I Kôrintô 5:1-8
“Iĕm athei hŭt đĭ tơdrong yoch wă kơ jing thoi ‘bĕng tơpŭng ‘nao tam mă pơjrâu ‘buih, yua kơ ‘Bok Kei-Dei pơklaih đĭ boih tơdrong yoch iĕm. Yêsu Sư thoi triu đe ‘bet sa pơm Giĕng Năm Brih wă ‘blŏk hơdơ̆r kơ tơdrong ‘Bok Kei-Dei pơklaih đơ̆ng dêh Êyiptơ, na Yêsu boih pơklaih bơ̆n.” (I Kôrintô 5:7)
Nơ̆r jet tơchĕng pơwao:
– Khul Bơngai Lui pơlei Kôrintô jơhngơ̆m lu sư thoi yơ hăm bơngai lui pơm yoch krưp?
– Sư yua rup “’Buih pông” păng “’Bĕng tam mă tơjrâu ‘buih” wă bơtho tơdrong kiơ?
– Lu bơ̆n kăl kơ pơm kiơ mưh bơ̆n pơm kơnê̆ gah tơdrong pơm pơyô kư̆ kă?
Đei minh ‘nu bơngai lui arih pơm yoch kư̆ kă ding mah ‘bĭch hơdai hăm akăn ‘bă sư lăm hnam akŭm anih mă ‘bok Pôl… păng pơjing pơm kơ sư lăng hlĭch păng sơ’ngon dêh. Mă khan lei ră, tơdrong pơm kơ sư lăng hlĭch dêh noh, ưh kơ đei sơ’ngon, jơhngơ̆m sư hmă đĕch dai mah “pơang kơdih akâu” khan oei lui kơjăp lăm bơngai lui pơlei Kôrintô hăm bơngai pơm yoch noh (trong 2) “Ơh sơ’ngon” jơ̆ nơ̆r yua kơplah nhơ̆m hmoi kơ bơngai lôch, tơ’bôh tơdrong chhur nuih ơh sơ’ngon tơpă kơ minh ‘nu bơngai. Tơplih kơ sơ’ngon, nhơ̆m hmoi kơplah ‘nhŏng oh bơ̆n pơm yoch tih, bơngai lui tơ pơlei Kôrintô “oei pơang”. Băt mă lu sư lăp đon yua kơ lu sư đei jơhngơ̆m “mơ̆ng kơ wă” lăm tơdrong pơm pơyô kư̆ kă, lu sư “pơyom tơdrong phara dêh” lăm chăl arih, yua kơ bơ̆n “pơklơ̆p” kơplah bơ̆n khan “noh tơdrong đe nai đĕch” kư̆m nhen thoi đe tơchĕng dang ei!
Wă kơ tơgŭm lu bơngai lui tơ pơlei Kôrintô hlôh băt tơdrong krê hơmơt ding dang yơ păng tơdrong hơmơt dêh jơhngơ̆m ‘bônh kơ pơm kơnê̆, ưh kơ bơngơ̆t. ‘Bok Pôl yua rup “’Buih” wă pơtih gia kơ “Tơdrong iĕm pơang akâu kơdih ưh kơ ‘lơ̆ng ôh. Iĕm ưh kơ băt ôh hă, tơdrong yoch thoi lĕ kơ ‘buih pông? Bơ̆n pơjrâu kơ bre sư ‘bĕng tơpŭng lăp tŏ sĕt đĕch mă-lei sư pông đĭ kơ ‘bĕng tơpŭng.” (trong 6). Minh ‘nu đei tơdrong yoch gô apoh kơ lơ bơngai lui lăm hnam akŭm. Nơ̆r mă “Bruih tơdrong kơnê̆, tơdrong yoch” lăm trong 8 đei pơma tơplơ̆ hăm “’Bĕng ưh kơ đei ‘buih pông, bơ̆n athei pơm ‘lơ̆ng tơpăt.” Tơdrong so wă khan tơdrong tơchĕng tơdrong arih tơdrong pơma sa kơplah bơ̆n tam mă klaih păng kăl kơ đei “pơm rơgoh”. Chăl arih ‘nao, pơma sa mă gơh đei tơplih thoi “’Bĕng ưh kơ đei puih pông” (trong 7-8).
Kơlih kơ thoi noh Khul Bơngai Lui kăl kơ đei jơhngơ̆m thoi yơ hăm tơdrong pơm pơyô kư̆ kă na sơ̆p hla bơar ‘Bok Kei-Dei đei chih rơđah hơđăl thoi noh? Kăl kơ “sơ’ngon” đĭ jơhngơ̆m bơtho tơ’bôh, dah sư oei tam mă tơbral. Kăl kơ puh tơlĕch bơngai noh đơ̆ng khul bơngai lui hăm “Bơngai thoi noh pơjao kơ yang satan”. Minh ‘nu pơm tơdrong yoch pơdah rơđah hơđăl hloi dah ưh kơ đei pơtơ̆p pơjuăt, ưh kơ đei đunh gô tơpoh tơ Khul Bơngai Lui. Mă khan lei ră, kăl kơ pơtơ̆p pơjuăt hăm jơhngơ̆m “sơ’ngon”, păng krao khan tơgŭm kơ lu ‘nhŏng oh bơ̆n, wă kơ “Bơhngol gơh klaih kơplah năr Yêsu jur ning mônh (trong 5).
Apinh Kră Yang tơgŭm bơ̆n adrin hŭt đĭ dôm tơdrong so oei đei lăm chăl arih bơ̆n, dah đei pơm kơnê̆ gah tơdrong pơm pơyô kư̆ kă ayơ oei đei lăm đon tơchĕng păng tơdrong bơ̆n pơm. Apinh Kră Yang tơgŭm yua tơdrong ‘mêm Kră Yang pơm rơgoh chăl arih lu bơ̆n pơư Anăn Kră Yang lăm Khul Bơngai Lui păng lu kon pơlei tam mă băt lui kơ Kră Yang.
Ơ Kră Yang, apinh Ih tơgŭm wă kơ inh huay ‘bônh kơ pơm yoch păng pôm jơhngơ̆m hơdai hăm tơdrong kơnê̆ păng lu bơngai mă bơ̆n ‘mêm, mălei yua jơhngơ̆m sơ’ngon păng pơm tơ’bôh mă tơpă hăm jơhngơ̆m krao khan wă tơgŭm inh păng ‘nhŏng oh inh kơchăng, tơbral păng đei hơmet ming jing ‘nao. Krao khan yua anăn Kră Yang Yêsu Krist, Amen.
Lu bơ̆n thoi “’Bĕng đei ‘buih pông” dah mă “’bĕng ưh kơ đei ‘buih pông” lăm tơdrong arih pơm ‘lơ̆ng?
Đŏk Sơ̆p hla bơar ‘Bok Kei-Dei lăm pêng sơnăm: Tơdrong Tơ’bôh 20
Kênh Youtube BHKTHN:
