Blŭng a 3:15, 20-24
“Inh gô ăn kơ e păng bơngai drŏ-kăn, adrĕch adrung bơngai drŏ-kăn hăm adrĕch adrung e gô ayăt dih băl. Kon bơngai gô juăc bơhlơ̆r kơ̆l e, na e gô choh kơnơl jơ̆ng Sư.” (Blŭng a 3:15)
Nơ̆r jet tơchĕng pơwao:
– Nơ̆r Kră Yang pơkă gah adrĕch adrung drŏkăn gô juă bơhlơ̆r kơ̆l ‘bih wă khan kiơ?
– Gah lu tơdrong phak lăm tơdrong yoch mă kon bơngai pŭ iŏk Kră Yang pơm kiơ kơ lu sư?
– Kon bơngai đei tơdrong hơmĕng thoi yơ?
Kơplah Kră Yang khan tơbăt pơm yoch gô phak, Kră Yang khan kơ Satan thoi âu, adrĕch adrung bơngai drŏkăn hăm adrĕch adrung bơngai gô ayăt dih băl, kon bơngai gô juă bơhlơ̆r kơ̆l e “na e gô choh kơnơl jơ̆ng sư” (trong 15) wă khan bơngai ‘noh gô pơrăm lê̆ satan. ‘Nâu bơih nơ̆r tơtă ‘lơ̆ng dêh. Wă tơ’bôh Kră Yang oei ‘mêm kơ kon bơngai. ‘Bok Dŏng Pơklaih gô pơrăm tơdrong pran satan wă kơ kon bơngai đei hơmet tơdrong tơ’bưh hăm Kră Yang. ‘Nâu bơih nơ̆r khan lê̆ hơdrol đơ̆ng sơ̆p hla bơar roi gah Kră Yang Yêsu, ‘Bok Dŏng Pơklaih gô pơrăm tơdrong pran yang kơnê̆ kơplah Kră Yang lôch tơ ‘long pơglang păng iung arih đơ̆ng lôch.
Ưh kơ sĭ wă ăn ‘Bok Dŏng Pơklaih đĕch ôh, ‘Bok Kei-Dei đei pơm tơ’bôh minh tơdrong tih tơpă: “Kră Yang ‘Bok Kei-Dei iŏk akar sem brem pơm ao tai ăn kơ bre klo-kăn Ađam hrŭk.” (trong 21). Minh sem dơrong đei pŭ iŏk tơdrong yoch păng pŭ iŏk mơlâu wă klơ̆p lê̆ ăn kơ kon bơngai. Chăl đơ̆ng rŏng kon pơlei Isơrael, rim wơ̆t pơm yoch, lu sư năm tơ ‘bok soi wă kơ pơyơ̆r kon sem dơrong wă ôn pơklơ̆p tơdrong yoch. ‘Bơ̆t anih tơ ‘long pơglang, Triu Kon ‘Bok Kei-Dei, Kră Yang Yêsu đe pơlôch jĭ pơmat wă pơm tơmam soi “Dŏng Pơklaih tơdrong yoch kon bơngai tơ ala teh âu”.
Yua kơ pơm yoch, na kon bơngai lĕch đơ̆ng pơgar Êđen chơt hiôk na năm tơ anih pơmat, mălei tơdrong arih kon bơngai ưh kơ tôch hiong lăm ơh sơ’ngon noh ôh. Nơ̆r pơkă gah ‘Bok Dŏng Pơklaih jơ̆ hơmĕng tih dêh, păng noh bơih trong ‘Bok Kei-Dei ăn kơ tơdrong yoch kon bơngai. ‘Bok Kei-Dei ăn lu Linh jang ‘lơ̆ng wei gak “trong năm tơ tơdrong arih” kơlih kơ thoi noh kon bơngai mă adrin tôch dang yơ hĭ kư̆m ưh kơ gơh kơdih bơ̆n đei tơdrong arih ling lang (trong 24). Mălei ‘Bok Kei-Dei pơkă hăm lu đe bu lui sơng iŏk, Kră Yang Yêsu: “Bơngai bu pih ao sư rơgoh bơngai noh boih hiôk. Bơngai noh gơh sa plei ‘long mă kon bơngai arih ling lang. Păng sư noh gơh mơ̆t ‘măng dur Pơlei Jêrusalem ‘nao.” (Tơ’bôh 22:14).Mưh bơ̆n lui sơng iŏk Yêsu, lu bơ̆n nhen thoi pih hơbĕn ao hăm pham Kon Triu, na lu bơ̆n, gô đei tơdrong arih. Hơpơi đĭ đăng kơ lu bơ̆n tă kơ arih tơnăp lăm tơdrong lui, gô kĕ jei đơ̆ng tơdrong pơhlŭ, wă kơ rim năr băt mơn tơdrong chơt hiôk kơplah oei lăm Kră Yang, păng chhôk ngă nă hal chang gô năr Kră Yang ăn tơdrong arih ling lang tơ pơlei ‘lơ̆ng.
Ơ Kră Yang inh bơnê kơ Ih mă khan kon bơngai pơm yoch, Ih oei pơih trong wă kơ inh tơ’bưh hăm Ih. Bơnê kơ Ih Kră Yang Yêsu yua kơ Ih đei juă bơhlơ̆r kơ̆l ‘bih noh sơ̆, Ih pơrăm lê̆ yang kơnê̆, đơ̆ng noh na inh gô đei tơdrong arih ling lang mưh inh lui kơ Ih. Apinh Ih tơgŭm inh arih lăm tơdrong hơmĕng ‘lơ̆ng rŏ âu. Păng đĭ jơhngơ̆m ră roi tơdrong ‘nao ‘lơ̆ng Ih kơ lơ bơngai, krao khan yua anăn Kră Yang Yêsu Krist, Amen.
Lu bơ̆n hăm pơjao đon lui bơ̆n tơ Kră Yang Yêsu dah mă oei pơm tơdrong yoch hơnơ̆ng?
Đŏk Sơ̆p Hla bơar ‘Bok Kei-Dei lăm pêng sơnăm: Hôsia 2
Kênh Youtube BHKTHN:
