I Pêtrôs 3:20-22
“Yêsu Krist iung arih tŏk tơ plĕnh oei gah ‘ma kơ ‘Bok Kei-Dei. Sư pơgơ̆r đĭ lu linh jang, lu yŏng pơgơ̆r lu linh jang, đĭ lu yang nai.” (I Pêtrôs 3:22)
Nơ̆r jet tơchĕng pơwao:
- Pêtrôs tơ’bôh ăn rup kiơ wă kơ pơma gah tơdrong dŏng pơklaih ăn kơ lu bơngai gah Kră Yang?
- Tơdrong roi pơdah lăm trong 22 pơsĭt ăn kơ bơ̆n tơdrong kiơ?
- Đơ̆ng tơdrong kiơ ba ăn kơ lu bơ̆n kĕ jei dôm tơdrong truh kơ plah arih lăm teh đak âu?
Pêtrôs đei yua tơdrong pơm batem nhen “rup” noh jơ̆ roi pơdah “tơdrong ‘noh” (trong 21), “tơdrong noh” noh jơ̆ tơ hngam ‘nu bơngai lăm hnam dơnŏ Nô-ê mă đei dŏng hlôi đơ̆ng đak lip noh. Đak lip đĭ kon bơngai lăm teh đak, đak kư̆m đei pôk lê̆ duk Nô-ê wă dŏng pơklaih hnam dơnŏ sư. Thoi noh, hnam dơnŏ ‘bok Nô-ê noh jơ̆ nhen thoi ngôi roi tơ hơnăp tơdrong dŏng pơklaih lăm Kră Yang Yêsu, Tơngla mă bơwei lu bơngai lui hlôi đơ̆ng tơdrong sek lang ‘Bok Kei-Dei.
Pơm ‘ba tem păng đak noh jơ̆ tơdrong roi pơjuang gah tơdrong dŏng pơklaih mă lei “tơdrong phĕt noh ưh kơ đei pơm ăn kơ bơ̆n rơgoh”(trong 21), ưh kơ đei gơh sŭt lê̆ đĭ dôm yoch păng gơh tơgŭm bơ̆n gơh đei tơdrong dŏng pơklaih. Pơm Ba-tem păng đak noh jơ̆ “hơ pơi hăm ‘Bok Kei-Dei đơ̆ng jơhngơ̆m ‘lơ̆ng rơgoh, yua kơ Kră Yang Yêsu iung arih đơ̆ng lôch” (trong 21). ‘Bok Bơtho a-năn sư John MacArthur đei tơblang thoi âu: “Đĭ đăng bơngai bu wă kơ ‘maih klaih, hơdrol hloh athei năm ‘bơ̆t a-năp Kră Yang ‘Bok Kei-Dei hăm jơhngơ̆m ‘lơ̆ng rơgoh, krăng kơchăng dôm tơdrong wă kơ gơh klaih noh jơ̆ tơdrong tơbral tơdrong yoch păng đon lui”. Pơma pha ra, pơm Batem hăm đak noh jơ̆ tơ’bôh ăn kơ minh ‘nu bơngai mă drơ̆ng pơkă pơkăm wă tơ’bưh hăm Kră Yang Yêsu Krist lăm tơdrong lôch păng iung arih (Rôm 6:3-4). Lăm chăl noh sơ̆, chu pơm batem noh jơ̆ roi pơdah kơ kơdih akâu bơ̆n gah Khŭl Bơngai Lui, noh jơ̆ khŭl mă đe a-reh păng lăng ưh kơ rơ-a. Chu pơm ba-tem noh jơ̆ tơdrong pơkă pơkăm chu arih hơdai păng chu lôch hơdai hăm Kră Yang Yêsu Krist, noh jơ̆ nơ̆r krao khan hăm ‘Bok Kei-Dei hăm jơ-hngơ̆m ‘lơ̆ng rơgoh.
Yua kơ kiơ ‘bok Nô-ê gơh klaih? Sơ̆p hla bơar Blŭng a 6:8 đei pơma: “Mă lei Nô-ê đei pŭn đơ̆ng Kră Yang ‘Bok Kei-Dei”. Wă khan ‘bok Nô-ê păng hnam dơnŏ sư đei sơng iŏk tơdrong pŭn hiôk păng tơdrong mơnat đơ̆ng Kră Yang ‘Bok Kei-Dei. Tơdah ưh lei Nô-ê sư kư̆m măng mu gah bơhngol kư̆m păng lôch kơ đak lip lei lăi thoi lu bơngai mă lôch lăm chăl noh. Thoi noh, tơdrong kĕ jei ‘lơ̆ng rŏ đơ̆ng Kră Yang Yêsu đơ̆ng tơdrong Sư chu pơmat, chu lôch, păng iung arih ba ăn kơ kon bơngai tơdrong mă ưh kơ gơh dŏng kơdih noh jơ̆ dŏng pơklaih.
Trong 22 roi pơdah ‘Long Pơglang păng Tơdrong Iung Arih ‘lơ̆ng rŏ đơ̆ng Kră Yang Yêsu ‘noh jơ̆ đei mơsêh pran kơtang hloh păng kĕ jei đơ̆ng tơdrong măng mu păng ba ăn tơdrong dŏng pơklaih ling lang kơ lu bơngai bu mă gah Sư. Tơdrong roi pơdah âu ăn kơ lu bơ̆n mă tơ’bơ̆p tơdrong pơmat tat truh dang yơ kư̆m ba ăn kơ bơ̆n kĕ jei ling lang yua kơ bơ̆n oei lăm Kră Yang Yêsu, Tơ’ngla kĕ jei ‘lơ̆ng rŏ. Dang ei, lu bơ̆n ưh kơ trŏ kơ minh tơdrong lăng tơ Kră Yang Yêsu nhen thoi kơmĭl ‘lơ̆ng lăm tơdrong chu pơmat păng đe pơgŏ mă ưh kơ trŏ tơdrong Sư pơm ră mă lei bơ̆n kư̆m đei tơdrong tơ’bưh ling lang ‘lơ̆ng rŏ hăm Kră Yang yua kơ Sư kĕ jei bơih.
Ha-lê-lu-ya ư-ang Kră Yang yua kơ Sư kĕ jei ‘lơ̆ng rŏ hlôi đơ̆ng ‘long pơglang. Inh ‘maih wă bơ̆jang păng kơkuh kơ minh ‘nu Ih đĕch. Yua anăn Kră Yang Yêsu Krist. Amen
Lu bơ̆n hăm wă kơnhăm păng adrin ling lang kơ oei lăm Kră Yang wă kơ arih kĕ jei?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Đaniel 8.
Kênh Youtube BHKTHN:
