I Kôrintô 3:9-15
“’Bok Kei-Dei mơnat kơ inh, ăn kơ inh hơgei gơh pơm hnam. Inh man anih hnam ‘lơ̆ng boih, na đei bơngai nai pơm hnam ‘bơ̆t ei. Mă-lei bơngai bu mă pơm hnam ‘bơ̆t ei athei pơm mă ‘lơ̆ng.” (I Kôrintô 3:10)
Nơ̆r jet tơchĕng pơwao:
– ‘Bok Pôl yua iŏk tơdrong kiơ wă pơtih gia kơ Khul Bơngai Lui?
– Wă kơ tơdrong pơjing pơm hnam Khul Bơngai Lui gơh kơjăp ‘lơ̆ng, kăl kơ lăp đon kơ ‘bar tơdrong ayơ?
– Khul Bơngai Lui chăl adrol sơ̆ păng bơ̆n dang ei oei pơm “Hnam Khul Bơngai Lui” hăm tơmam ayơ?
‘Bok Pôl yua iŏk tơdrong kiơ wă pơma pêng tơdrong gah Khul Bơngai Lui tơ Kôrintô. Mă minh, Khul Bơngai Lui thoi minh pôm hnam Kră Yang ‘Bok Kei-Dei pơm (trong 9). Mă ‘bar, ‘Bok Pôl đei man ming hơnă (trong 10). Mă pêng, hnam Khul Bơngai Lui đơ̆ng “bơngai nai” pơm, pơma kơ ‘bok Apôlê (trong 10). Tơdrong ‘nâu tơgŭm kơ bơ̆n hlôh hơđăl hloh tơdrong jang Kră Yang, tơdrong jang Sư păng lu bơngai thoi kơ ‘bok Apôlê.
‘Bok Pôl tơ’blŏk thoi âu wă kơ tơdrong pơm hnam Khul Bơngai Lui gơh kơjăp ‘lơ̆ng, kăl kơ pơdrơ̆ng lăp đon ‘bar tơdrong: Mă mônh, hăm bơngai mă jang dan tơmo hơnă thoi sư, lei na hơnă hnam Khul Bơngai Lui noh Kră Yang Yêsu Krist, ưh kơ đei bu gơh pơm hnam Khul Bơngai Lui tơ anih nai (trong 11). Khul Bơngai Lui kơ Kră Yang ưh kơ gơh pơm hnam kiơ̆ kơdih dah mă kiơ̆ tơdrong hơgei minh ‘nu bơngai bu ‘nei (I Kôrintô 2:4-5). Thoi đei pơma lơ wơ̆t, tơdrong tơm pơm hnam Khul Bơngai Lui noh “’Bok Krist chu lôch tơ ‘long pơglang” (I Kôrintô 1:13, 17, 23; 2:2).
Mă ‘bar, dah đei hơnă hnam bơih, đei ‘bar tơ tơmam wă yua pơm hnam: Tơmam mă ŭnh sa ưh kơ kĕ păng tơmam ŭnh sa ‘bônh (trong 13-15). Maih, hu, tơmo găch ‘noh tơmam mă Pơtao Sôlômôn yua pơm hnam akŭm (I Hơ’mon 29:2). Lăm âu bơ̆n ‘bôh ŭnh sek tơlang ưh kơ kĕ sa; pơting hăm lu tơmam ŭnh ‘bônh kơ sa thoi Tơ̆r, ‘nhĕt, hơnong ‘ba. Dôm tơdrong jang Bơngai Lui jang hăm đon lui, tơdrong jang mă kiơ̆ kơdih păng tơdrong hơgei kon bơngai gô soh hăm ŭnh.
Bơngai mă lui ngeh kơ Kră Yang Yêsu noh bơngai mă gơh jô̆ ‘lơ̆ng tơpăt păng gơh klaih, dôm tơdrong sư pơm gô oei sek tơlang ‘mơ̆i (Rôm 14:10-12; II Kôrintô 5:10). Bơngai lui tơ Kôrintô kư̆m thoi bơ̆n dang ei đĭ gơh klaih bơih, mălei dah bơ̆n pơm hnam Khul Bơngai Lui lăm tơdrong pơting, tơgar, lei na tơdrong bơ̆n jang mă khan lơ păng lăng ‘lơ̆ng dang yơ hĭ, kư̆m lăng tơdrong jang noh kiơ̆ kơdih kiơ̆ kơ kon bơngai đĕch, păng kư̆m gô pơm kơ tơdrong bơ̆n jang noh ưh kơ đei yua kiơ hloi. Apinh Kră Yang ăn kơ bơ̆n băt pơ’lơ̆ng yua kơ rim kơ bơ̆n gô pŭ iŏk ‘bơ̆t anăp Kră Yang ‘Bok Kei-Dei jơ̆ Tơ’ngla pơjing Khul Bơngai Lui kơ Sư.
Kơkuh kơ Ih Kră Yang, apinh Ih tơgŭm inh pơjing pơm hnam Khul Bơngai Lui hăm tơdrong mơsêh Ih, hăm tơdrong gơnang kơ Ih păng pơyom hăm bơngai jang hơdai inh. Apinh Ih tơgŭm inh ling lang pơ’lơ̆ng kơplah bơ̆jang kơ Kră Yang, wă ba ăn tơdrong pơjing tơiung ưh kơ sĭ ba tơdrong tơklah Khul Bơngai Lui ôh. Krao khan yua anăn Kră Yang Yêsu Krist, Amen.
Dôm tơdrong bơ̆n oei bơ̆jang kơ Kră Yang hăm “kĕ kơ ŭnh” dah ưh?
Đŏk Sơ̆p Hla bơar ‘Bok Kei-Dei lăm pêng sơnăm: Êsêkiên 9
Kênh Youtube BHKTHN:
