I Petus 2:11-12
Nqe cim:
“Nej yuav tsum ua nej lub neej kom zoo, txawm yog cov neeg tsis ntseeg Vajtswv uas nrog nej koom zej koom zos nyob ua ke, lawv thuam hais tias nej ua phem los lawv yeej yuav pom tes haujlwm zoo uas nej ua thiab thaum txog hnub uas Yexus rov qab los lawv yuav qhuas Vajtswv.” (I Petus 2:12)
Lus nug rau sawvdaws xav:
– Vim li cas tus ntseeg yuav tsum tseg tsis ua tej uas lub siab nyiam ua?
– Vim qhov twg cov neeg thuam tus ntseeg muaj lub sijhawm qhuas Vajtswv?
– Qhov uas peb xav tau thaum ua neej nyob hauv lub ntiajteb no yog dabtsi?
Timthawj Petus qhia rau Vajtswv haivneeg txog kev ua neej kom coj tau ntau leej los ntseeg tus Tswv. Thawj qhov, Petus hais tias“nej tsis muaj tsev nyob hauv ntiajteb no, nej nyob ib yam li cov neeg uas taug kev tuaj ua qhua xwb” (nqe 11). Cov ntseeg ua neej nyob hauv lub ntiajteb no yog ib tug pejxeem nyob hauv tebchaws, tiamsis peb muaj feem ua pejxeem nyob saum ntuj. Txawm yog yuav nyob rau qhov twg, peb tsuas yog neeg ua qhua, tsis yog nyob mus li. Peb yuav tsum ua tiav feem xyuam ua pejxeem, khwv noj khwv haus tiamsis tsis yog yuav nyob hauv ntiajteb no mus li. Nyob hauv ntiajteb tiamsis tsis yog neeg ntiajteb. Yuav tau caiv, tsis ua, qaij deb tej uas lub siab nyiam ua, ntawd yog tej uas lub siab ntshaw ua txhaum, tej yam uas tawmtsam sab ntsujplig uas twb tau Vajtswv ntxuav dawbhuv lawm. Tej uas neeg lub siab nyiam ua yog: “Kev ua nkauj ua nraug, kev phem kev qias thiab ua dog ua dig, pe dab pe mlom, ua neeb ua yaig, ua yeebncuab, sib ceg sib ntaus, sib khib, sib chim, xav ua tus hlob, sib faib ua pab ua pawg, ntshaw luag ntug, quav yeeb, quav tshuaj, quav cawv, qw ua nqaj ua nqug thiab ua ntau yam uas zoo li tej no” (Kalatias 5:19-21).
Hnub thaud kuj ib yam nkaus, tus ntseeg Vajtswv pheej raug lwm haivneeg thuam. “Lwm haivneeg” yog hais txog cov neeg uas tsis muaj kev sib raug zoo nrog Vajtswv. Qhov uas yuav tawmtsam yeej yog Vajtswv haivneeg yuav tsum ua neej rau cov neeg ntawd pom tias cov ntseeg ua lub neej hloov tshiab ncaj ncees nyob nrog lawv. Neeg txojkev xav thaum raug thuam mas yog pheej teb, tiamsis Tswv Yexus qhia tias muab qhov ntawd saib kom pheej tshaj: “Yog neeg ntiajteb ntxub nej, nej yuav tsum nco ntsoov hais tias, lawv twb xub ntxub kuv ua ntej lawm. Yog nej nyiam ua raws li neeg ntiajteb ua, ces neeg ntiajteb yuav hlub nej. Tiamsis nej tsis nyiam ua raws li neeg ntiajteb ua, rau qhov kuv twb xaiv nej tawm hauv lub ntiajteb no lawm; yog li ntawd, neeg ntiajteb thiaj li ntxub nej” (Yauhas 15:18-19). Thaum peb ua neej nyob nrog cov neeg thuam peb, lub sijhawm yuav qhia rau lawv paub tias peb qhov kev ua txawv lawv li cas, thiab txog lub sijhawm Vajtswv yuav hloov lawv lub siab, lawv yuav muaj kev xav tshiab thiab qhuas Vajtswv tus uas peb pehawm.
Muaj neeg hais tias, cov ntseeg ua neej zoo li neeg ruam, “noj mov ntiajteb, hais lus saum ntuj”. Tiamsis peb yog haivneeg dawbhuv, yog Vajtswv haivneeg, ua neej nyob hauv lub ntiajteb ib ntus, qhov tseemceeb yog yuav tsum ua neej ncaj ncees kom tej neeg sawvdaws pom thiab paub Vajtswv. Vam thiab cia siab tias txog hnub kawg yuav muaj neeg nrog peb tau mus nyob hauv Vajtswv lub tebchaws. Qhov no yog cov ntseeg lub tebchaws tseeb.
Thov Vajtswv,
Vajtswv tus muaj kev hlub, ua tsaug Koj cawm nyuam yaus, pub nyuam yaus tau ua Koj haivneeg dawbhuv. Thov Koj pab nyuam yaus ua neej haum Vajtswv siab, ua neej ncaj ncees rau ntiajteb pom thiab qhuas Vajtswv. Nyuam yaus tuav Tswv Yexus lub npe thov, Amees.
Ib tsoom mloog uas hmov thiab tshua,
Peb qhia tshwm lub neej ncaj ncees nyob hauv ntiajteb no zoo li cas?
Nyeem Vajluskub hauv peb xyoo: Yelemis 34
Kênh Youtube BHKTHN:
