Chivkeeb 8:1-19
Nqe cim:
“Yog li ntawd, Nau-es thiaj coj nws pojniam, nws cov tub thiab cov nyab tawm hauv lub nkoj mus” (Chivkeeb 8:18)
Lus nug xav:
– Qhov uas “Vajtswv yeej nco ntsoov Nau-es” (nqe 1) muaj lub ntsiab li cas?
– Nau-es tau ua dabtsi thaum lub sijhawm uas tos dej nqig?
– Peb kawm tau dabtsi txog Nau-es thiab nws tsev neeg thaum tawm hauv nkoj los?
Thaum Nau-es tseem tabtom nyob hauv lub nkoj kom tsis raug dej nyab, ces “Vajtswv yeej ncontsoov Nau-es thiab txhua yam tsiaj uas nrog nws nyob hauv lub nkoj, Nws thiaj ua kom cua ntsawj, thiab dej txawm pib nqig zujzus mus” (nqe 1MWW2022). Lub sijhawm no dej twb nyab rau saum tej npoo av ntev loo lawm. Lo lus hais tias “Vajtswv yeej ncontsoov” tsis yog Vajtswv hnov qab lawm, tiamsis yog hais txog lub sijhawm uas Vajtswv npaj yuav cawm Nau-es thiab nws tsev neeg. Ntawd yog Vajtswv tus yamntxwv thiab yog yam uas Nws pheej ua ua ntu zus hauv keebkwm los. Thaum Laxees, uas yog Yakhauj tus pojniam, tsis muaj menyuam, Vajtswv tau qhia Nws lub siab hlub tshua hais tias: “Vajtswv tseem nco ntsoov txog Laxees; nws thiaj teb Laxees tej lus thov thiab pub kom nws muaj menyuam” (Chivkeeb 30:22). Thaum haiv neeg Yixalayees quaj ntsuag hauv txoj kev ua qhev, “Vajtswv hnov lawv tej suab quaj thiab nco txog tej lus uas nws tau cog tseg rau Anplahas, Ixaj thiab Yakhauj lawm” (Khiavdim 2:24). Vajtswv yog tus ncaj ncees Nws yeej tsis hnov qab Nws tej lus cogtseg li, thiab Nws ib txwm ua haujlwm yog lub sijhawm uas Nws twb npaj tseg lawd.
Hauv ncua sijhawm uas Vajtswv nco txog ntawd, Nau-es nyob twjywm ntsiag to tos. Nau-es kev nyob tos tsis yog nyob twjywm tsis ua dabtsi. Nws siv zog tshawb xyuas saib dej nqig li cas, dhau los ntawm qhov uas tso ib tug nquab tawm mus saib seb av puas qhuav lawm los tsis tau (nqe 6–9). Txawm li ntawd los nws tsis cim civ ua haujlwm raws li nws siab nyiam, txawm yog thaum tus nquab tsis rov qab los lawm, txhais tau hais tias nws paub meej tus nquab twb nrhiav tau chaw nyob ntawm cov av qhuav lawm, los Nau-es kuj tsis cim civ tawm hauv nkoj los, tiamsis tos saib Vajtswv yuav hais li cas (nqe 12).
Tom qab uas txais tau Vajtswv lo lus, “Nau-es thiaj coj nws pojniam, nws cov tub thiab cov nyab tawm hauv lub nkoj mus” (nqe 18). Thaum yog Vajtswv lub sijhawm lawd, Nau-es thiab nws tsevneeg tawm hauv lub nkoj los thaum ntawd dej twb qhuav tas lawd. Dej nyab yog hais txog Vajtswv txoj kev rau txim, lub nkoj yog qhov chaw nkaum. Tiamsis nyob saum nkoj tsuas yog ib pliag xwb, vim qhov chaw nyob ntev thiab tsimnyog cia siab yog saum cov av qhuav. Ib yam li ntawd, peb yog cov uas twb ntseeg Tswv Yexus, yog cov twb tau “nce nkoj lawm” tsis tas ntshai txog kev rau txim ntawm txoj kev txhaum, thiab Vajtswv kuj pub peb muaj zog los kovyeej lub hwjchim ntawm txoj kev txhaum. Tiamsis yam uas tsimnyog peb cia siab tos ntsoov tsis yog lub ntiajteb uas nyob ib pliag ntawm no tiamsis yog lub sijhawm uas tsis muaj kev txhaum nyob nrog. Ntawd yog lub sijhawm uas peb plhis dua lub cev tshiab thiab mus nrog Vajtswv nyob saum Nws lub tebchaws uas ci ntsia iab.
Thov Vajtswv,
Vajtswv, nyuam yaus ua Koj tsaug vim Koj cawm nyuam yaus dim txoj kev rau txim ntawm nyuam yaus txoj kev txhaum thaum uas nyuam yaus ntseeg Tswv Yexus. Koj kuj pub nyuam yaus muaj lub zog kovyeej lub hwjchim kev txhaum txhua hnub. Nyuam yaus cia siab tos ntsoov tau nrog Koj nyob Koj lub tebchaws uas tsis muaj kev txhaum. Nyuam yaus tuav Tswv Yexus Khetos lub npe thov, Amees.
Peb puas cia siab ntsoov tos lub sijhawm uas tau “tawm hauv nkoj los” mus nyob qhov chaw ci ntsia iab ib txhis uas tsis muaj kev txhaum?
Nyeem Vajluskub hauv peb lub xyoos: Tshwmsim 16
Kênh Youtube BHKTHN:
