Klei Aê Diê Blŭ: Klei Bi Hriêng 26:1-3
Êlan kliăng: “Msĕ si pliêr hlăm yan bhang amâodah hjan hlăm yan puôt, msĕ snăn klei mpŭ amâo năng ôh kơ sa čô mluk” (Klei Bi Hriêng 26:1)
Klei êmuh ksiêm mĭn: Ya ngă amâo mpŭ ôh kơ mnuih mluk? Ya ngă sa čô mluk brei ngă klei kpĭ mjuăt? Ya klei drei akâo kơ Khua Yang đru pô bi mlih hruê anei?
Sa čô mluk jing sa čô amâo huĭ mpŭ kơ Yêhôwa, mưč mač kơ klei thâo mĭn leh anăn klei mtô mtă (Klei Bi Hriêng 1:7). Anei jing sa čô năng ai mâo klei thâo lu ƀiădah knŏng jing klei thâo hlăm hră mơar đuč, amâo mâo klei thâo yua hlăm klei hdĭp ôh čiăng ba klei tŭ dưn kơ bruă Aê Diê leh anăn kơ pô mkăn. Klei mpŭ kơ sa čô mluk snăn amâo năng djŏ ôh, msĕ si pliêr hlăm yan bhang amâodah hjan hlăm yan puôt (êlan 1), amâo ba ya klei tŭ dưn ôh ƀiădah lŏ ba klei jhat bi rai leh anăn jhat jih kơ yan boh mnga. Sa čô mluk mâo klei bi mni, mpŭ khăng lŏ mâo klei đăo knang jao kơ bruă jăk leh anăn yuôm bhăn, klei anei atăt kơ klei truh kơ êpul êya, leh anăn sa čô mluk ăt srăng wiă klei amâo tŭ jing.
Êngao anăn, wăt tơdah mnuih mluk tăm pah amâo mâo klei amâo srăng truh ôh (êlan 2). Ya klei tăm pah msĕ si čĭm hrai leh anăn čĭm iăt phiơr đuĕ, sa klei blŭ bi êdah rup phung čĭm phiơr liŏ amâo mdlưh ôh siap, amâo trŭn ti sa anôk ôh, kăn truh ti anôk rei, amâo mâo klei srăng truh ôh, kyua anăn ăt kăn dưi ngă jhat kơ hlei pô.
Knhal tuč, sa čô mluk ăt brei mâo klei arăng kăp dlăng, mtô bi hriăm (êlan 3). Pô mgăt aseh srăng yua giê êwĭng čiăng gai aseh êran djŏ êlan. Phung răng aseh dliê srăng yua msei khơp kriê dlăng gơ̆, snăn sa čô mluk ăt brei mâo klei bi kmhal, kpĭ mjuăt mơh čiăng atăt digơ̆ nao djŏ êlan kpă, klei djŏ, klei kjăp hlăm knuih hdĭp čiăng kơ diñu amâo hmăi jhat ôh kơ êpul lu, leh anăn diñu pô ăt dưi ƀiă mơh klei amâo tŭ jing.
Hruê anei, lu mnuih tui tiŏ klei hdĭp phưi tha, toh hroh, dlăng hơăi mang kơ klei bhiăn djŏ, knuih hdĭp. Đa đa phung mkăn kyua huĭ arăng mưč mač, ñĕ đuĕ, kyua anăn ruah knuih hdĭp si arăng jing kâo snăn mơh. Lu mnuih lŏ mpŭ, bi mni kơ phung mâo klei hdĭp mluk kyua ƀuh diñu mâo hră bi mklă gưl dlông, mâo đa đa lŏ dưi mdưm ngă khua gĭt gai. Phung anei knŏng hưn kơ hră mơar pô ƀiădah mluk hlăm knuih hdĭp, hmăi jhat kơ êpul êya, ktŭng ba lu mnuih tui hlue knuih hdĭp jhat ƀai, ngă mgao. Phung mluk snăn khăng amâo tŭ ôh klei ƀuah mkra, kpĭ mjuăt mơ̆ng aduôn aê, amĭ ama, Phung Sang Aê Diê, tui tiŏ nanao knuih hdĭp êngiê hlăm klei soh, leh anăn klam klei amâo tŭ jing hlăm klei hdĭp anei leh anăn luč wăt klei hdĭp hlŏng lar. Akâo kơ Khua Yang đru drei hdĭp thâo mĭn, jih ai tiê huĭ mpŭ leh anăn gưt kơ Klei Aê Diê Blŭ čiăng thâo klei jăk mơak Aê Diê brei hlăm klei hdĭp anei leh anăn ăt kơ ênuk êdei. Wăt tơdah tăp năng tŭ klei luč liê kyua phung mluk ngă jhat, ƀiădah Klei Aê Diê Blŭ ƀuăn: “Lui diñu tăm pah, ƀiădah brei Ih brei klei jăk jĭn…” (Klei Mmuñ Hđăp 109:28).
Drei jih ai tiê huĭ mpŭ kơ Aê Diê leh anăn hdĭp kpĭ mjuăt hlue si klei Khua Yang mtô leh mơ̆ ka?
Wah lač: Ơ Khua Yang, kâo bi mni lač jăk kơ Ih pap brei leh klei soh kâo. Akâo kơ Yang Mngăt Jăk ƀuah ăl, mtô kâo thâo kriê pioh kjăp klei hdĭp mngăt, hdĭp bi mơak kơ Ih čiăng kơ klei hdĭp kâo mâo klei thâo mĭn, jăk mơak. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Ôsê 14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
