I Timautes 3:14-15
Nqe cim:
“Thaum kuv sau tsab ntawv no tuaj rau koj, kuv xav hais tias nyaj kuv yuav tau tuaj saib koj sai. Tiamsis yog kuv tsis tau tuaj sai, tsab ntawv no yuav qhia rau koj paub hais tias Vajtswv tsev neeg yuav tsum coj li cas. Vajtswv tsev neeg yog cov ntseeg Vajtswv tus uas muaj sia nyob. Cov ntseeg ntawd yog tus ncej uas txawb Vajtswv Txojlus uas yog qhov tseeb.” (I Timautes 3:14-15)
Lus nug xav:
– Timthawj Paulus siv cov duab pivtxwv twg los qhia txog Pawg Ntseeg?
– Tej duab pivtxwv no qhia txog cov seem twg ntawm Pawg Ntseeg?
– Zaj kawm pab peb thiab tsev neeg ua lub neej li cas hauv Pawg Ntseeg?
Thaum tabtom qhia txog kev siv Txojmoo Zoo rau hauv lub neej, Timthawj Paulus nres ib pliag thiab tig los hais txog lub homphiaj ntawm tsab ntawv no. Nws hais tias: “Tiamsis yog kuv tsis tau tuaj sai, tsab ntawv no yuav qhia rau koj paub hais tias Vajtswv tsev neeg yuav tsum coj li cas” (nqe 15), dhau ntawm qhov no, peb kuj muaj kev pom dav dua txog tej teebmeem hauv kev ua neej ntseeg ntawm Pawg Ntseeg. Nws siv peb daim duab pivtxwv hauv nqe 15 los piav txog Pawg Ntseeg.
Yam thawj, Pawg Ntseeg yog Vajtswv Tsevneeg. Txog ntawm no, peb thiaj nkag siab tias vim li cas hauv seem hais txog tus cwjpwm ntawm tus thawj saib cov ntseeg thiab cov pab ua Vajtswv haujlwm, Timthawj Paulus qhia lawv yuav tsum “paub tswj lawv tsev neeg”. Raws li qhov no, lub tsev yog cuabyig, nyob qhov ntawd muaj qib muaj quas thiab muaj kev hwm txojcai, zoo ib yam li tus thawj saib cov ntseeg thiab tus pab ua Vajtswv haujlwm hauv kev “tswj lawv tsev neeg”; thiab lub luag haujlwm ntawm cov neeg hauv tsev yuav tsum tau tuav tsis tu ncua, xws li txiv-pojniam, niam txiv-menyuam, ib yam li tau hais hauv tus cwjpwm ntawm tus thawj saib cov ntseeg thiab tus pab ua Vajtswv haujlwm. Lub tsev kuj yog qhov chaw nyob mus ntev, qhov chaw uas ib tug neeg nyob kaj siab, zoo siab. Ntawm no, Timthawj Paulus tsis hais Pawg Ntseeg yog cov ntseeg lub tsev, tiamsis yog “Vajtswv Tsevneeg”, hais txog qhov chaw Vajtswv nyob thiab nyob mus ntev, yog qhov chaw Nws txaus siab nyob.
Yam ob, Timthawj Paulus qhib dav daim duab piv txwv “Tsevneeg” los ntawm lo lus piav “yog Vajtswv tus muaj txojsia nyob pawg ntseeg – HMOWSV”. Lo lus “Pawg Ntseeg” hauv lub ntsiab Lus Kilis yog “koom txoos”. Hauv Tes Haujlwm 7:38, lo lus no tau siv los piav txog cov Yixayees uas raug hu tawm hauv tebchaws Iziv los. Yog li ntawd, Pawg Ntseeg yog ib pab neeg uas raug hu tawm hauv ntiajteb no los. Nyob hauv lub ntiajteb niaj hnub nimno nqua hu kom sib zam, sib koom thiab sib lees yuav, ua rau Pawg Ntseeg yooj yim tsis nco qab tias peb raug hu tawm hauv ntiajteb, tsis yog yuav xyaw ua ib ke nrog ntiajteb.
Yam peb, Pawg Ntseeg yog “tej ncej txawb thiab tej taw tiag txojkev tseeb – HMOWSV”. Daim duab pivtxwv no yeej muaj qabhau heev rau Xibhwb hluas Timautes uas tabtom ua haujlwm hauv Efexus, uas yog lub nroog muaj lub tuam tsev loj heev teev tus mlom pojniam Atemis uas muaj 127 tus ncej. Lo lus “tej taw tiag” ntawm no hais txog ib lub phab ntsa lossis yam khoom tiag txawb kom ruaj. Piv Pawg Ntseeg yog “tej ncej txawb thiab tej taw tiag txojkev tseeb” yog hais khov kho hais tias Pawg Ntseeg muaj tes haujlwm tsa qhov tseeb siab siab kom sawvdaws thiaj pom.
Thov Vajtswv pab kom peb thiab peb tsev neeg yuav yog ib pab neeg cais tawm, thiab yog qhov chaw tiv thaiv, tsa siab qhov tseeb ntawm Txojmoo Zoo, kom xwv Pawg Ntseeg hauv zej zos thiab tag nrho Pawg Ntseeg thoob qab ntuj yuav dhau los ua qhov chaw uas Vajtswv txaus siab los nyob.
Thov Vajtswv,
Tus Tswv, ntau zaug nyuam yaus tsis nco qab lub ntsiab ntawm Pawg Ntseeg yog dabtsi thiab tshwmsim los ua dabtsi. Thov pab nyuam yaus rov saib nyuam yaus hauv Koj tej lus qhia kom nyuam yaus ua lub neej raws li Koj txojkev hu nyob hauv Vajtswv Pawg Ntseeg. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb yuav tsum hloov dabtsi kom ua lub neej tsimnyog hauv Vajtswv Pawg Ntseeg?
Nyeem Vajluskub hauv peb lub xyoos: Amaus 2
Kênh Youtube BHKTHN:
