I Pêtrôs 3:18b-20
“Mă Sư lôch minh ‘măng noh boih ưh pă layơ wă lôch dơ̆ng. Đe pơlôch akâu Sư, mă bơhngol Sư ưh kơ lôch ôh.” (I Pêtrôs 3:18b)
Nơ̆r jet tơchĕng pơwao:
- Yua kơ kiơ Pêtrôs pơma pran dêh gah tơdrong Kră Yang Yêsu lôch gah sĕch akar Sư?
- Kơplah đei chu lôch ‘noh “gah bơhngol” Kră Yang Yêsu pơm tơdrong kiơ?
- Tơdrong âu đei lơi yua păng ba ăn kơ bơ̆n đei tơdrong chang sơmĕng kiơ?
Pêtrôs pơsĭt kơ Kră Yang Yêsu lôch gah sĕch akar tơpă. ‘Nâu jơ̆ tơdrong tơpăt sĭt gĭt kăl yua kơ lu bơ̆n yua kơ tơdrong lôch păng iung arih Kră Yang Yêsu noh jơ̆ nhen thoi pơm lê̆ hơdrol yua kơ tơdrong noh gô truh kơ bơ̆n kư̆m thoi noh mơ̆n tơdrong noh ba ăn tơdrong chang sơmĕng kơ lu bơ̆n. Kră Yang Yêsu đei mơn kơ tơdrong lôch kon bơngai mă juăt kơ lôch, mă khan tơdrong hli krưp dêh noh jơ̆ tơdrong lôch, thoi noh Sư gơh mơnat kơ bơ̆n lăm tôm tơdrong, păng yua kơ Kră Yang đei iung arih đơ̆ng lôch lei lu bơ̆n kư̆m gô iung arih đơ̆ng lôch hăm akâu jăn ‘lơ̆ng rŏ (I Kôrintô 15:12-14, 17-20).
Mă lei gah bơhngol Sư arih, nơ̆r “Gah bơhngol” wă khan pơma kơ bơhngol mă ling lang ưh kơ tơplih” gah Kră Yang Yêsu. Bơhngol mă ưh kơ tơplih oei ling lang mă akâu akar Sư lôch, pêng năr đơ̆ng rŏng akâu akar Kră Yang đei tơplih păng akâu akar noh ưh kơ đei la yơ tôch. Mă khan Kră Yang Yêsu arih ling lang mă lei Sư kư̆m đei mơn kơ tơdrong tŏ sĕt noh jơ̆ bơhngol ataih đơ̆ng ‘Bok Kei-Dei (Mathiơ 27:46). Lăm tơdrong lôch yua kơ tơdrong yoch kon bơngai, ‘Bok Krist kĕ jei bơih tơdrong lôch păng iung arih ‘lơ̆ng rŏ ; mă lei lu bơngai yoch păng lu bơngai mă năm akŭm mơ̆n mă lei ưh tam mă tơplih ming ‘nao lu sư gô lôch lăm tơdrong yoch sư kơdih păng gô pŭ iŏk tơdrong phak ling lang.
Kơplah “gah sĕch akar” Kră Yang Yêsu tah lăm pơsat mă lei “gah bơhngol” Kră Yang “năm bơtho kơ lu bơhngol mă oei phak” (trong 19). Đei ‘bar tơdrong đei pơma kăl kơ mă hơđăl. Mă mônh, “bơtho” lăm nơ̆r Grĕk noh jơ̆ “roi pơdah”. Mă ‘bar, “lu bơhngol mă oei phak”, “wă khan lu bơngai pơm a-yăt chăl sơ̆, lăm chăl Nô-ê” (trong 20), wă khan lu linh jang mă pơ̆k huŏng lăm chăl Nô-ê (Blŭng a 6:2-4). ‘nâu jơ̆ lu linh jang mă ayăt kơ ‘Bok Kei-Dei lu sư đei pơm kơnê̆ yua kơ pơm bơ bul măt kon bơngai, thoi noh, na ‘Bok Kei-Dei chô̆ khoă lê̆ lu sư (Jut 6). Tơdrong Kră Yang Yêsu đei roi pơdah ăn kơ “lu bơhngol mă oei chô̆” ‘nâu ưh kơ trŏ kơ Tơdrong ‘Nao ‘Lơ̆ng ôh yua kơ Tơdrong ‘Nao ‘Lơ̆ng noh jơ̆ ăn kơ lu bơngai mă oei arih, ưh kơ đei wă ăn kơ bơngai mă lôch bơih na đei tơdrong sơmĕng wă klaih dơ̆ng mă ‘bar ôh. ‘bơ̆t âu Kră Yang Yêsu đei roi pơdah kơ lu ayăt kơ Sư gah tơdrong kĕ jei Sư tơ’long pơglang, tơdrong lôch, dơnâu ŭnh, yang kơnê̆ păng Sa-tan: “…Kră Yang Yêsu đei mơ̆t tơnoh, wă kơ đơ̆ng tơdrong Sư lôch na pơrăm lê̆ tơdrong pơgơ̆r noh jơ̆ tơdrong lôch, yang kơnê̆” (Hêbrơ 2:14).
Sa-tan đei ngeh kơ ‘long pơglang noh jơ̆ tơdrong sư kơdih kĕ jei, mă lei ‘bơ̆t ‘long pơglang noh bơih, tơdrong mơsêh Kră Yang Yêsu đei tơ’bôh tôm mah kơplah blah lê̆ dêh măng mu, đơ̆ng noh na ăn kơ bơ̆n đei tơdrong kơjăp mă khan wă tơ’bơ̆p tơdrong lôch.
Ơ Kră Yang, Inh hiôk chơt yua pôk nơ̆r bơnê kơ Kră Yang yua kơ Ih kĕ jei đơ̆ng tơdrong lôch. Tơdrong Ih lôch păng Ih iung arih hăm akâu jăn ‘nao noh jơ̆ ba ăn kơ lu nhôn tơdrong sơmĕng ‘lơ̆ng rŏ. Yua anăn Kră Yang Yêsu Krist. Amen
Lu bơ̆n hăm ‘bôh tơdrong sơmĕng ‘lơ̆ng rŏ lăm ‘long pơglang Kră Yang Yêsu ưh?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Đaniel 7.
Kênh Youtube BHKTHN:
