Klei Aê Diê Blŭ: Y-Mathiơ 28:18-20; I Kôrantô 9:19-23
Êlan kliăng: “Snăn hlăm jih jang klei kâo čiăng jing msĕ si jih jang mnuih, čiăng kơ hŏng jih klei anăn kâo dưi bi mtlaih đa đa hlăm phung diñu.” (I Kôrantô 9:22b)
Klei êmuh ksiêm mĭn: Ya ngă wah lač brei jing klei ngă êlâo hĭn hlăm bruă hiu hưn Klei Mrâo Mrang Jăk? Si klei Khua ƀĭng kna Y-Pôl jing leh jih jang klei kơ jih jang mnuih? Ya klei drei hriăm mơ̆ng klei Khua ƀĭng kna Y-Pôl bi hmô?
Hưn bi sĭt kơ klei Khua Yang bi mtlaih jing sa klei mtă klă sĭt kơ Phung Sang Aê Diê hlăm jih jang ênuk. Khua Yang Yêsu lač klă jih jang klei ktang myang hlăm adiê, ti lăn ala jao brei leh kơ Ñu, leh anăn Khua Yang tiŏ nao phung anak ƀuôn sang Ñu hiu hưn Klei Mrâo Mrang Jăk hlăm klei myang Ñu (Y-Mathiơ 28:19). Hiu hưn, bi hriăm leh anăn ngă ƀaptem brei ngă hlăm Anăn Aê Diê Tlâo Čô Yang. Bruă hiu hưn mâo Khua Yang dôk mbĭt nanao, kyuanăn, klei wah lač brei dưm êlâo hĭn kơ nao hiu hưn Klei Mrâo Mrang Jăk.
Klei Mrâo Mrang Jăk Khua Yang pioh brei kơ jih jang găp djuê mnuih. Khua Yang iêô mthưr anak ƀuôn sang Ñu brei mâo klei thâo mĭn čiăng ba jih jang mnuih brei mjing phung ƀĭng kna Khua Yang. Khua ƀĭng kna Y-Pôl jing sa rup bi hmô klă mngač. Čiăng ba Klei Mrâo Mrang Jăk truh kơ phung ƀuôn sang Israel, ñu ngă klei khăt klĭt kơ Y-Timôthê čiăng kơ phung Israel hlăm anôk anăn mơak, amâo ngă jhat, amâo hngah kơ Klei Mrâo Mrang Jăk ôh. Khua ƀĭng kna Y-Pôl thâo klă klei khăt klĭt jing klei bi mguôp ti krah Aê Diê hŏng phung ƀuôn sang Israel (Klei Mphŭn Dơ̆ng 17:9-12), ƀiădah amâo djŏ jing klei čoh čuăn dưi mâo klei bi mtlaih ôh (Rôm 4:10-12). Mâo sa blư̆ mkăn, Y-Tit, sa čô hlăk ai đru bruă kơ Khua ƀĭng kna Y-Pôl, jing sa čô Grek, wăt tơdah tŭ lu klei kpĭ mgô̆ ƀiădah Khua ƀĭng kna Y-Pôl khut khat hngah amâo ngă klei khăt klĭt kơ Y-Tit ôh (Galati 2:3-5).
Hŏng phung găp djuê tue, Khua ƀĭng kna Y-Pôl mâo hdră êlan mdê čiăng atăt ba digơ̆ kơ Khua Yang. Msĕ si mnơ̆ng ƀơ̆ng huă, phung Israel gưt klei bhiăn bi kah hlô mnơ̆ng doh hŏng hlô mnơ̆ng čhŏ (Bruă Lêwi 11), msĕ si ŭn, kan kêñ, tuôr, ƀriăng… jing mnơ̆ng ƀơ̆ng amâo doh snăn diñu amâo ƀơ̆ng ôh. Kyuanăn phung Israel amâo dôk gŭ ƀơ̆ng huă mbĭt hŏng phung tue ôh. Ƀiădah bi Khua ƀĭng kna Y-Pôl, wăt tơdah ñu jing sa čô Pharasi djă pioh klei bhiăn ktang, ñu dôk gŭ ƀơ̆ng huă mbĭt hŏng phung tue, kñăm čiăng mjĕ giăm, čiăng hưn bi sĭt Khua Yang kơ digơ̆. Mnơ̆ng ƀơ̆ng amâo doh hlăm Bruă Lêwi 11 amâo ngă bi čhŏ kơ klei hdĭp myang ôh. Ñu lač klă nik: “Kyuadah jih jang mnơ̆ng Aê Diê hrih leh jing jăk sơăi, leh anăn amâo mâo ôh mnơ̆ng brei arăng hngah tơdah ƀơ̆ng hŏng klei hdơr knga. Kyuadah hŏng klei Aê Diê blŭ leh anăn hŏng klei wah lač mnơ̆ng anăn jing doh jăk leh.” (I Y-Timôthê 4:4-5).
Grăp djuê ana mâo klei bhiăn, dhar kreh mdê mdê. Čiăng hưn bi sĭt kơ Khua Yang, brei drei jĕ giăm, êrô êbat hŏng phung drei iêô jak. Hŏng klei wah lač jih ai tiê, akâo kơ Yang Mngăt Jăk gĭt gai leh anăn ktrâo atăt mơ̆ng Klei Aê Diê Blŭ, drei srăng thâo kral ya kdrêč brei drei ñĕ đuĕ msĕ si klei đăo kơ mtâo ksơ̆k, kơ mjâo, klei mnăm kpiê sei, klei in jin…, leh anăn ya kdrêč drei dưi bi mguôp čiăng dôk hdĭp êđăp ênang hŏng phung drei iêô jak čiăng mâo mmông găl atăt ba digơ̆ kơ Khua Yang Yêsu.
Si ngă drei hŏng jih ai tiê akâo kơ Yang Mngăt Jăk atăt gai hlăm bruă mjĕ giăm hŏng phung ka đăo čiăng hưn lar Klei Mrâo Mrang Jăk mơ̆?
Wah lač: Ơ Khua Yang, akâo Khua Yang brei kâo mâo klei thâo mĭn tơdah mjĕ giăm hŏng mah jiăng, găp djuê, čiăng kơ kâo dưi tlaih kơ klei mneh msao leh anăn dưi mâo klei găl êlưih hlăm bruă hưn bi sĭt klei Khua Yang bi mtlaih kơ digơ̆. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Čŏk Hia 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
