I Kauleethaus 3:9-15
Nqe cim:
“Vim txoj koob hmoov uas Vajtswv pub rau kuv, kuv thiaj zoo li tus kws uas ua tsev, kuv txhos ncej thiab puam qhab cia, lwm tus tuaj vov thiab tuaj xov rau. Tiamsis txhua tus nyias yuav tsum ua tib zoo ua nyias tes haujlwm.” (I Kauleethaus 3:10)
Lus nug xav:
– Timthawj Paulus siv daim duab twg los piv txog Pawg Ntseeg?
– Yuav kom lub tsev Pawg Ntseeg ua tau zoo, yuav tsum ua raws ob yam twg?
– Cov ntseeg hauv Kauleethaus yav thaud thiab peb niaj hnub nimno tabtom txhim tsa “lub tsev Pawg Ntseeg” los ntawm tej yam dabtsi?
Timthawj Paulus tau siv daim duab lub tsev los hais txog peb yam ntawm Pawg Ntseeg hauv Kauleethaus. Qhov xubthawj, Pawg Ntseeg zoo nkaus li ib lub tsev uas yog Vajtswv ua tus txhim tsa (nqe 9). Qhov thib ob, Timthawj Paulus yog tus txhos ncej thiab puam qhab cia (nqe 10). Qhov thib peb, txheej saud yog “lwm tus” tuaj ua, ntawd yog hais txog Apaulaus (nqe 10). Daim duab pivtxwv no pab peb nkag siab meej ntxiv txog tes haujlwm ntawm tus Tswv, ntawm Timthawj Paulus, thiab ntawm cov neeg ua haujlwm zoo li Apaulaus.
Timthawj Paulus ceebtoom hais tias yuav kom lub tsev Pawg Ntseeg ua tau zoo, yuav tsum ua raws li ob yam no: Qhov xubthawj, hais txog tus neeg ua haujlwm txhos ncej thiab puam qhab zoo li Timthawj Paulus, ces lub taw lossis lub plag ntawm Pawg Ntseeg yuav tsum yog tus Tswv Yexus Khetos, tsis muaj dua lwm lub taw twg yuav txhim tsa tau Pawg Ntseeg li (nqe 11). Tus Tswv Pawg Ntseeg yuav txhim tsa tsis tau rau saum lub taw uas yog lub tswvyim lossis txojkev hais lus txawjntse ntawm ib tug tibneeg (I Kauleethaus 2:4-5). Ib yam li tau hais tseg ntau zaus lawm, zaj lus tiag taw coj los txhim tsa lub tsev Pawg Ntseeg yuav tsum yog “Yexus Khetos raug ntsia rau saum tus ntoo khaublig” (I Kauleethaus 1:13, 17, 23; 2:2).
Qhov thib ob, thaum muaj lub taw lawm, muaj ob yam khoom uas tibneeg feem ntau siv los txhim tsa lub tsev: yam uas tiv taus hluav taws thiab yam uas raug hluav taws hlawv kub hnyiab (nqe 13-15). Kub, nyiaj, thiab tej pob zeb muaj nqis yog tej yam khoom uas Vajntxwv Xalumoos tau siv los txhim tsa lub Tuamtsev (I Xwmtxheej 29:2), ntawd yog qhov pivtxwv qhia txog tej yam uas yuav tsis raug hluav taws txiav txim hlawv kub hnyiab; tej ntawd txawv tej yam khoom yoojyim raug hlawv kub hnyiab xws li ntoo, nyom qhuav, thiab nqeeb. Tej haujlwm uas cov ntseeg ua dhau los ntawm txojkev ntseeg, txojkev mloog lus thiab tso siab rau “Vajtswv lub hwjchim” (I Kauleethaus 2:4-5) yuav nyob mus ibtxhis; tiamsis tej haujlwm uas ua dhau los ntawm nqaij tawv thiab ntiajteb lub tswvyim yuav raug hluav taws hlawv kub hnyiab huv tibsi.
Tus neeg uas ntseeg tus Tswv Yexus tiag tiag yog tus uas twb raug suav hais tias yog neeg ncaj ncees thiab tau txais txojkev cawmdim lawm, tiamsis lawv tes haujlwm tseem yuav raug txiav txim (Loos 14:10-12; II Kauleethaus 5:10). Cov ntseeg hauv Kauleethaus thiab peb niaj hnub nimno txawm tias twb tau txais txojkev cawmdim lawm, tiamsis yog peb txhim tsa lub tsev Pawg Ntseeg rau saum txojkev sib txeeb, sib piv, ces peb tes haujlwm txawm yuav muaj ntau thiab zoo npaum twg los yeej yog sab nqaij tawv li haujlwm xwb, thiab yuav ua rau peb tej dag zog nkim tsis muaj qabhau li. Thov tus Tswv pab peb ceevfaj rau qhov peb txhua tus yuav tsum tau sawv tabmeeg Vajtswv uas yog tus txhim tsa Nws Pawg Ntseeg.
Thov Vajtswv,
Tus Tswv, thov pab nyuam yaus txhim tsa lub tsev Pawg Ntseeg los ntawm Koj lub hwjchim, los ntawm txojkev cia siab rau Koj thiab saib taus cov neeg uas nrog nyuam yaus ua haujlwm. Thov pab nyuam yaus niaj hnub ceevfaj thaum ua Koj tes haujlwm, thiaj yuav coj kev txhim kho, tsis yog sib faib los rau Pawg Ntseeg. Nyuam yaus tuav Yexus Khetos lub npe thov, Amees.
Tej haujlwm uas peb tabtom ua rau tus Tswv puas yog tej yam uas “hluav taws hlawv tsis kub” lossis tsis yog?
Nyeem Vajluskub hauv peb lub xyoos: Exekees 9
Kênh Youtube BHKTHN:
