Klei Aê Diê Blŭ: Y-Luk 9:18-23
Êlan kliăng: “Leh anăn Yêsu lač kơ jih jang, “Tơdah sa čô čiăng tui hlue Kâo, brei ñu hngah hĕ kơ ñu pô, klam kyâo bi kal ñu grăp hruê, leh anăn tui hlue Kâo.” (Y-Luk 9:23)
Klei êmuh ksiêm mĭn: Tơdah leh hưn êlâo kơ klei djiê leh anăn klei kbiă lŏ hdĭp, ya klei Khua Yang Yêsu iêô mthưr phung ƀĭng kna Ñu brei ngă? Hŏng si hdră êlan, Klei Aê Diê Blŭ hlăm êlan 23 iêô mthưr brei drei myơr asei mlei tui hlue Khua Yang grăp hruê?
Hlăk Khua Yang Yêsu dôk wah lač hjăn, phung ƀĭng kna nao dôk jŭm dar Ñu, Khua Yang êmuh diñu sa klei êmuh yuôm: “ ‘Ƀiădah hlei Kâo jing tui si diih lač?’ Y-Pêtrôs lŏ wĭt lač, ‘Yang Krist mơ̆ng Aê Diê.’ ” (êlan 20). Leh anăn, Khua Yang hưn êlâo kơ klei knap mñai, klei djiê leh anăn klei Ñu kbiă lŏ hdĭp. “Leh anăn Yêsu lač kơ jih jang, “ ‘Tơdah sa čô čiăng tui hlue Kâo, brei ñu hngah hĕ kơ ñu pô, klam kyâo bi kal ñu grăp hruê, leh anăn tui hlue Kâo.’ ” (êlan 23). Khua Yang Yêsu dôk mtô phung ƀĭng kna Ñu kơ kyâo bi kal kpă ênô leh anăn klei khăp, mbĭt hŏng klei iêô mthưr myơr asei mlei klam kyâo bi kal tui hlue Khua Yang grăp hruê.
Leh aê aduôn Y-Ađam lĕ hlăm klei soh, knuih jing anak mnuih jing ngă soh. Klei Aê Diê Blŭ brei thâo “ênoh mưn kyua klei soh jing klei djiê” (Rôm 6:23), kyuanăn anak mnuih thâo săng snei, ti anăp klei kpă ênô khut khat Aê Diê, jih jang grăp čô drei amâo mdê hĭn ôh hŏng sa čô mnă guôn hruê arăng ba bi mdjiê! Ƀiădah kyua hŏng kyâo bi kal klei khăp drei dưi tlaih mơ̆ng klei djiê, dưi mâo klei pap brei klei soh leh anăn dưi lŏ bi mrâo anôk jing anak Aê Diê. Kyâo bi kal jing klei khăp amâo dưi rai ôh, jing klei kpă ênô bŏ hŏng klei pap, jing êlan atăt truh kơ klei hdĭp hlŏng lar.
Khua Yang Yêsu bi mjing leh Kyâo Bi Kal, jing klei iêô mthưr phung đăo kơ Krist myơr klei hdĭp tui hlue Ñu grăp hruê, hlăm êlan klei khăp leh anăn kpă ênô hŏng klei dôk hdĭp thâo khăp, thâo pap, săn asei mlei, leh anăn myơr klei hdĭp kyua klei kpă ênô, kyua klei sĭt nik. Klei Blŭ Khua Yang Yêsu hlăm êlan 23 yơh jing klei iêo mthưr bŏ hŏng klei khăp, lông dlăng drei êbat tui hluê Ñu grăp hruê hlăm êlan bi mlih mrâo, lui klei jing pô čiăng dôk hdĭp kpă ênô leh anăn thâo khăp msĕ si Khua Yang. Klam kyâo bi kal pô grăp hruê jing hdĭp knhuah hdĭp kpă ênô, amâo ư ai mbĭt hŏng klei soh, klei wê ôh, amâo tui hluê klei lăn ala ƀuôn sang dôk tui tiŏ ôh, ƀiădah čuăn ai tiê dôk hdĭp tui si hnơ̆ng čuăn Khua Yang mtô leh hlăm hdruôm hră Klei Aê Diê Blŭ. Mbĭt hŏng klei anăn, kyâo bi kal Khua Yang jing kyâo bi kal klei khăp mơh, kyuanăn mnuih tŭ ư klam kyâo bi kal ñu pô grăp hruê brei dôk hdĭp knhuah hdĭp thâo khăp, thâo pap leh anăn mă bruă wăt ya klei truh dưn.
Akâo Khua Yang brei drei amâo knŏng thâo hdơr nga bi mni Khua Yang, kyua klei kpă ênô klei khăp Ñu bi êdah leh ti kyâo bi kal čiăng bi mtlaih drei, ƀiădah tơdah hriăm thâo săng leh kơ kyâo bi kal, brei drei hmiêt mkăp wĭt lač mtam klei Khua Yang iêô mthưr bŏ hŏng klei khăp, dôk hdĭp kpă ênô leh anăn thâo khăp msĕ si Khua Yang, leh anăn êbat tui hlue Khua Yang ktuê jih êlan wĭt truh kơ Ƀuôn Jăk.
Si ngă drei tŭ ư kăp wĭt lač mơ̆ kơ klei Khua Yang iêô mthưr dôk hdĭp kpă ênô leh anăn thâo khăp?
Wah lač: Ơ Khua Yang Yêsu, bi mni Khua Yang tŭ klei djiê ti kyâo bi kal kyua klei soh kâo. Akâo Khua Yang đru kâo grăp hruê lui hĕ knuih jing kâo pô, klam kyâo bi kal kâo pô leh anăn êbat tui hlue Khua Yang jih klei hdĭp kâo. Brei klei hdĭp kâo bi êdah klei khăp leh anăn klei kpă ênô Khua Yang grăp hruê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 94-95
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
