Mathiơ 28:18-20; I Kôrintô 9:19-23
“Inh kư̆m pơm thoi sư mơ̆n wă kơ pơlung sư lui kơjăp. Inh druh kiơ̆ rim đon kon bơngai wă kơ gơh pơlung lu sư lui kơ Yêsu Krist na klaih đơ̆ng dôm tơdrong yoch.” (I Kôrintô 9:22b)
Nơ̆r jet tơchĕng pơwao:
– Yua kơ kiơ krao khan noh ‘măn adrol hloh kơplah wă ră roi bơtho?
– ‘Bok Pôl pơm thoi rim đon lu sư thoi yơ?
– Lu bơ̆n pơhrăm iŏk tơdrong kiơ đơ̆ng kơmĭl ‘bok Pôl?
Pơm kơdranh gah tơdrong dŏng pơklaih đơ̆ng Kră Yang ‘noh minh tơdrong tơtă athei hơđăl dêh kơ khul bơngai lui kiơ̆ kơ rim jơhnơr. Kră Yang Yêsu pơma hơđăl đĭ đăng tơdrong pơgơ̆r tơ kơpal plĕnh, ala teh đei pơjao kơ Sư bơih, păng Kră Yang wơh kon pơlei Sư ră roi bơtho Tơdrong ‘Nao ‘Lơ̆ng lăm tơdrong mơsêh Yang Bơhngol ‘Lơ̆ng (Mathiơ 28:19). Bơtho ră roi păng pơm ‘Batem athei pơm kiơ̆ hăm pêng Anăn ‘Bok Kei-Dei. Tơdrong jang chă bơtho ling lang đei Kră Yang oei hơdai, kơlih kơ thoi noh, krao khan athei ‘măn adrol hloh kơplah wă bơtho.
Tơdrong ‘Nao ‘Lơ̆ng Kră Yang ‘măn kơ adrĕch adrung. Kră Yang wă dêh kon lu kon Sư đei tơdrong hơgei wă ba kon pơlei jing jơ̆ng ‘bang Kră Yang. ‘Bok Pôl bơih kơmĭl wă kơ bơ̆n rok kiơ̆. Wă bơtho Tơdrong ‘Nao ‘Lơ̆ng kơ lu bơngai Juđê, sư đei kăt tơdra akar kơ Timôthê wă kơ ‘mêm băl, huay kơ đei tơdrong pơm kơnê̆, sơngah kơ Tơdrong ‘Nao ‘Lơ̆ng đơ̆ng lu bơngai Juđê lăm tơring noh. ‘Bok Pôl băt hơđăl tơdrong kăt tơdra akar noh tơdrong pơgơ̆p lăm Kră Yang păng kon pơlei Juđê (Blŭng a 17:9-12), mălei ‘noh ưh kơ trŏ kơ tơdrong dŏng pơklaih (Rôm 4:10-12). Minh ‘măng dơ̆ng, ‘bok Tĭt, sư bơngai tơdăm sư jang tơgŭm ‘bok Pôl, jơ̆ bơngai Grĕk, mă khan đei lơ tơdrong gleh mălei ‘bok Pôl sơngah ưh kơ wă kăt tơdra akar kơ Tĭt ôh (Galati 2:3-5).
Hăm lu bơngai tơmoi, ‘bok Pôl đei arih sa pha ‘biơ̆ wă ba lu sư năm tơ Kră Yang. Thoi gah tơmam sa, lu bơngai Juđê pơm kiơ̆ tơdrong juăt đei pơting lu kon sem ‘lơ̆ng rơgoh păng ưh kơ rơgoh (Lêwi 11), pơtih gia thoi kơ nhŭng, ka hơkĕnh, hơbâu… ‘noh lu sem dơrong mă ưh kơ rơgoh thoi noh lu sư ưh kơ sa. Kơlih kơ thoi noh bơngai Juđê ưh kơ đei sŏng sa hơdai hăm bơngai tơmoi. Mălei ‘bok Pôl, mă khan sư bơngai Pharisi wei tơdrong juăt hơđăl dêh, na tă khan ngôi sŏng sa hăm lu bơngai tơmoi, kơnhăm wă kơ tơ jê̆ băl, pơm kơdranh gah Kră Yang kơ lu sư. Tơmam sa mă ưh kơ rơgoh lăm Lêwi ưh kơ đei pơm ‘mê̆ ‘mach gah bơhngol ôh. Sư khan hơđăl: “Tôm tơdrong ‘Bok Kei-Dei pơjing ‘lơ̆ng ngăl, bơ̆n gơh sa đĭ đăng, mă-lei bơ̆n athei krao khan bơnê kơ ‘Bok Kei-Dei ‘mơ̆i. Kiơ̆ kơ ‘Bok Kei-Dei pơkă tơmam sa bơ̆n ‘lơ̆ng ngăl yua kơ bơ̆n krao khan bơnê kơ Sư hơdrol boih.” (I Timôthê 4:4-5).
Lu adrĕch adrung đei tơdrong juăt ngăl, tơdrong apah đơ̆ng yă ‘bok, tơdrong juăt phara pha. Wă bơtho gah Kră Yang, bơ̆n athei tơ jê̆, hơdai hăm lu sư. Đơ̆ng tơdrong krao khan tơpăt, gơnang kơ Yang Bơhngol ‘lơ̆ng chông tơ’bôh păng đơ̆ng Nơ̆r ‘Bok Kei-Dei pơchrang, bơ̆n gơh pơting lu tơdrong ayơ kăl kơ weh wer thoi kơ lui kơ tơdrong kư̆ kă, soi kơ yang, tơdrô, wăn ‘bai… păng lu tơdrong ayơ kăl kơ arih hiôk hơiă hăm lu bôl buăl wă kơ đei jơ năr chông tơ’bôh kơ lu sư năm tơ Kră Yang Yêsu.
Kơkuh kơ Ih Kră Yang, apinh Ih ăn kơ inh đei tơdrong hơgei kơplah arih tơ jê̆ bôl buăl, ‘nhŏng oh, wă kơ inh gơh weh wer đơ̆ng dôm tơdrong pơjah tơhil băl păng gơh tơ jê̆ hăm tơdrong hiôk ‘lơ̆ng hơiă lăm tơdrong pơm kơdranh gah tơdrong dŏng pơklaih đơ̆ng Kră Yang ăn kơ lu sư, krao khan yua anăn Kră Yang Yêsu Krist, Amen.
Bơ̆n hăm đĭ jơhngơ̆m krao apinh Yang Bơhngol ‘Lơ̆ng chông tơ’bôh lăm tơdrong tơ jê̆ bôl buăl kơplah bơtho Tơdrong ‘Nao ‘Lơ̆ng ưh?
Đŏk Sơ̆p Hla bơar ‘Bok Kei-Dei lăm pêng sơnăm: Nhơ̆m hmoi 4
Kênh Youtube BHKTHN:
