Lukas 9:18-23
Nqe cim:
“Thiab Yexus hais rau lawv hais tias: Yog leejtwg xav nrog kuv mus, tus ntawd yuav tsum tswj nws lub siab thiab niaj hnub kwv nws tus ntoo khaublig nrog kuv mus.” (Lukas 9:23)
Lus nug xav:
– Tomqab uas hais ua ntej txog txojkev tuag thiab sawv rov los, Tswv Yexus nqua hu cov thwjtim ua licas?
– Tus Tswv lo lus hauv nqe 23 caw peb raws tus Tswv qab txhua hnub hauv txojkev twg?
Thaum Tswv Yexus tabtom thov Vajtswv ntawm ib qho chaw twjywm, cov thwjtim tuaj nyob ze Nws, Nws nug lawv ib lo lus tseemceeb: “Nej ne, nej ho hais tias kuv yog leejtwg? Petus teb hais tias: Koj yog tus Mexiyas uas Vajtswv txib los” (nqe 20). Tom qab ntawd, Tswv Yexus hais tseg txog Nws txojkev txomnyem, kev tuag thiab txojkev sawv rov los. “Thiab Yexus hais rau lawv hais tias: Yog leejtwg xav nrog kuv mus, tus ntawd yuav tsum tswj nws lub siab thiab niaj hnub kwv nws tus ntoo khaublig nrog kuv mus” (nqe 23). Tswv Yexus tabtom qhia cov thwjtim txog tus ntoo khaublig uas ncaj ncees thiab hlub tshua, nrog rau lo lus caw kom nqis tes kwv tus ntoo khaublig raws tus Tswv qab txhua hnub.
Tomqab uas Adas thiab Evas tsis mloog lus, tibneeg tus mojyam yim poob rau hauv kev txhaum. Vajtswv Txojlus hais tias: “Rau qhov nqi zog ntawm txojkev txhaum yog kev tuag” (Loos 6:23), yog li ntawd tibneeg yuav tsum zeem paub hais tias, tabmeeg Vajtswv txojkev ncaj ncees kawg nkaus, peb txhua tus puavleej zoo li cov neeg raug txim tuag uas tabtom tos raug tua pov tseg! Tiamsis los ntawm tus ntoo khaublig txojkev hlub, peb thiaj dim txojkev tuag, tau txais kev zam txim thiab tau rov los ua Vajtswv cov menyuam. Ntoo khaublig yog txojkev hlub uas tsis txawj tu, yog txojkev ncaj ncees uas puv npo lub siab hlub tshua, thiab yog txojkev coj mus rau txojsia ibtxhis.
Tswv Yexus tau hloov tus ntoo khaublig los ua lo lus caw cov ntseeg kom niaj hnub raws Nws qab hauv txojkev hlub thiab ncaj ncees, dhau ntawm kev ua lubneej sib hlub, sib zam txim, sib pab, thiab nqis tes ua haujlwm rau txojkev ncaj ncees, rau qhov tseeb. Tswv Yexus lo lus hauv nqe 23 yog lo lus caw uas puv nkaus txojkev hlub, nqua hu peb niaj hnub taug kev nrog tus Tswv mus hauv txojkev hloov lubneej dua tshiab, tso siab qub tseg kom ua tau lubneej ncaj ncees thiab hlub tshua li tus Tswv. Niaj hnub kwv nyias tus ntoo khaublig yog ua lubneej ncaj ncees, tsis koom nrog tej kev txhaum, tej yam yuamkev, tsis yoog raws lub ntiajteb tiamsis txiav txim siab ua raws li tus Tswv txojcai qhia hauv Vajluskub. Tsis tas li ntawd xwb, Tswv Yexus tus ntoo khaublig kuj yog ntoo khaublig ntawm txojkev hlub, yog li ntawd tus uas kam kwv nws tus ntoo khaublig txhua hnub yuav tsum ua lubneej sib hlub, sib zam txim thiab ua haujlwm pab lwm tus hauv txhua txhua tsamthawj.
Thov tus Tswv pab kom peb tsis tsuas yog ua tus Tswv tsaug txog txojkev ncaj ncees thiab txojkev hlub uas Nws qhia tshwm saum ntoo khaublig cawm peb xwb, tiamsis thaum kawm paub txog ntoo khaublig lawm, peb npaj txhij teb tus Tswv lo lus caw uas puv npo txojkev hlub, ua lubneej ncaj ncees thiab hlub tshua li tus Tswv, thiab taug kev nrog Nws mus rau Tebchaws Ceeb Tsheej.
Thov Vajtswv,
Tswv Yexus, ua Koj tsaug vim Koj twb tuag saum ntoo khaublig vim nyuam yaus lub txim. Thov pab kom nyuam yaus niaj hnub paub tso siab qub tseg, kwv nyuam yaus tus ntoo khaublig thiab taug kev nrog Koj mus tagnrho nyuam yaus lubneej. Thov kom nyuam yaus lubneej qhia tshwm Koj txojkev hlub thiab txojkev ncaj ncees txhua hnub. Nyuam yaus tuav Tswv Yexus Khetos lub npe thov, Amees.
Peb puas kam teb tus Tswv lo lus caw ua lubneej ncaj ncees thiab hlub tshua?
Nyeem Vajluskub hauv peb lub xyoos: Ntawv Nkauj 94-95
Kênh Youtube BHKTHN:
