I Hơ’mon 16:7-15, 23-29
“Păng lăm năr noh kơnh lu iĕm gô khan: Hơri bơnê bĕ kơ Kră Yang; krao khan bĕ kơ Anăn Sư, năm ră roi bĕ dôm tơdrong jang Sư kơ rim adrĕch adrŭng bơngai, roi bĕ Anăn Kră Yang Sư bơih mă bơ̆n athei ư-ang” ( Êsai 12:4)
Nơ̆r jet tơchĕng pơwao:
– Đawit đei pơm kiơ hơdrol tung Hom Pơgơ̆p brŏk tơ Pơlei Jêrusalem?
– Lăm ‘bai hơri, sư krao pơtơm kon pơlei bơnê kơ Kră Yang tơdrong kiơ?
– Lu bơ̆n juăt bơnê kơ Kră Yang tơdrong kiơ rim wơ̆t bơ̆n krao khan?
‘Bok Đawit jơ̆ minh ‘nu bơngai wei triu đơ̆ng Kră Yang rơih pơm pơtao kon pơlei Isơrael. Lăm năr tung iŏk Hom Pơgơ̆p brŏk tơ Pơlei tih, sư đei hiôk chơt chih ‘bai hơri kơkuh kơ Kră Yang mơ̆ng hiôk dêh păng đei tơdrong bơtho wă kơ khul hơri, hơri bơnê kơkuh kơ Kră Yang. Lăm noh, ưh kơsĭ sư pôm bơnê kơ Kră Yang đĕch mălei sư bơtho tơ’bôh dôm tơdrong wă kơ kon pơlei Kră Yang pơm tơ’bôh jơhngơ̆m băt bơnê kơ Kră Yang, păng sư krao pơtơm lu sư athei pơm kiơ̆.
Blŭng a, sư krao pơtơm kon pơlei athei tơchĕng pơwao, tơ’blŏk dơ̆ng, păng wă kơ ‘blŏk ling-lang “dôm tơdrong jang mơsêh”, hlĭch chrơp Kră Yang đei pơm, kư̆m thoi đĭ-đăng dôm wơ̆t Sư đei tơdrong dŏng pơklaih, bơtho pơjĭ kon pơlei Sư (tr.8-9,13-15). Tơ’blŏk dơ̆ng dôm tơdrong kiơ đei truh wă tơgŭm lu bơ̆n băt nhen dôm tơdrong mơsêh păng pŭn hiôk đơ̆ng Kră Yang ăn lăm chăl arih bơ̆n. Bơngai chih Hơri So đei mơn băt tơdrong âu kơplah lu sư tơ’blŏk kơdih: “Inh tơ’blŏk dơ̆ng kơ dôm tơdrong jang Kră Yang,inh ‘blŏk dơ̆ng kơ lu tơdrong mơsêh hlĭch Ih pơm sơ̆, inh kư̆m gô tơchĕng kơ tơdrong Ih pơm bơih păng oei tơchĕng kơ lu tơdrong jang hlĭch Ih noh” (Hơri So 77:11-12). Mă ‘bar, hăm jơhngơ̆m bơnê kơ Kră Yang, pơtao Đawĭt bơtho athei bơnê kơ Kră Yang athei kơkuh păng hơri bơnê kơ Sư (tr.9,23). “Ơ bơhngol inh hơri bơnê bĕ kơ Kră Yang ‘nĕ hiơt dôm tơdrong ‘lơ̆ng Sư pơm” ( Hơri So 103:2). Mă pêng, sư bơtho kon pơlei athei roi ăn kơ bơngai kơtơ̆ng dôm “tơdrong mơsêh hlĭch” đei pơm tơ’bôh ăn kơ lu sư “Yua kơ Kră Yang tih krưp tơpă, trŏ kơkuh bơnê. Trŏ kơ hli yom hloh kơ đĭ-đăng lu yang. Yua kơ đĭ-đăng yang lu kon pơlei chă pơm lu rup đĕch. Mă lei Kră Yang pơjing lu tăl plĕnh ( tr.25-26). Pơm tơ’bôh tơdrong pŭn hiôk Kră Yang ‘noh jơ̆ minh tơdrong ‘lơ̆ng dêh, wă pơm tơ’bôh jơhngơ̆m băt bơnê kơ Kră Yang. Mă hơtuch, sư krao pơtơm đĭ-đăng bơngai băt bơnê kơ Kră Yang hăm tơdrong “ chĕp ba bĕ tơmam soi pơyơ̆r ‘bơ̆t anăp Sư; kơkuh pơyom bĕ kơ Kră Yang lăm tơdrong ‘lơ̆ng rơgoh Sư” (tr.29), wă khan pơyơ̆r chăl arih bơ̆n pơm tơmam soi arih păng ‘lơ̆ng rơgoh wă bơnê kơ Kră Yang (Rôm 12:1).
Năr adrol, Êsai bơngai khan lê̆ adrol krao pơtơm kon pơlei “Athei bơnê kơ Kră Yang; athei krao apinh hăm anăn Sư; athei ră roi tơdrong jang Sư tơlăm lu adrĕch adrung! Athei pôk pơư Anăn Sư ‘noh jơ̆ tơdrong pơyom” ( Êsai 12:4). Lăm tơdrong krao khan ưh kơ kơ’bah lăm nơ̆r bơnê kơ Kră Yang lu bơ̆n athei mă tơpă wơ̆t lăng wă kơ’bôh dôm tơdrong pŭn hiôk đơ̆ng Kră Yang ăn kơ bơ̆n, hnam dơnŏ,păng Khul Bơngai Lui, wă kơ ‘maih pơyơ̆r kơ Kră Yang jơ’năr, jơhngơ̆m pran, păng đĭ chăl arih bơ̆n nhen thoi tơmam soi bơnê kơ Kră Yang. Athei bơnê kơ Kră Yang hăm lơ tơdrong noh ưh kơsĭ kơ nơ̆r Sư tơtă đĕch mă ‘noh jơ̆ pơm kiơ̆ thoi Kră Yang ‘Bok Kei-Dei wă lăp đon lăm Kră Yang Yêsu Krist (I Têsalônik 5:18).
Ơ ‘Bă mă ‘mêm kơeng! Kơplah ‘blŏk kơ tơdrong pŭn hiôk đơ̆ng ‘Bă ăn, inh bơnê kơ ‘Bă, jơ̆ Kră Yang ‘mêm mơnat, huay kơ ‘bônh kơblĕk păng mơsêh pran kơtang. Inh wă yua đĭ nơ̆r pơma, đon tơchĕng păng chăl arih inhpơm tơmam soi bơnê pơyơ̆r kơ ‘Bă! Yua anăn Kră Yang Yêsu Krist, Amen.
Lu bơ̆n hăm ling-lang lăng dơ̆ng dôm tơdrong kiơ Kră Yang ăn kơ bơ̆n wă pơyơ̆r nơ̆r bơnê kơ Kră Yang ưh?
Đŏk Sơ̆p Hla ar ‘Bok Kei-Dei lăm pêng sơnăm: Jêrêmi 27
Kênh Youtube BHKTHN:
