Klei Aê Diê Blŭ: I Y-Pêtrôs 3:18b-20
Êlan kliăng: “Arăng bi mdjiê Ñu leh hlăm kđeh, ƀiădah Aê Diê bi hdĭp Ñu hlăm mngăt;” (I Y-Pêtrôs 3:18b)
Klei êmuh ksiêm mĭn: Ya ngă khua ƀĭng kna Y-Pêtrôs kñăm kơ klei Khua Yang Yêsu djiê hlăm asei mlei kđeh? Êjai tŭ klei djiê hlăm asei mlei kđeh ya bruă “hlăm mngăt” Ñu ngă? Ya klei mblang kơ klei anei leh anăn ya klei čang hmăng ba kơ drei?
Khua ƀĭng kna Y-Pêtrôs bi klă klei Khua Yang Yêsu djiê hlăm asei mlei kđeh jing sĭt nik. Anei jing sa klei sĭt nik yuôm bhăn kyuadah klei djiê leh anăn klei kbiă lŏ hdĭp hlăm asei mlei Yang Krist yơh jing jar bi hmô leh anăn wăt jing klei čang hmăng kơ drei. Khua Yang Yêsu găn leh jih jang klei anak mnuih bi knal, tơl wăt klei găn năng huĭ hyưt hĭn anăn jing klei djiê, snăn Ñu thâo săng brei kơ drei hlăm jih jang klei, leh anăn tơdah Ñu kbiă lŏ hdĭp leh mơ̆ng phung djiê snăn sĭt nik drei ăt srăng kbiă lŏ hdĭp hlăm asei mlei guh kơang msĕ mơh (I Kôrantô 15:12-14, 17-20).
“Ƀiădah Aê Diê bi hdĭp Ñu hlăm mngăt”, boh blŭ “hlăm mngăt” čiăng lač kơ knuih myang Khua Yang Yêsu hdĭp nanao hlŏng lar. Knuih myang hdĭp nanao hlŏng lar Khua Yang ăt mă bruă nanao, wăt tơdah asei mlei kđeh hlăm lăn ala Ñu djiê leh; tlâo hruê êdei kơnăn, asei mlei kđeh Khua Yang kbiă lŏ hdĭp hlăm klei bi mlih leh anăn dôk nanao hlŏng lar. Wăt tơdah Yang Krist mâo klei hdĭp nanao hlŏng lar, ƀiădah Ñu tuôm găn leh sa kdrêč klei djiê hlăm mngăt myang, anăn jing klei bi ktlah hŏng Aê Diê (Y-Mathiơ 27:46). Hlăm klei djiê kyua klei soh anak mnuih, Yang Krist dưi hĭn leh hŏng klei djiê leh anăn kbiă lŏ hdĭp guh kơang; ƀiădah lĕ, jih jang phung mnuih soh leh anăn wăt phung nao sang Aê Diê ka mâo ôh klei lŏ bi kkiêng mrâo ăt srăng djiê kyua klei soh diñu pô mơh, leh anăn ăt srăng tŭ klei bi kmhal hlŏng lar.
Êjai “asei mlei kđeh” Khua Yang Yêsu arăng dưm hlăm msat, bi “klei hdĭp hlăm mngăt” Ñu “nao leh anăn mtô kơ phung mngăt arăng krư̆ leh” (êlan 19). Mâo dua klei mĭn brei bi klă tinei. Tal sa, “mtô” hlăm klei blŭ phŭn jing klei hưn mthâo. Tal dua, “phung mngăt arăng krư̆ leh”, “phung anăn đưm adih amâo gưt ôh tơdah Aê Diê gĭr sui hŏng diñu hlăm ênuk Y-Nôê ” (êlan 20), čiăng lač kơ phung dĭng buăl jăk lĕ hlăm klei soh hlăk ênuk Y-Nôê (Klei Mphŭn Dơ̆ng 6:2-4). Anei jing phung dĭng buăl jăk bi kdơ̆ng leh anăn ngă klei soh jhat ƀai snăk sơưn, kyuadah diñu bi mmăt hĕ ală mngăt myang phung găp djuê mnuih, kyuanăn, Aê Diê kă leh diñu hŏng klei săng đai hlŏng lar (Y-Yut 6). Mta phŭn klei Khua Yang Yêsu nao hưn kơ “phung mngăt arăng krư̆ leh” sĭt nik amâo djŏ Klei Mrâo Mrang Jăk ôh, kyuadah Klei Mrâo Mrang Jăk knŏng pioh kơ phung mnuih dôk hdĭp, leh anăn amâo tuôm lŏ mâo mmông găl tal dua tơdah leh djiê ôh. Tinei, Khua Yang Yêsu nao hưn kơ phung roh klei Ñu dưi hĭn leh hŏng klei soh, hŏng klei djiê, hŏng war pui, hŏng yang jhat leh anăn Satan: “…Ñu pô msĕ mơh mâo klei jing msĕ snăn, čiăng kơ hŏng klei djiê Ñu dưi bi rai pô mâo klei myang klei djiê, čiăng lač yang jhat” (Hêbrơ 2:14).
Satan bi mĭndah kyâo bi kal yơh jing klei ñu dưi hĭn kdrưh kơang, ƀiădah ti kyâo bi kal yơh, klei ktang myang Khua Yang Yêsu bi êdah kluôm ênŭm klei dưi hĭn hŏng ƀuôn ala mtao mmăt, mơ̆ng anôk anăn yơh ba kơ drei klei kjăp ktang wăt tơdah êjai dôk tlă anăp hŏng klei djiê dưn.
Si ngă drei ƀuh mơ̆ klei čang hmăng guh kơang hlăm kyâo bi kal Khua Yang Yêsu?
Wah lač: Ơ Khua Yang, kâo hơ̆k mơak bi mni kơ Khua Yang, kyuadah klei Ih dưi hĭn leh hŏng klei djiê. Klei djiê leh anăn klei kbiă lŏ hdĭp hlăm asei mlei Khua Yang yơh jing klei čang hmăng guh kơang kơ kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Đaniel 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
