I Timôthê 6:1-2
“Đĭ đăng lu bơngai lui, lu mơ’nah đĭch đe, sư athei lui yom kơ yŏng tơ’ngla sư wă kơ lu bơngai tam mă lui ‘bôh sư pơm ‘lơ̆ng kơ yŏng tơ’ngla sư na sư huay kơ pơjăm ‘Bok Kei-Dei păng huay kơ pơjăm nơ̆r bơ̆n bơtho tơdrong ‘nao ‘lơ̆ng.” (I Timôthê 6:1)
Nơ̆r jet tơchĕng pơwao:
– ‘Bok Pôl bơtho lu bơngai pơm đĭch lui kơ Kră Yang athei đei jơhngơ̆m thoi yơ hăm yŏng tơ’ngla sư? Yua kơ kiơ?
– Bơngai lui ahrei âu đei jơhngơ̆m bơ̆jang thoi yơ?
Lăm char Rôm lăng jơ hnơr Pah ‘Nao, bơngai pơm đĭch lơ dêh. Tơdrong dŏng pơklaih, rơngei kơ Tơdrong ‘Nao ‘Lơ̆ng jing pơm kơ lu sư ‘maih mơ̆ng; na lơ bơngai pơm đĭch lui kơ Kră Yang. Mă khan lei ră, tơdrong dan ăn kơ lu sư đơ̆ng rŏng lui kơ Kră Yang: Mưh bơ̆n băt kơnăl kơ Kră Yang Yêsu bơih, lu sư lei lăi băl gah tơdrong gĭt hăm lu ‘nhŏng oh lăm hnam dơnŏ đei đon lui lu sư kơkuh kơ Kră Yang hăm yŏng tơ’ngla bơngai lui kơ Kră Yang lăm minh khul Bơngai, thoi noh na lu sư đei jơhngơ̆m thoi yơ hăm yŏng tơ’ngla noh?
‘Bok Pôl bơtho khan hăm yŏng tơ’ngla mă lu kơ Kră Yang, lu bơngai pơm đĭch athei “pơyom” lu sư. Hăm yŏng tơ’ngla tam mă lui kơ Kră Yang, na lu bơnga pơm đĭch kang “pơyom tôm tơdrong” (trong 1-2). ‘Bônh dêh kơ bơngai pơm đĭch mă lui kơ Kră Yang, ‘bôh mơn kơdih lăp đon yua kơ Sư đei rơih iŏk tơdrong ‘lơ̆ng hloh kơ chăl arih ling lang, đơ̆ng noh đei ba truh kơ tơdrong pôk pơư, na pơdê kơ yŏng tơ’ngla sư, ‘noh bơih tơdrong pơm kơ anăn Kră Yang păng tơdrong bơtho tơ’bôh đe gô pơjăm (trong 1). Mưh bơ̆n lui kơ Kră Yang, lu bơ̆n băt kơnăl tơdrong gĭt găl lei lăi hăm bơngai nai, lu bơ̆n ưh kơ đei lŭch hloh kơ yŏng bơ̆n dah hăm lu bơngai jang tih lăm teh đak âu ôh. Đơ̆ng noh lu bơ̆n ưh kơ gơh chă pơpơm, chă che bơle kư̆ kă kư̆m ưh kơ gơh pôk atŏk bơ̆n hloh kơ đe, mălei athei lui ngeh arih mă tơpăt yua kơ bơ̆n gơh klaih bơih. Mă khan lei ră, tơdrong jang bơ̆n păng anih bơ̆n oei tơ ala teh âu ưh kơ đei tơplih ôh, lu bơ̆ oei pơm đĭch jang kơ yŏng tơ’ngla bơ̆n đĕch. Tơdrong bơ̆n kăl kơ tơplih noh jơhngơ̆m lu bơ̆n kơplah bơ̆n jang pơm đĭch, yua kơ jơ âu, lu bơ̆n oei tang măt ăn kơ “anăn păng pơm ‘lơ̆ng tơdrong ‘Bok Kei-Dei” ‘bơ̆t anăp lu bơngai tam mă lui. Dah yŏng tơ’ngla lui kơ Kră Yang, lơ bơngai pơm đĭch đei tơdrong pơhlŭ yua iŏk khan lu sư ‘nhŏng oh hơdai đon lui wă kơ yŏng tơ’ngla ‘mêm, pơ’nhŏ ‘măn ăn kơ lu sư, đơ̆ng noh na ưh kơ hiơ̆k kơ tơdrong jang. Đon lui ưh kơ sĭ pơm kơ bơ̆n alah ôh păng ưh kơ pơyom mălei ‘noh bơih pơm kơ sư arih pơm kơmĭl. Thoi noh, hăm yŏng tơ’ngla lui kơ Kră Yang, bơngai pơm đĭch ưh kơ sĭ pơm yom đĕch ôh, mălei “sư jang kơ yŏng sư ‘lơ̆ng hloh kơ sư tam mă lui sơ̆” (trong 2).
Ahrei âu, lu bơ̆n jang kơ yŏng tơ’ngla tam mă lui kơ Kră Yang dah mă yŏng tơ’ngla lui kơ Kră Yang, mă khan bơ̆jang kơ bu hĭ, bơ̆n bơngai jang lui kơ Kră Yang athei pơyom yŏng tơ’ngla, jang đĭ jơhngơ̆m “yua kơ iĕm jang wă pơhiôk yŏng bơ̆n Yêsu Krist, ưh kơ sĭ iĕm jang wă pơhiôk kon bơngai đĕch ôh” (Kôlôssê 3:23). Đơ̆ng noh, pơư pơang anăn Kră Yang đơ̆ng lăm jơhngơ̆m păng đơ̆ng tơdrong bơ̆n jang.
Ơ Kră Yang, inh bơnê kơ Ih đei ăn kơ inh đei tơdrong jang. Apịnh Ih tơgŭm inh băt pơyom kơ yŏng tơ’ngla hăm nơ̆r pơma, jơhngơ̆m păng băt hiơ̆k bơngơ̆t wă kơ pơư pơang anăn Ih ‘lơ̆ng rŏ đơ̆ng lăm tơdrong jang inh. Krao khan yua anăn Kră Yang Yêsu Krist, Amen.
Lu bơ̆n kăl kơ tơplih jơhngơ̆m bơ̆n thoi yơ hăm yŏng tơ’ngla?
Đŏk Sơ̆p hla bơar ‘Bok Kei-Dei lăm pêng sơnăm: Tơdrong Tơ’bôh 13
Kênh Youtube BHKTHN:
