Mathiơ 27:1-10
“Na Juđa năm klơ̆m lê̆ jên noh tơ hnam akŭm ‘Bok Kei-Dei tơm, brŏk hrek hơlŏng pơlôch akâu sư kơdih.”
Nơ̆r jet tơchĕng pơwao:
– Đơ̆ng rŏng kơ tĕch Kră Yang, Juđa Ikariôt đei pơm kiơ?
– Yua kơ kiơ Kră Yang Yêsu roi adrol gah Juđa jơ̆ bơngai trŏ kơ wă hiong răm?
– Lu bơ̆n đei tơ’blŏk tơdrong kiơ đơ̆ng tơdrong hơ’mon ‘bok Juđa?
‘Bok Juđa Ikariôt tĕch Kră Yang pêng jĭt hlak jên. Đơ̆ng rŏng kơplah răp lăng păng băt kơ lu ‘bok soi tơm păng lu kră sek tơlang chô̆ păng jao Kră Yang ăn kơ ‘bok Pilat wă pơlôch Sư, yua kơ kiơ̆ kơ tơdrong juăt, anih sek tơlang bơngai Juđê ưh kơ gơh sek pơlôch bơngai, ‘bok Juđa mah hmach kơ plơ̆ plĕch Yêsu, jơhngơ̆m sư ưh kơ hiôk yua kơ sư pơm yoch na sư năm tơwih ră kơ lu ‘bok soi, lu đe kră “sư roi kơ lu đe noh khan: Inh yoch tơpă, inh jao ăn kơ iĕm wă pơlôch bơngai mă ưh kơ đei pơm yoch kiơ” mălei sư kơtơ̆ng nơ̆r pơma đơ̆ng lu đe noh ưh kơ băt mơnat khan “Măk ai ih, nhôn jao ăn kơ ih jên đang bơih” (trong 4).
Adrol kơ wă chu iŏk pơmat, Kră Yang Yêsu krao khan kơ ‘Bă Sư khan, ‘bok Juđa Ikariôt jơ̆ “minh ‘nu bơngai trŏ kơ wă hiong ‘mơ̆i” (Yôhan 17:12); păng đơ̆ng blŭng a hloi bơih Sư kư̆m đei roi kơ lu bơngai pơhrăm păng Sư gah ‘bok Juđa khan: “… minh ‘nu lăm lu iĕm dang lĕ yang kơnê̆” (Yôhan 6:70). Yua kơ kiơ̆? Nơ̆r ‘Bok Kei-Dei năr ‘nâu ăn kơ bơ̆n băt. ‘Bok Juđa hmach mălei sư ưh kơ ‘blŏk dôm nơ̆r Kră Yang bơtho lăm pêng sơnăm hloi mă sư pôm ‘blŏk dôm nơ̆r ưh kơ hiôk kơplah sư iŏk pêng jĭt hlak jên wă plơ̆ plĕch Kră Yang! Sư ưh kơ roi tơdrong yoch sư kơ Kră Yang mă sư roi tơdrong yoch sư kơ lu bơngai pơgơ̆r tơdrong lui bơngai Juđê. Kư̆m dai jơ̆ng ‘bang Kră Yang mălei ‘bok Juđa ưh kơ tơbral “nhơ̆m ơh kơdih” thoi Pêtrôs, mă sư pơma nơ̆r ơh blĕk đĕch păng pơm klơ̆m pơdrâu lê̆ jên đêl sư iŏk. ‘Bok Juđa lĕch đơ̆ng hnam akŭm mălei ưh kơ wih brŏk tơ Kră Yang mă adrin kơdih na tuch luch tôch kơ đon năm lăm tơdrong pă hơmĕng.
Tuch luch, sư rơih iŏk tơdrong lôch wă kơ kơdâu klĕnh hlôi đơ̆ng jơhngơ̆m ưh kơ hiôk, mălei sư ưh kơ đei tơchĕng kơplah sư hrek hơlŏng atol tơ kơpal ‘long pơlôch akâu kơdih na bơhngol sư gô brŏk tơyơ?
Dang ei, kơplah bơ̆n đŏk dôm sơ̆p hla bơar Tơdrong ‘Nao ‘Lơ̆ng Yêsu Krist, phŏ bơ̆n đei chrih kơ ‘bok Juđa. Mălei apinh Kră Yang ăn kơ rim ‘nu lu bơ̆n tơpăt lăng ming bơ̆n kơdih lăm bơyan ‘blŏk kơ Kră Yang chu pŭ pơmat sơnăm ‘nâu. Lơ ‘măng bơ̆n kŭm ‘maih năm tơ kan tơ kon bơngai, măloi lu bơngai pơgơ̆r tơplih kơ năm tơ Kră Yang. Lơ ‘măng pơm yoch, bơ̆n hmach đĕch mă ưh kơ layơ wă tơbral na ling lang kơ oei pơm yoch. Lơ ‘măng lu bơ̆n ‘blŏk kơ tơdrong trŏ păng klah asong dih băl hloh kơ ‘blŏk nơ̆r Kră Yang bơtho. Lơ ‘măng bơ̆n hơmet tơdrong arih bơ̆n kơdih tơplih kơ tơkan năm tơ Kră Yang păng pơjao tơdrong arih bơ̆n kơ Sư. Kon bơngai pôm tơwih kơ bơ̆n hăm tơdrong ưh kơ hiôk đĕch, minh Kră Yang đĕch gơh ăn kơ bơ̆n trong tơdrong mơnat ăn tơdrong yoch. Apinh Kră Yang ăn kơ bơ̆n wih brŏk tơ Kră Yang hloi lăm năr ‘nâu.
Ơ Kră Yang, tơdrong hơ’mon ‘bok Juđa ăn kơ inh băt tơdrong rơdu tơrăn lăm inh kơdih, lơ ‘măng inh rơih iŏk tơdrong glăi ưh kơ trŏ, arih kiơ̆ kon bơngai tơplih kơ chu yom Ih. Apinh Kră Yang mơnat ăn kơ inh, ôp rơgoh jơhngơ̆m inh đơ̆ng dôm tơdrong hưch ham, ‘bơ̆r đak klak ŭnh, păng arăng kơ̆l, băt tơbral păng wih brŏk tơ Kră Yang, krao khan yua anăn Kră Yang Yêsu Krist, Amen.
Bơ̆n ‘bôh kơdih bơ̆n oei đei tơdrong kiơ lăm bơyan ‘blŏk kơ Kră Yang chu pơmat sơnăm ‘nâu?
Đŏk Sơ̆p hla bơar ‘Bok Kei-Dei lăm pêng sơnăm: Êsêkiên 36
Kênh Youtube BHKTHN:
