I Kôrintô 1:10-16
“Ơ ‘nhŏng oh, inh wă bơtho iĕm thoi âu: Đĭ đăng kơ bơ̆n minh khŭl lui kơ Kră Yang Yêsu Krist, bơ̆n athei tơguăt băl minh jơhngơ̆m, pơm pôm ‘bơ̆r đon mă hơnơ̆ng wă kơ bơ̆n huay kơ tơklah băl.”
(I Kôrintô 1: 10)
Nơ̆r jet tơchĕng pơwao:
– Tơdrong anat blŭng a Khul Bơnga Lui Kôrintô noh kiơ?
– ‘Bok Pôl yua nơ̆r pơma tơdrong ayơ wă bơtho pơlung lu sư athei pôm ‘bơ̆r đon dih băl?
– Nơ̆r ‘bok Pôl bơtho pơlung tơ’blŏk kơ bơ̆n tơdrong kiơ?
Đang kơ nơ̆r pơma jet gia păng bơnê, ‘bok Pôl pơma hloi gah tơdrong hiơ̆k tơgŭm mă sư kơtơ̆ng đơ̆ng hnam dơnŏ yă Klôwê, ‘noh bơih khul bơngai lui Kôrintô đei tơdrong pơjah băl. Nơ̆r “pơjah băl” (trong 11). “tơklah” (trong 10, 13). Đei yua wă pơma hăm nơ̆r “pơm pôm ‘bơ̆r đon” păng “tơguăt băl minh jơhngơ̆m” (trong 10). ‘Bar nơ̆r ‘nâu wă pơma gah tơdrong hiôk dih băl lăm jơhngơ̆m păng nơ̆r pơma. Tơm tơdrong pơm kơ khul bơnga lui Kôrintô tơklah băl noh yua kơ lăm bơngai lui đei khan “Inh wă kiơ̆ Pôl, mơ’nah khan inh wă kiơ̆ Yêsu Krist” (trong 12). Tơdrong ‘nâu tơ’bôh bơngai lui wă kiơ̆ minh ‘nu bơngai bơtho tơdrong lui ayơ ‘nei na lu sư ưang, dah mă kiơ̆ bơngai mă pơm ‘batem kơ đe lơ hloh (trong 14-17).
‘Bơ̆t tơdrong pơjah băl noh,’bok Pôl tơlĕch ‘bar nơ̆r jet, păng đơ̆ng tơdrong noh tơgŭm kơ bơ̆n thoi hơnă tơ̆m wă kơ pôm jơhngơ̆m mă khan đei tơdrong phara: Mă minh, hăm trŏ Pôl dah bu lôch tang iĕm tơ ‘long pơglang noh? Mă ‘bar, đei iŏk ‘batem hăm anăn inh mơ̆n dah kiơ? Nơ̆r tơl kơ ‘bar nơ̆r jet ‘nâu wă kơ bơ̆n lăng kơ tơdrong gĭt kăl, noh athei pôm jơhngơ̆m đon tơplih kơ tơdrong tơklah. Phŏ phŏ kơplah oei pơjah băl, đei bơngai khan inh hơgei ‘biơ̆, đei rơih iŏk trŏ ‘biơ̆, hlôh băt gah tơdrong hŏk pơhrăm jrŭ hloh kơ bơngai nai, thoi noh hiơt lê̆ tơdrong ayơ mă gĭt găl hloh, tơdrong tơm lăm tơdrong lui bơ̆n.
Khul Bơngai Lui chăl sơ̆ wă jê̆ đei ‘bar rơbâu sơnăm mălei oei đei lơ wơ̆t tơklah băl yua kơ đơ̆ng tơdrong ưh kơ trŏ tơdrong tơm kăl Tơdrong ‘Nao ‘Lơ̆ng. Thoi kơ hlôh lu nơ̆r lăm Sơ̆p hla bơar ‘Bok Kei-Dei ưh kơ sĭ tơdrong tơm kăl hăm tơdrong dŏng pơklaih dah mă tơdrong arih sa, Sơ̆p hla bơar ‘Bok Kei-Dei ưh kơ pơma hơđăl; dah mă phara lăm tơdrong kơkuh, lu tơdrong hơri kơkuh, brŏ reh đei yua lăm tơdrong kơkuh; dah pơma hơđăl, dah mă đei ‘bơ̆r đon pơma hơgei.v.v… ‘Noh bơih tơm tơdrong tơklah lăm khul bơngai lui. Dah đei bu lăm lu bơ̆n đei jơhngơ̆m pơtŏ pơting, klah khul, lei na dôm nơ̆r jet mă ‘bok Pôl tơlĕch kơ khul bơngai lui Kôrintô ‘noh kư̆m nơ̆r jet mă ‘măn kơ bơ̆n dang ei: Hăm trŏ bơngai pơgơ̆r, dah tơdrong lui, dah mă tơdrong kơkuh .v.v… chu lôch tang bơ̆n tơ ‘long pơglang dah kiơ? Bơ̆n yua anăn bơngai pơgơ̆r, tơdrong lui, tơdrong kơkuh noh wă iŏk ‘batem dah kiơ? Đe tơklah kơ ‘Bok Krist dah kiơ? Hơpơi dôm lu nơ̆r jet ‘nâu tơ’blŏk kơ bơ̆n krăng kơchăng.
Kơkuh kơ Ih Kră Yang, apinh Ih tơgŭm inh lăng ‘bôh dôm lu tơdrong wă pơm tơklah băl lăm inh wă kơ inh tŭk lê̆. Apinh Ih ăn kơ inh pôm jơhngơ̆m đo, pôm ‘bơ̆r đon dih băl, đơ̆ng tơdrong noh wă kơ kon bơngai băt kơ lu nhôn jơ̆ bơngai kiơ̆ Ih. Krao khan yua anăn Kră Yang Yêsu Krist, Amen.
Bơ̆n kăl kơ pơm kiơ hŭt lê̆ tơdrong pơjah băl, tơklah băl hăm lu bơngai lui nai?
Đŏk Sơ̆p hla bơar ‘Bok Kei-Dei lăm pêng sơnăm: Jêrêmi 48
Kênh Youtube BHKTHN:
