I Kôrintô 1:17-18
“Lu bơngai wă hiong răm, lu sư lăng tơdrong bơ̆n bơtho gah tơdrong Yêsu Krist lôch tơ ‘long pơglang, lu sư lăng dang tơdrong kơtul đĕch. Mă-lei gah bơ̆n, bơ̆n băt tơpă tơdrong Yêsu lôch tơ ‘long pơglang kăl dêh, noh tơdrong mơsêh mơyang ‘Bok Kei-Dei pơklaih bơ̆n.” (I Kôrintô 1:18)
Nơ̆r jet tơchĕng pơwao:
- Nơ̆r ‘Bok Pôl bơtho tơdrong kăl tơm sư lăm đĭ chăl sư bơ̆jang kơ Kră Yang ‘noh kiơ?
- Hăm lăm ala teh, nơ̆r sư bơtho ‘noh thoi yơ?
- Mă hăm lu bơ̆n, nơ̆r noh đei yua kiơ kơ bơ̆n?
‘Bok Pôl sư pơma tơpăt ‘Bok Krist wơh sư năm chă bơtho Tơdrong ‘Nao ‘Lơ̆ng (trong 17). Thoi noh nơ̆r sư bơtho ling-lang bơtho lăm đĭ chăl sư bơ̆jang ‘noh bơtho gah ‘long pơglang Kră Yang Yêsu. Sư ưh kơ bơtho tơdrong noh kiơ̆ kơ gơh hơgei dah hlôh wao sư kơ dih, mă noh đơ̆ng tơdrong mơsêh pran kơtang đơ̆ng ‘long pơglang.
Hăm lơ bơngai, ‘long pơglang noh tơdrong rơdu tơrăn păng kơdơ̆ mơlâu. Pơm liơ tơdrong dŏng pơklaih gơh ba ăn đơ̆ng ‘long pơglang? Pơm liơ gơh kĕ jei đơ̆ng bơngai jĭ jăn pơmat păng đơ̆ng chu lôch? Lăm chăl bơngai Rôm bơngai mă lôch kơ đe pơ̆ng tơ ‘long pơglang noh đe pơjăm mơlâu dêh. Mă-lei ‘Bok Pôl đei tơbăt dôm tơdrong kiơ mă nhen thoi kơtul lu bơngai ala teh lăng, mă-lei tơpă sư noh tơdrong hơgei đơ̆ng Kră Yang ‘Bok Kei-Dei. ‘Long pơglang noh wă tơ’bôh trong Kră Yang Yêsu kơjung hloh kơ đĭ-đăng trong kon bơngai bơ̆n, păng chă đon dŏng pơklaih đơ̆ng Kră Yang hloh kơ tơdrong gơh hơgei kon bơngai chă đon.
Hăm lu bơngai lui, ‘long pơglang ưh kơ sĭ kơtul ôh mă ‘noh mơsêh pran đơ̆ng Kră Yang ‘Bok Kei-Dei. Tơ ‘long pơglang, đêl hre kơ tơdrong yoch đei ‘mong tôm, păng tơdrong trŏ tơpăt Kră Yang gơh oei bơwei. Kư̆m hăm, tơdrong ‘mêm mơnat Kră Yang ‘bĕnh blai kơplah đei tơdrong huay kơ jô̆ yo păng gơh hiôk ‘lơ̆ng dơ̆ng hăm bơngai yoch. ‘Long pơglang ưh kơsĭ kơ tơdrong pơtih, mă ‘noh jơ̆ anih ‘lơ̆ng tơpăt păng ‘mêm mơnat Kră Yang ‘Bok Kei-Dei đei pơpôi akŭm. Tơdrong noh pơm kơ bơngai ala teh thua, na đon lui lăng noh jơ̆ kĕ jei. Tơdrong bơngai ala teh lăng kơtul kơhlôh, na đon lui băt tơpă ‘noh jơ̆ tơdrong mơsêh pran đơ̆ng Kră Yang ‘Bok Kei-Dei. Bơtho gah ‘long pơglang jơ̆ bơtho gah tơdrong mơsêh pran păng tơdrong ‘mêm ‘Bok Kei-Dei ‘măn ăn kơ kon bơngai (trong 18). Lăp minh ‘long pơglang đĕch mă Kră Yang Yêsu chu lôch, gơh đei tơdrong mơsêh dŏng pơklaih, yua kơ noh jơ̆ anih ‘lơ̆ng tơpăt păng tơdrong mơnat ăn đĕch đơ̆ng Kră Yang ‘Bok Kei-Dei hiôk lăp đon. ‘Bok Pôl pơma tơpăt: “ Gah inh ưh kơ đei pơang akâu inh kơdih ôh, inh wă pơang kơ đe gah ‘long pơglang Yêsu đĕch. Yua kơ Kră Yang Yêsu lôch tang inh tơ ‘long pơglang tơpă na inh lê̆ đĭ-đăng tơdrong ala teh âu, dang lĕ inh pơ̆ng lê̆ dôm tơdrong ala teh âu tơ ‘long pơglang, kư̆m dang inh lôch tơ ‘long pơglang ưh pă kiơ̆ dôm tơdrong ala teh âu.”(Galati 6:14)
Lu bơ̆n ưh kơ sĭ lăp jing bơngai lui đĕch ôh, mă noh lu bơ̆n arih lăm tơdrong mơsêh pran lăm ‘long pơglang. Athei arih hăm jơhngơ̆m băt bơnê, ưh kơ pơang kơdih kâu, mă lei pơang gah ‘long pơglang ‘Bok Krist. ‘Long pơglang ưh kơ sĭ kơ pơsĭt dŏng pơklaih đĕch mă lei bơwei kơjăp tơdrong arih bơ̆n rim năr, krao pơtơm lu bơ̆n ‘mêm mơnat chu hŭt akâu, mơnat ăn jrŭ să păng arih ‘lơ̆ng tơpăt wă kơ ‘mong ăn tơdrong mơnat ăn đĕch đơ̆ng Kră Yang.
Ơ Kră Yang, hơpơi kơ nơ̆r bơtho păng tơdrong mơsêh pran đơ̆ng ‘long pơglang gơh đei yua lăm chăl arih inh. Apinh Ih tơgŭm inh ling-lang pơang gah ‘long pơglang ‘Bok Kris păng ră roi tơdrong ‘mêm Ih kơ lơ bơngai. Yua anăn Kră Yang Yêsu Krist, Amen.
Lu bơ̆n pơm tơ’bôh tơdrong pơang gah ‘long pơglang ‘Bok Krist lăm tơdrong arih bơ̆n rim năr thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Hơri So 92-93
Kênh Youtube BHKTHN:
