Blŭng a 2:1-3
“Năr mă tơpơh Kră Yang ‘Bok Kei-Dei pơm keh boih dôm tơdrong jang Sư.” (Blŭng a 2:2)
Nơ̆r jet tơchĕng pơwao:
– Yua kơ kiơ Kră Yang pơdơh kơ jang lăm năr mă tơpơh?
– Bơ̆n hŏk iŏk tơdrong kăl kiơ gah tơdrong bơ̆ jang păng pơdơh kơ jang?
– Pơm thoi yơ wă kơ gah tơdrong bơ̆n jang hăm tơdrong bơ̆n pơdơh noh sư hơtŏ hơnơ̆ng, lăm chăl arih bơ̆n dang ei ‘nâu hrăt hrot lơ tơdrong jang?
Đơ̆ng rŏng kơ pơjing plĕnh teh hăm tôm tơmam tơ kơpal plĕnh, tơ ala teh, Kră Yang pơdơh kơ jang lăm năr mă tơpơh. Sư pơdơh kơ jang ‘nâu ưh kơ trŏ gleh lap bơih na pơdơh ôh, mă-lei yua kơ Sư khŏm pơdơh ‘mơ̆i.Sơ̆p Hla bơar ‘Bok Kei-Dei tơ’bôh kơ bơ̆n khan Sư pơdơh kơ jang đơ̆ng rŏng kơ “jang tơdrong jang Sư keh đang bơih” (tr.2). Đang kơ Sư pơjing tôm tơdrong,tôm tơmam bơih, “ ‘Bok Kei-Dei lăng dôm tơmam đêl Sư pơjing noh ‘lơ̆ng dêh.” (Blŭng a 1:31). Truh tơ năr mă tơpơh, Kră Yang pơdơh kơ jang yua kơ tơdrong Sư pơjing đĭ-đăng tơmam noh ‘lơ̆ng dêh bơih, tôm dêh bơih; na bơ̆n hlôh tơdrong noh thoi âu: pơdơh ‘nâu bơih Sư wă tơ’bôh kơ bơ̆n tơdrong ‘lơ̆ng dêh lăm tơdrong Sư jang pơjing noh.
Kră Yang ưh kơ kăl kơ pơdơh ôh, mălei Sư rơih iŏk pơdơh noh wă pơm ăn kơ bơ̆n trong, wă kơ bơ̆n lăng đêl sư pơm noh, thoi âu: Jang gleh bơih, đei pơdơh hiôk, đơ̆ng rŏng kơ pơdơh pơtrơp jang dơ̆ng. Bơ̆n bơ̆ jang noh ‘lơ̆ng dêh, bơ̆n pơdơh ngôi kư̆m ‘lơ̆ng lei lăi thoi noh mơ̆n. Tơdah jang brot hloi pă đei pơdơh bơih lei jơhngơ̆m pran kon bơngai bơ̆n gô pă kĕ, ưh kơ pôm pă kĕ noh đĕch ôh, mă-lei jang pă pơdơh hloi thoi noh tơ’bôh bơ̆n dang drap kơkuh kơ tơdrong jang sa noh hloi bơih, tơ’bôh tơdrong bơ̆n dan tơdrong jang sa noh tơm lăm chăl arih bơ̆n hloi bơih dĭng mah tơdrong jang sa tơgar đĭ jơ năr truh tơ jơhngơ̆m pran bơ̆n hloi.
Kon bơngai bơ̆n nŏng kơ jang rim năr yua kơ mưh ưh kơ jang kơnh hli kơ tơmam bơ̆n wă yua sa lăm chăl arih ‘nâu ưh kơ mah na tơdrong noh tơ’bôh kon bơngai bơ̆n ưh kơ lui gơnang tơpă kơ tơdrong ‘lơ̆ng Kră Yang.
Na tơdah bơngai ayơ pôm pơdơh ngôi hiôk hloi đĕch ưh kơ jang hloi lei sư‘noh bơngai nơng, bơngai alah kơ jang. Tơdrong pơdơh noh ‘lơ̆ng ‘bơ̆t dâu: Đơ̆ng rŏng kơ jang bơih na bơ̆n pơdơh ngôi, ‘noh bơih ‘lơ̆ng ‘nei.
Tơpă sư, Kră Yang ưh kơ pôm pơdơh kơ jang lăm năr mă tơpơh đĕch ôh, Sư kư̆m “tuh pŭn hiôk ăn kơ năr mă tơpơh noh, dan ăn anăn khan năr ‘lơ̆ng rơgoh”(tr.3). Tơdrong pơdơh ‘nâu thoi tơmam gĭt mă Kră Yang ăn đĕch kơ bơ̆n, na wă kơ đei yua tih ăn kơ bơ̆n noh bơ̆n athei yua tơdrong pơdơh ‘nâu wă pơpôi jơhngơ̆m bơ̆n hnhoi lăng tơ Kră Yang Tơ’ngla mă ăn tơdrong pơdơh hiôk ‘nâu. Năr pơdơh gô ưh kơ layơ ‘lơ̆ng rơgoh tơdah jơhngơ̆m kon bơngai bơ̆n ưh kơ hnhoi lăng tơ Kră Yang ‘Lơ̆ng Rơgoh, ưh kơkuh kơ Sư. Tơdrong arih kon bơngai lăm teh đak âu rai hơgei, kon bơngai bơ̆n kang rai hrăt hrot kơ tơdrong jang. Dang ei, jơ năr mă Kră Yang ăn kơ kon bơngai bơ̆n ‘nâu, kon bơngai pơtŏ jơ năr hăm jên tơmam.Mưh bơ̆n pơtŏ jơ năr hăm jên tơmam lei bơ̆n lăng năr pơdơh ‘nâu năr tơhiong lê̆ jên tơmam noh. Yua kơ thoi ei bơih na lơ bơngai tơchĕng “ pôm jang kơ ‘năr đĕch ưh tam mă tôm mah ‘mơ̆i tơmam wă yua sa, na khŏm yua iŏk jơ jang kơmăng hai dơ̆ng, truh tơ jang ok hloi lăm năr tơpơh trŏ kơ ‘măn pơdơh ră.”
Kon bơngai hrăt hrot dêh kơ tơdrong jang sa chă jên tơmam khan hơpơi wă kơ tơdrong arih ‘lơ̆ng ‘biơ̆, mă-lei mă tơpă sư, kang rai đunh kang rai kơnê̆ hloh ưh kơ thoi bơ̆n hơpơi wă noh. Bơ̆n hăt nŏng dêh kơ jang noh, lĕch sư kang kơnê̆ thoi ‘noh hei, mă-lei mưh bơ̆n jang gleh na đei pơdơh ngôi hai ‘biơ̆ lei ‘noh bơih bơ̆n arih trŏ lăp hăm tơdrong arih mă ‘Bok Kei-Dei đei dan hơmet ăn kơ bơ̆n bơih wă kơ bơ̆n arih thoi noh. Ăp mă bơ̆n băt kơnăl tơpă kơ Kră Yang,Tơ’ngla mă hơtai oei wei pơgơ̆r tôm tơdrong, lui tơpă thoi ‘nei ‘mơ̆i na bơ̆n gơh pơdơh kơ jang, pơdơh hăm jơhngơ̆m rơngei hiôk huay kơ đei hli hiơ̆k, huay kơ tơtok tơtăm kiơ.
Ơ Kră Yang, inh hlôh kơ tơdrong pơdơh kơ jang ‘nâu, noh bơih thoi tơmam pŭn hiôk mă Ih ăn đĕch kơ inh.Apinh Ih tơgŭm inh pơnam kơ jang păng đei pơdơh ngôi ‘biơ̆ mă khan chăl arih đei tơdrong jang hrăt hrot hĭ dang yơ. Apinh Ih tơgŭm inh băt lui gơnang kơ Ih Tơ’ngla Pơjing ‘Lơ̆ng dêh, huay kơ gơnang kơ jơhngơ̆m kĕ pran inh kơdih. Apinh Ih tơgŭm năr tơpơh mă inh pơdơh kơ jang ‘nâu noh năr ‘lơ̆ng rơgoh, năr pŭn hiôk kơplah inh pơpôi jơhngơ̆m hnhoi tơ Ih, kơkuh kơ Ih. Inh krao khan yua anăn Kră Yang Yêsu Krist, Amen!
Kră Yang Tơ’ngla pơgơ̆r tôm tơdrong, pơgơ̆r năr tơpơh, pơgơ̆r ‘lơ̆ng, bơ̆n hăm lui gơnang kơ tơdrong Sư pơgơ̆r’lơ̆ng noh ưh wă kơ bơ̆n pơdơh lăm năr tơpơh pơpôi jơhngơ̆m hnhoi tơ Sư, kơkuh kơ Sư?
Đŏk Sơ̆p hla bơar ‘Bok Kei-Dei lăm pêng sơnăm Jêrêmi 30
Kênh Youtube BHKTHN:
