Klei Aê Diê Blŭ: I Y-Pêtrôs 3:20-22
Êlan kliăng: “Yêsu Krist đĭ leh kơ adiê leh anăn dôk tĭng hnuă kơ Aê Diê. Phung dĭng buăl jăk, phung khua kiă kriê, leh anăn phung khua prŏng myang mŭt đup gưt leh kơ Ñu sơăi” (I Y-Pêtrôs 3:22)
Klei êmuh ksiêm mĭn: Ya rup khua ƀĭng kna Y-Pêtrôs bi hmô čiăng lač kơ klei bi mtlaih brei kơ phung jing dŏ Khua Yang? Ya klei rơ̆ng kơ klei hưn hlăm êlan 22? Hŏng ya klei drei mâo klei dưi hĭn hlăm jih jang klei truh hlăm klei hdĭp?
Khua ƀĭng kna Y-Pêtrôs yua leh klei tŭ klei ƀaptem msĕ si “rup”, mblang jing klei bi knăl, kơ “klei anăn” (êlan 21), leh anăn “klei anăn” jing klei sapăn čô mnuih hlăm gŏ sang Y-Nôê mâo klei bi mtlaih mơ̆ng êa. Êa bi kngăm leh kluôm dhuôm jih jang phung mnuih kmưn ênuk anăn, leh anăn êa mơh bi mđĭ kŭmpăn Y-Nôê čiăng bi mtlaih jih gŏ sang ñu. Snăn, gŏ sang Y-Nôê jing rup kơ klei bi mtlaih hlăm Khua Yang Yêsu, Pô răng mgang phung đăo kơ Krist mâo klei hơĭt ênang ti anăp klei Aê Diê phat kđi.
Klei tŭ klei ƀaptem hŏng êa, knŏng jing rup kơ klei bi mtlaih ƀiădah “Êa anăn jing klei bi hmô kơ klei ƀaptem bi mtlaih diih ară anei, amâo djŏ klei bi doh klei čhŏ asei mlei ôh” (êlan 21), amâo mâo klei dưi đru lăm brei klei soh drei leh anăn đru drei mâo klei bi mtlaih ôh. Klei tŭ klei ƀaptem hŏng êa “jing klei kwưh ƀuăn kơ Aê Diê mơ̆ng ai tiê kpă jăk, hŏng klei Yêsu Krist kbiă lŏ hdĭp.” (êlan 21). Khua pô mtô John MacArthur mblang msĕ snei: “jih jang hlei pô čiăng mâo klei bi mtlaih, êlâo hĭn brei nao kơ Aê Diê hŏng klei hmăng hmưi čiăng mâo sa ai tiê kpă jăk, doh êngeh, leh anăn hmiêt mkăp wĭt lač kơ jih jang klei čoh čuăn yuôm brei mâo, čiăng dưi mâo klei bi mtlaih, anăn jing klei kmhal kơ klei soh leh anăn klei đăo”. Blŭ mdê hĭn, klei tŭ klei ƀaptem hŏng êa jing klei bi êdah klei čuăn ai tiê mơ̆ng sa čô mnuih ƀuăn rơ̆ng bi mguôp hŏng Yang Krist hlăm klei djiê leh anăn klei kbiă lŏ hdĭp hŏng Ñu (Rôm 6:3-4). Hlăk ênuk anăn, tŭ klei ƀaptem jing hưn bi êdah hŏng jih jang mnuih, kơ klei drei jing leh phung arăng pia phung đăo kơ Krist, jing phung mnuih arăng bi êmut leh anăn mưč. Tŭ klei ƀaptem jing sa bruă ngă ƀuăn rơ̆ng hdĭp mbĭt leh anăn djiê mbĭt hŏng Yang Krist, jing klei kwưh akâo kơ Aê Diê brei mâo sa ai tiê kpă jăk doh êngeh.
Ya ngă Y-Nôê dưi mâo klei bi mtlaih? Klei Mphŭn Dơ̆ng 6:8 lač snei: “Ƀiădah Y-Nôê mâo klei pap mơ̆ng Aê Diê”, mblang jing kyuadah Y-Nôê leh anăn gŏ sang ñu mă tŭ leh klei pap mơ̆ng Aê Diê. Tơdah amâo djŏ snăn ôh, ñu ăt jing bum ală hlăm klei hdĭp myang leh anăn djiê hlăm êa msĕ si jih jang phung mnuih ênuk anăn mơh. Snăn, klei dưi hĭn guh kơang hlăm Khua Yang Yêsu găn hŏng klei tŭ klei knap mñai, klei djiê, leh anăn klei kbiă lŏ hdĭp, ba leh kơ anak mnuih sa mta klei amâo dưi ngă ôh hjăn păn pô čiăng dưi mâo, klei anăn jing klei bi mtlaih.
Êlan 22 hưn mdah kyâo bi kal leh anăn klei kbiă lŏ hdĭp Khua Yang Yêsu dưi hĭn leh khut khat hŏng klei myang klei mmăt, leh anăn brei klei bi mtlaih hlŏng lar kơ phung jing dŏ Ñu. Klei hưn mdah anei wăt rơ̆ng kơ klei anei msĕ mơh, wăt tơdah si klei lông dlăng knap mñai drei dôk găn dưn, drei ăt dưi hĭn nanao kyuadah drei dôk hlăm Khua Yang Yêsu, Pô Dưi Hĭn guh kơang. Hruê anei, drei amâo knŏng dlăng phă Khua Yang Yêsu Pô Bi Mtlaih msĕ si klei bi hmô kơ klei dưi hĭn hŏng klei knap mñai, leh anăn klei amâo mtăp mđơr ôh, ƀiădah drei wăt dưi bi mguôp kluôm dhuôm leh anăn hlŏng lar hlăm klei dưi hĭn anăn msĕ mơh.
Si ngă drei čuăn ai tiê dôk nanao hlăm Khua Yang čiăng dưi dôk hdĭp mâo klei dưi hĭn nanao mơ̆?
Wah lač: Halêluya mpŭ mni kơ Khua Yang kyua klei Ih dưi hĭn guh kơang ti dlông kyâo bi kal. Akâo Khua Yang brei kluôm jih klei hdĭp kâo knŏng pioh kkuh mpŭ leh anăn mă bruă kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Đaniel 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
