năr.
Ơ Kră Yang, inh băt kơdih kâu rơdu, ưh kơ gơh pơm kiơ, lơ wơ̆t druh kiơ̆ sĕch akar wă, pơm lơ tơdrong yoch pơm kơ kơdih kâu đei lơ tơdrong ưh kơ kiơ̆ thoi Ih wă. Bơnê kơ Ih, yua kơ Ih oei ‘mêm mơnat, huay kơ jô̆ yo kơ inh. Hơpơi tơdrong mơnat ăn đơ̆ng Ih tơgŭm inh gơh kĕ jei đơ̆ng tơdrong yoch păng mơn chăl arih hrăp jơnap lăm Ih. Yua anăn Kră Yang Yêsu Krist, Amen.
Tơchĕng kơ tơdrong lĕch yua đơ̆ng ‘bok Nôê suai sik, lu bơ̆n gô wă pơm thoi yơ hăm tơdrong et sik suai păng tơmam pơm kơ bơ̆n hơmui?
Đŏk Sơ̆p Hla ar ‘Bok Kei-Dei lăm pêng sơnăm: MiKa 7.
Kênh Youtube BHKTHN:
