Kalatias 6:4-5
Nqe cim:
“Txhua tus nyias yuav tsum ua tib zoo xyuas nyias tes haujlwm saib zoo li cas tso. Yog leejtwg tes haujlwm zoo lawm, tus ntawd thiaj khav tau tsis tas nws yuav coj nws txoj haujlwm mus piv rau lwm tus txoj.” (Kalatias 6:4)
Lus nug xav:
– Tes haujlwm kawg uas tus neeg “muaj Vaj Ntsujplig” yuav tsum muaj yog dabtsi?
– Vim li cas yuav tsum ua kom tiav lub luag haujlwm no?
– Peb tau nqua hu rov soj ntsuam peb tus kheej licas?
Khav txiv yog qhov kev txhaum hnyav tshajplaws uas ua rau cov timtswv ci ntsa iab saum ntuj ntxeev siab thiab dhau los ua cov yeeb ncuab tawmtsam Vajtswv (Yaxayas 14:12-15; Exekees 28:12-17). Nrog rau qhov ntawd, kev khav txiv kuj ua rau Adas thiab Evas ntshaw tau “zoo ib yam li Vajtswv” (Chivkeeb 3:5 HMOWSV). Tiamsis tus neeg “muaj Vaj Ntsujplig” tau ib lub mojyam tshiab, ntawd yog txojkev txo hwjchim zoo li Tswv Yexus.
Ib tug neeg “muaj Vaj Ntsujplig” yog tus hlub lwm tus thiab npaj txhij “sib pab ris nra”, nrog rau qhov ntawd, nws kuj yog tus niaj hnub vamkhom tus Tswv, zeem paub tias yus “tsis yog neeg tseemceeb” thiab niaj hnub “ua tib zoo xyuas nyias tes haujlwm saib zoo li cas”. Thaum ib tug neeg tsis ua neej nyob hauv Vaj Ntsujplig txojkev coj qhia thiab nyob hauv Vajtswv Txojlus qhov kaj, tus neeg ntawd yuav dhau los ua neeg khav txiv, muab hlob, ua rau luag chim lossis khib (Kalatias 5:26), tiamsis ib tug neeg uas txo hwjchim yuav niaj hnub paub soj ntsuam tus kheej “tsis tas nws yuav coj nws txoj haujlwm mus piv rau lwm tus txoj”.
Peb tau nqua hu kom “ua tib zoo xyuas nyias tes haujlwm saib zoo li cas”, txhais tau hais tias, peb tsis txhob muab yus tus kheej mus piv nrog lwm tus, tsis muab yus piv nrog tus neeg ua txhaum (nqe 1), tiamsis yog “xyuas nyias tes haujlwm… hauv Tswv Yexus Khetos txoj kevcai”, uas yog txojcai sib hlub; thiab kuj “xyuas nyias tes haujlwm” hauv kev zeem paub txog Vajtswv txojkev hlub tshua uas pub rau yus. Thaum ntawd peb yuav tsis khav txiv ntxiv lawm, tsis txiav txim rau lwm tus yam li tsis muaj lub siab hlub, tsis quavntsej txog qhov uas yus ua tau zoo dua luag lwm tus hauv lub neej sab ntsujplig npaum li cas, thiab kuj tsis muab hlob, tsis ua rau rau lwm tus chim lossis khib siab lawm. Thaum peb tig rov soj ntsuam tus kheej li ntawd lawm, yog tias tseem muaj yam dabtsi tsimnyog los khav, ces qhov ntawd tsuas yog kev khav hauv tus Tswv (II Kauleethaus 10:12-18) thiab khav txog tej uas Vajtswv tabtom ua dhau ntawm peb lubneej.
Tsis tas li ntawd xwb, Timthawj Paulus tseem ceebtoom Vajtswv haivneeg hais tias: “Rau qhov txhua tus nyias yuav tsum ris nyias lub nra” (nqe 5). Lo lus ceebtoom no tsis tawmtsam nqe 2 uas hais tias “sib pab ris nra”. Raws li ib txwm, ntsiab lus ntawm lo lus “nra” hauv (nqe 2) thiab hauv (nqe 5) zoo ib yam nkaus, tiamsis txawv nyob hauv lub tsamthawj no. Lo lus “nra” hauv nqe 5 hais txog txhua yam uas peb ris mus tiamsis tsis hais txog tej yam uas nyuaj nyuaj ris, tsuas hais txog txhua lub luag haujlwm hauv nyias lub neej uas nyias yuav tsum ris nyias feem. Peb yuav tsum ua lub neej sib hlub thiab sib pab ris tej nra hnyav, tshwjxeeb yog tej yam nyuaj hauv sab ntsujplig ntawm cov kwvtij, tiamsis tsis yog vim tej ntawd es peb ho tso tseg tej “nra” uas tus Tswv muab cob rau peb, xws li kev pehawm tus Tswv, mus raws qhov kaj, rau siab ua qhov zoo, ua tiav tus Tswv tej kev nqua hu thiab lub luag haujlwm Nws muab cob…
Thov Vajtswv,
Tus Tswv e! Thov pub kom nyuam yaus niaj hnub tsim dheev thaum tau Vaj Ntsujplig txojkev coj qhia thiab qhuab ntuas kom niaj hnub paub soj ntsuam nyuam yaus lub neej thiab ua tau lub neej sib hlub, ncaj ncees haum Koj siab. Nyuam yaus tuav Tswv Yexus Khetos lub npe thov, Amees.
Peb pheej soj ntsuam peb tus kheej tabmeeg tus Tswv licas?
Nyeem Vajluskub hauv peb lub xyoos: Mikhas 4
Kênh Youtube BHKTHN:
