Pajlug 26:1-3
Nqe cim:
“Qhuas tus neeg ruam tsis muaj qabhau ib yam li los daus rau thaum ntuj qhua lossis los nag rau lub caij sau qoob.” (Pajlug 26:1)
Lus nug xav:
– Vim li cas tsis txhob qhuas tus neeg ruam?
– Vim li cas tus neeg ruam yuav tsum tau txais kev qhuab ntuas?
– Hnub no peb xav thov Vajtswv pab peb hloov yam dabtsi?
Tus neeg ruam yog tus tsis hwm tus Tswv, saib tsis taus lub tswvyim thiab tsis kawm txuj kawm ci (Pajlug 1:7). Tus neeg no tej zaum muaj kev paub ntau tiamsis tsuas yog paub ntawm ncauj xwb, tsis paub siv los ua hauv lub neej kom muaj qabhau rau Vajtswv txoj haujlwm thiab rau lwm tus. Kev qhuas tus neeg ruam li ntawd tsis tsim nyog, zoo li daus los thaum lub caij sov, zoo li nag los thaum lub caij sau qoob (nqe 1), tsis muaj qabhau dabtsi tiamsis tseem ua rau cov qoob loo puas tsuaj. Tus neeg ruam uas tau luag qhuas, luag txhawb nqa feem ntau tseem tau luag tsaws rau meejmom thiab tau muab cob haujlwm tseem ceeb rau ua, qhov no yuav ua rau muaj kev puastsuaj rau cov neeg hauv zej zog, thiab tus neeg ruam ntawd los yuav raug txais kev puastsuaj.
Tsis tas li ntawd xwb, txawm yog tus neeg ruam foom phem los yeej tsis muaj qabhau dabtsi (nqe 2). Tej lus foom phem tsis muaj paus muaj ntsis zoo li cov noog ya mus ya los tsis tsaws, tsis mus txog qhov twg, tsis muaj dabtsi tshwm sim, yog li ntawd yeej tsis ua rau leejtwg raug mob lossis raug teebmeem.
Qhov kawg, tus neeg ruam los yuav tsum tau raug tswj, raug qhia (nqe 3). Tus neeg caij nees yuav tsum siv nplawm los tswj tus nees kom khiav ncaj kev. Tus neeg yug nees luav yuav tsum siv xauv hlau los xam, ces tus neeg ruam los yuav tsum tau raug nplawm, raug qhuab ntuas kom coj lawv taug kev ncaj, kev ncees, tswj kev coj noj coj ua hauv lub neej kom lawv tsis txhob ua cuamtshuam phem rau pab pawg, thiab lawv tus kheej thiaj yuav tsis raug teebmeem.
Niaj hnub no, muaj ntau tus neeg qaug rau ntiajteb, ua lub neej ywj siab, limhiam, saib tsis taus kev ncajncees, kev coj zoo. Muaj ib txhia ntshai tsam raug phooj ywg thuam, txav deb, lawv thiaj xaiv txojkev ua neej luag ua li cas yus ua li ntawd. Muaj ntau tus ho qhuas cov neeg ua lub neej ruam vim pom lawv kawm ntawv qib siab, tej thaum tseem muab tsaws rau cov chaw ua thawj coj. Cov neeg no tsuas paub khav txog lawv tej ntawv povthawj tiamsis ruam hauv kev ua neej, ua rau muaj kev cuamtshuam phem rau lub zej zog, coj ntau tus mus raws txojkev ua neej limhiam, khav theeb. Cov neeg ruam li ntawd feem ntau tsis kam mloog lus qhuab ntuas ntawm pog yawg, niam txiv, Pawg Ntseeg, pheej niaj hnub taug txojkev ua neej ywj siab ua txhaum, thaum kawg raug kev puas tsuaj hauv lub neej tiam no thiab poob txojsia ibtxhis. Thov tus Tswv pab kom peb ua lub neej ntse, tas siab hwm tus Tswv thiab mloog Nws lus thiaj yuav txais tau tus Tswv txoj koob hmoov hauv lub neej tiam no thiab lub neej tomntej. Txawm tej thaum yuav raug poob ntau yam vim cov neeg ruam tawmtsam, los Vajtswv Txojlus yeej cog tseg hais tias: “Txawm yog lawv foom phem rau kuv, los koj yuav foom koob hmoov rau kuv. Thov kom cov neeg uas tsimtxom kuv swb hlo mus, thiab thov cia kuv uas yog koj tus tubtxib zoo siab…” (Ntawv Nkauj 109:28).
Thov Vajtswv,
Tus Tswv, nyuam yaus ua Koj tsaug uas Koj tau zam txim rau nyuam yaus. Thov Vaj Ntsujplig taw qhia, cob kom nyuam yaus paub tswj tus kheej, ua lub neej haum Koj siab kom nyuam yaus lub neej tau kev txawj ntse thiab koob hmoov. Nyuam yaus tuav Yexus Khetos lub npe thov, Amees.
Peb puas tau hwm tus Tswv thiab ua lub neej tswj raws tus Tswv tej lus qhia lawm tau?
Nyeem Vajluskub hauv peb lub xyoos: Hauxeyas 14
Kênh Youtube BHKTHN:
