Ntawv Nkauj 103:1-5
Nqe cim:
“Kuv lub siab, cia li qhuas tus TSWV thiab nco tsoov nws txiaj ntsig.” (Ntawv Nkauj 103: 2)
Lus nug sawvdaws xav:
– Vajntxwv Daviv rov hais nws tus kheej li cas thaum nws hu nkauj qhuas Vajtswv? Vim li cas?
– Qhov tseem ceeb tshajplaws, yog nws ua Vajtswv tsaug txog yam dabtsi?
– Peb yuav tsum ua Vajtswv tsaug rau yam twg?
Vajntxwv Daviv tau sau Ntawv Nkauj 103 los qhuas txog Vajtswv txoj kev hlub thiab txoj kev khuvleej. Nws thiaj hais rau nws tus kheej hais tias: “Kuv lub siab, cia li qhuas tus TSWV! Tagnrho kuv lub cev, cia li qhuas nws lub npe uas dawbhuv!” (nqe 1). Nws tsis yog tsuas qhia kev ua tsaug los ntawm tej haujlwm sab nraud xwb, tiamsis nws ua Vajtswv tsaug los ntawm nws tus ntsujplig thiab nws lub siab lub ntsws. Qhov kev ua tsaug ntawd puv npo nws cev nqaij daim tawv thiab tus ntsuj plig huv tibsi, nws hais tias: “Tagnrho kuv lub cev, cia li qhuas nws lub npe uas dawbhuv”. Tej lus ua tsaug zoo li ib qho timkhawv qhia meej txog tej uas Vajtswv twb ua nyob hauv Vajntxwv Daviv lub neej. Kev ua tsaug, kev hu nkauj qhuas, yog yam uas Vajntxwv Daviv pheej ua thaum nws xav txog Vajtswv tus moj yam dawbhuv thiab khuvleej, qhov ntawd yog lub zog loj thiab ruaj khov txhawb kom nws niaj hnub qhuas Vajtswv.
Vajntxwv Daviv ua Vajtswv tsaug hauv txhua seem, txij qhov uas Vajtswv cawm nws txojsia, pub nws muaj meejmom ua vajntxwv, pub tej yam zoo txaus nws siab, thiab pub rau nws rov muaj dag zog. Vajtswv txoj kev hlub rau nws loj heev uas tsis muaj leej twg suav tau. Lub neej qhuas Vajtswv qhia txog ib lub neej uas niaj hnub nco txog Vajtswv txoj kev hlub. Thaum tibneeg pib hnov qab Vajtswv txoj kev hlub ces lawv yuav tsawg kev ua Vajtswv tsaug thiab hu nkauj qhuas Nws. Hnov qab Vajtswv txoj koob hmoov yog thawj kauj ruam ua kom tibneeg txav deb Vajtswv, thiab coj kev puastsuaj los rau lub neej sab nqaij tawv thiab sab ntsuj plig.
Peb lub neej qee zaum nyob hauv kev kaj siab, qee zaum los kuj ntsib kev nyuaj siab thiab kev sim siab. Tej kev nyuaj ntawd ua rau peb qaug zog, thiab tej zaum ua rau peb hnov qab kev ua tsaug rau Vajtswv. Yog li ntawd, peb txhua tus yuav tsum niaj hnub qhuab ntuas tus kheej lub siab paub qhuas Vajtswv thiab ua Nws tsaug: “nco ntsoov Nws txiaj ntsig” (nqe 2). Feem ntau peb tsuas nco txog tej xwm txheej phem, thiab pheej yooj yim hnov qab tej xwm zoo, thiaj ua rau peb hnov qab Vajtswv txoj koob hmoov. Cia li tig los xav txog lub sijhawm muaj kev xyiv fab, koob hmoov yav dhau los, thiab ua tus Tswv tsaug txog tej ntawd. Cia peb ua Vajtswv tsaug txog tej uas peb tus txijnkawm, peb niam peb txiv, peb tej txheeb ze tau ua rau peb txhua xyoo dhau los. Tsis tas li ntawd xwb, peb yuav tsum ua Vajtswv tsaug rau tej khoom plig zoo uas Nws pub rau peb lub xyoo tas los. Qhov uas tseemceeb tshaj, peb yuav tsum ua Vajtswv tsaug rau yam khoom plig uas yog Vajtswv Leej Tub, Tswv Yexus Khetos, uas tau tuag txhiv peb kom peb tau nyob hauv Vajtswv lub xub ntiag mus ib txhis. Cia li cia Tswv Yexus ua tus tswj peb lub neej thiab txhua hnub peb yuav hais tau ib yam li Timthawj Paulus hais tias: “Peb cia li ua Vajtswv tsaug, rau qhov Vajtswv twb pub Vajtswv txoj koob hmoov uas muaj nqis kawg nkaus rau peb lawm” (II Kauleethaus 9:15).
Thov Vajtswv,
Tus Tswv, nyuam yaus ua Koj tsaug uas Koj tau muab Koj cov ntshav los cawm nyuam yaus, thiab pub txhua koob hmoov rau nyuam yaus lub xyoo tas los. Thov Koj qhuab ntuas nyuam yaus nco ntsoov ua neej paub ua Koj tsaug thiab paub faib Koj txoj koob hmoov rau lwm tus thiab. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb puas tau ua tsaug thiab qhuas txog Vajtswv kawg siab rau txhua yam koob hmoov uas Nws pub rau peb lawm tau?
Nyeem Vajluskub hauv peb lub xyoo: Yelemis 47
Kênh Youtube BHKTHN:
