Lukas 1:26-38
Nqe cim:
“Tus timtswv los hais rau Malis hais tias: Koj yuav tau zoo nyob kaj siab lug! Tus Tswv nrog nraim koj nyob thiab foom koob hmoov ntau kawg rau koj lawm!” (Lukas 1:28)
Nyeem ntxiv Phau Txhais Tshiab HMOWSV
“Tus tubtxib saum ntuj los hais rau Maivliag tias: Tus uas tau txais kev hlub ‘e, koj cia li noj qab nyob zoo. Tus Tswv nrog nraim koj.”
Lus nug xav:
– Timtswv hais rau Malis hais tias “tus uas tau txais kev hlub ‘e” muaj lub ntsiab li cas?
– Malis teb Vajtswv txojkev hu li cas?
– Peb kawm tau dabtsi thaum Vajtswv xaiv thiab hu peb?
Lukas sau txog Tswv Yexus kev los yug dhau ntawm zaj xwm timtswv los tshaj xov zoo rau Xakhaliyas thiab nws tus pojniam Elixanpes uas laus heev lawm tiamsis tsis muaj menyuam, hais tias nkawd yuav muaj menyuam thiab yug ib tug tub tis npe hu ua Yauhas, uas yog tus kho kev rau Tswv Yexus (Lukas 1:5-25). Txuas ntxiv yog zaj xwm tus timtswv Khali-ees los tshaj xov rau Malis uas yog ib tug ntxhais nkauj xwb hais tias, “Koj yuav xeeb tub thiab yuav yug tau ib tug metub, koj yuav tis nws lub npe hu ua Yexus” (nqe 31). Hauv ntu Vajluskub no, Lukas tau sau txog tus timtswv tej lus hais rau Malis hais tias, “Tus uas tau txais kev hlub ‘e, koj cia li noj qab nyob zoo. Tus Tswv nrog nraim koj” (nqe 28 HMOWSV).
Lo lus hais no tsis txhais hais tias Malis yog tus muaj koob hmoov ntau tshaj, tiamsis yog hais tias Vajtswv xaiv nws ntawm ntau tus ntxhais nkauj xwb, yog li tus timtswv thiaj li qhuas tias nws yog tus uas tau txais koob hmoov. Qhov tseeb tiag, nyob hauv Vajtswv lub zeem muag, tsis muaj ib tug neeg twg uas tsis yog neeg txhaum, rau qhov txhua tus tibneeg twb tau ua txhaum lawm (Loos 3:23), yog li Malis tus kheej kuj yog ib tug neeg txhaum uas cheemtsum tau txais Vajtswv txojkev hlub cawmdim. Vajtswv xaiv nws raws li Vajtswv lub siabnyiam, tsis yog raws li tibneeg lub siabnyiam.
Thaum tus timtswv pom tias Malis “nyuaj siab heev,” nws thiaj nplig siab hais tias: “Malis, koj tsis txhob ntshai, Vajtswv twb foom koob hmoov rau koj lawm. Koj yuav xeeb tub thiab yuav yug tau ib tug metub, koj yuav tis nws lub npe hu ua Yexus” (nqe 30–31). Ib zaug ntxiv, tus timtswv rov hais tias Malis yog tus tau txais koob hmoov ntawm Vajtswv, thiab qhov koob hmoov ntawd yog Vajtswv xaiv nws thiab siv nws los ua ib yam haujlwm loj heev uas yog yug Tswv Yexus. Vajtswv Tus uas muaj hwjchim loj kawg nkaus thiab nyob siab tshajplaws tau xaiv thiab siv Malis raws li Nws lub siab nyiam kom ua tiav Nws lub homphiaj cawm tibneeg. Qhov uas Vajtswv xaiv Malis yog los ntawm Nws txojkev hlub dawb paug nkaus xwb. Ua Vajtswv tsaug, tom qab hnov tus timtswv piav qhia meej lawm (nqe 30–37), Malis txo hwjchim mloog lus thiab teb hais tias: “Kuv yog Vajtswv tus ntxhais qhev, thov kom muaj raws li koj hais ko rau kuv!” (nqe 38). Malis lees paub hais tias nws tsuas yog “Vajtswv tus ntxhais qhev” xwb, thiab nws thov kom Vajtswv siv nws raws li tej lus uas Vajtswv tau hais tseg.
Nyob hauv lub caij Koob Tsheej nco txog Tswv Yexus yug xyoo no, peb rov los xav txog zaj uas Vajtswv xaiv thiab hu Malis kom nco ntsoov tias cov ntseeg kuj yog cov uas tau Vajtswv xaiv, hu, thiab txib mus ua haujlwm rau Nws. Tsis txhob muaj leejtwg khav thaum tus kheej tau Vajtswv xaiv. Thiab kuj tsis txhob muaj leejtwg tu siab thaum hnov tias zoo li tus kheej tsis tau Vajtswv xaiv. Vajtswv xaiv txhua tus raws li Nws txojkev xav thiab Nws xaiv ib tug los ua ib txoj haujlwm raws li Nws lub siab nyiam. Cia li ua Vajtswv tsaug rau Nws txojkev hlub dawb paug thiab txo hwjchim mloog lus nyob hauv lub luag haujlwm uas Vajtswv tau teem tseg rau peb.
Thov Vajtswv,
Tus Tswv, nyuam yaus ua Koj tsaug vim nyuam yaus tsis tsimnyog, tiamsis Koj tseem xaiv thiab txib nyuam yaus mus ua Koj tes haujlwm. Thov Koj pub kom nyuam yaus niaj hnub nco txog Koj txoj koob hmoov thiab txo hwjchim ua haujlwm raws li tej uas Koj tau npaj tseg. Nyuam yaus tuav Yexus Khetos lub npe thov. Amees.
Peb puas txo hwjchim mloog tus Tswv lus thaum Nws hu thiab txib peb ua Nws tes haujlwm lawm tau?
Vajluskub hauv peb lub xyoos: Tes Haujlwm 9
Kênh Youtube BHKTHN:
