I Kôrintô 2:6-16
“Mă-lei ‘Bok Kei-Dei ăn kơ bơ̆n Yang Bơhngol ‘Lơ̆ng tơbăt ăn kơ bơ̆n tơdrong ‘noh, yua kơ Yang Bơhngol ‘Lơ̆ng băt tôm tơdrong ‘Bok Kei-Dei mă jrŭ dang yơ.” (I Kôrintô 2:10)
Nơ̆r jet tơchĕng pơwao:
– ‘Bar tơdrong hơgei ayơ đei pơma ‘bơm tơ âu hei?
– Tơdrong ‘Bok Kei-Dei ‘măn kơ bu? Yua kơ kiơ?
– ‘Bai pơhrăm ‘nâu đei tơ’blŏk kơ bơ̆n tơdrong kiơ kơplah bơ̆n đŏk Nơ̆r Kră Yang păng awih awăn kơ Sư?
‘Bok Pôl bơtho pơtrơp đơ̆ng rŏng kơ sư bơtho tơ’bôh pơsĭt tơdrong Khul Lui pơlei Kôrintô tơklah dih băl noh yua kơ đơ̆ng lu bơngai đei jơhngơ̆m kơdâu kiơ̆ kơ tơdrong hơgei kon bơngai ala teh, đei ‘bơ̆r đon pơma tăr, bơbăt,tơblang thoi âu thoi noh. ‘Bok Pôl bơtho pơtrơp wơ̆t ‘nâu, sư bơtho năm tơ jrŭ hlom ‘biơ̆ dơ̆ng, nhen thoi sư oei lŏng lê̆ kơđoh ‘long wă ba lu bơngai lui ‘bôh tơ hơliĕng sư tơ lăm noh wă khan tơdrong tơm kăl noh. Lăm Hla bơar ‘Bok Kei-Dei bơ̆n lăng năr ‘nâu kư̆m roi tơdrong hơgei kon bơngai ala teh âu tơplơ̆ hăm tơdrong hơgei ‘Bok Kei-Dei (tr.6). ’Bok Pôl pơma pran khan bu gơh đei tơdrong hơgei Kră Yang noh? Hăm tơdrong hơgei ‘Bok Kei-Dei ‘nâu, “lu bơngai pơgơ̆r lăm teh đak” (tr.8), lu bơngai arih kiơ̆ kơ sĕch akar wă” (tr.14), lu sư ưh kơ gơh hlôh ôh. Tơdrong hơgei ‘Bok Kei-Dei noh Sư pôm ‘măn ăn kơ “lu bơngai mă ‘mêm kơ Sư” (tr.9), ‘măn ăn kơ lu bơ̆n” (trong 7,10), rơđah hơđăl ngơngei noh Sư ‘măn ăn lu bơngai mă “iŏk Yang Bơhngol ‘Lơ̆ng đơ̆ng‘Bok Kei-Dei ăn jur tơ bơ̆n noh” (12). Tơdrong hơgei ‘Bok Kei-Dei ‘nâu ưh kơ ‘măn ăn lu bơngai mă gơnang tơdrong hơgei kon bơngai ôh, yua kơ bơngai arih kiơ̆ kơ “sĕch akar wă” noh lu sư ưh kơ gơh đei iŏk ôh dôm tơdrong đơ̆ng Yang Bơhngol ‘Lơ̆ng ‘Bok Kei-Dei, yua kơ lu bơngai ei lăng tơdrong hơgei đơ̆ng Yang Bơhngol ’Lơ̆ng noh nhen thoi tơdrong kơtul păng lu sư ưh kơ gơh hlôh (tr.14). Ăp mă lu bơngai đei Yang Bơhngol ‘Lơ̆ng ‘mơ̆i na gơh sơng iŏk dôm lu tơdrong gah bơhngol.
Lu bơngai pơhrăm kiơ̆ Kră Yang kư̆m hlôi jet khan: “Yua kơ kiơ Ih bơtho pơjuang ngăl?” Kră Yang tơl: “‘Bok Kei-Dei ăn kơ iĕm băt gah tơdrong Sư wă pơgơ̆r kon bơngai thoi yơ, mă-lei Sư ưh kơ ăn kơ lu bơngai tơpôl noh băt ôh” (Mathiơ 13:10,11), lu bơngai iŏk Yang Sĭt, wă khan Yang Bơhngol’Lơ̆ng, minh Yang Bơhngol ‘Lơ̆ng,Yang Sĭt noh đĕch gơh bơtho tơ’bôh dôm nơ̆r sĭt noh kơ lu bơngai mă iŏk Yang Bơhngol ‘Lơ̆ng đĕch (Yôhan 16:13). Pôm lu bơngai mă iŏk Yang bơhngol ‘Lơ̆ng đĕch gơh hlôh, băt kơnăl kơ dôm tơdrong sĭt gah bơhngol..
Hla bơar Nơ̆r ‘Bok Kei-Dei mă bơ̆n lăng‘nâu hei,sư pơtôch hăm nơ̆r ‘nâu: “Dah bơngai bu hlôh băt tôm tơdrong ‘Bok Kei-Dei,lei kuă kơ kiơ bơtho ‘Bok Kei-Dei dơ̆ng? Gah bơ̆n, Yang Bơhngol ‘Lơ̆ng ăn kơ bơ̆n hlôh tơdrong Yêsu Krist.”(tr.16). Dôm tơdrong ‘Bok Kei-Dei ‘nâu jrŭ hlơp dêh, lu bơngai lăm teh đak âu mă lu sư hơgei hĭ dang yơ, lu sư ưh kơ gơh hlôh ‘mơ̆i tơdrong ‘Bok kei-Dei jrŭ hlơp ‘nâu. Mălei lu bơ̆n gơh hlôh tơdrong ‘Bok Kei-Dei jrŭ hlơp noh, yua kơ bơ̆n đei Yang Bơhngol ‘Lơ̆ng bơtho tơ’bôh ăn kơ bơ̆n. ‘Bok Pêtrôs sư bơngai traih jal chă ka đĕch, sư ưh kơ đei hŏk anih lơ,ưh kơ đei tơdrong hlôh jrŭ, mălei sư đei jơhngơ̆m tơdrong tơchĕng đơ̆ng Yang Bơhngol ‘Lơ̆ng pơchoh ăn kơ sư wă kơ sư chih kơthơ sư lăm Sơ̆p hla bơar Pah ‘Nao pơsư̆ pơioi đơ̆ng sơ̆ khơ̆ kơ dang ei truh tơ ning mônh ưh kơ layơ tôch păng sư kư̆m gơh bơtho kơ minh tơpôl, bơngai pah pŭng, rơbâu rơbâu ‘nu mơ̆ng kơtơ̆ng sư bơtho noh na rơbâu rơbâu ‘nu bơngai lui hloi kơ Kră Yang đơ̆ng sư bơtho noh. Tơdrong noh đei đơ̆ng tơdrong hơgei ‘Bok Kei-Dei Tơ’ngla mă ăn Yang Bơhngol ‘Lơ̆ng oei lăm jơhngơ̆m lu bơngai mă lui kơ Kră Yang Yêsu. Tơdah bơ̆n tam mă lui sơng iŏk Kră Yang Yêsu, tam mă ăn Yang Bơhngol ‘Lơ̆ng pơgơ̆r, bơtho tơ’bôh lei bơ̆n ưh kơ gơh hlôh ôh tơdrong ‘Bok Kei-Dei, păng bơ̆n kơdih ưh kơ gơh arih trŏ thoi Kră Yang lăp đon; mă Khul Lui kư̆m lei-lăi mơ̆n tơdah tam mă lui sơng iŏk Kră Yang Yêsu,tam mă ăn Yang Bơhngol ‘Lơ̆ng pơgơ̆r,bơtho tơ’bôh lei ưh kơ gơh hlôh ôh tơdrong ‘Bok Kei- Dei, kư̆m ưh kơ gơh arih trŏ thoi Kră Yang lăp đon mơ̆n.
Ơ Kră Yang Yêsu, inh bơnê kơ Ih hlôi ăn kơ inh Yang Bơhngol ‘Lơ̆ng, wă kơ đơ̆ng đei Yang Bơhngol ‘Lơ̆ng chông anhăk bơtho tơ’bôh na inh gơh hlôh dôm tơdrong gah bơhngol. Apinh Ih tơgŭm inh ‘bônh kơ ‘bôh băt dôm tơdrong Yang Bơhngol ‘Lơ̆ng bơtho,tơ’blŏk wă kơ inh arih kiơ̆ thoi Ih lăp đon. Inh krao khan yua anăn Kră Yang Yêsu Krist, Amen!
Bơ̆n dang ei hơtai arih, hơtai awih awăn kơ Kră Yang, hơtai jang dŏng Khul Bơngai Lui hăm tơdrong hơgei đơ̆ng yơ?
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong Jang 18
Kênh Youtube BHKTHN:
