Klei Aê Diê Blŭ: I Klei Yăl Dliê 16:7-15, 23-29
Êlan kliăng: “Hlăm hruê anăn ih srăng lač: “Bi mni bĕ kơ Yêhôwa, iêô wah lač kơ anăn Ñu; yăl dliê bĕ bruă Ñu ngă ti krah phung găp djuê mnuih; hưn bĕ anăn Yêhôwa mâo klei mpŭ.” (Y-Êsai 12:4)
Klei êmuh ksiêm mĭn: Ya bruă Y-Đawit ngă leh tơdah ba Hip Klei Bi Mguôp wĭt kơ Yêrusalem? Hlăm klei mmuñ, kơ ya klei ñu iêô mthưr phung ƀuôn sang bi mni kơ Khua Yang? Kơ ya klei drei khăng bi mni kơ Khua Yang grăp blư̆ wah lač?
Y-Đawit jing sa čô mgăt biăp Aê Diê ruah brei jing mtao kơ phung ƀuôn sang Israel. Hlăk mmông ba wĭt Hip Klei Bi Mguôp kơ ƀuôn prŏng, ñu hơ̆k mơak čih klei mmuñ mpŭ mni kơ Khua Yang bŏ hŏng klei êlam mbĭt hŏng lu klei mblang čiăng kơ êpul mmuñ, mmuñ bi mni kơ Khua Yang. Hlăm anăn, ñu amâo knŏng bi mni kơ Khua Yang ƀiădah wăt mtô kơ phung ƀuôn sang hdră êlan bi êdah ai tiê hdơr knga bi mni kơ Khua Yang, leh anăn ñu iêô mthưr phung ƀuôn sang ngă hlue.
Êlâo hĭn, ñu iêô mthưr phung ƀuôn sang ksiêm mĭn bĕ, lŏ hdơr wĭt, leh anăn djă pioh nanao hlŏng lar jih “bruă yuôm bhăn”, bruă myang Khua Yang ngă leh, mbĭt hŏng jih jang blư̆ Ñu bi mtlaih, mkra mjuăt leh phung ƀuôn sang Ñu (êlan 8-9, 13-15). Lŏ bi hdơr jih jang klei truh găn leh đru drei thâo kral klei myang leh anăn klei jăk jĭn Khua Yang ngă leh kơ klei hdĭp drei. Pô čih Klei Mmuñ Hđăp thâo kral leh klei anei hlăk diñu lŏ mñă diñu pô: “Kâo srăng hdơr kơ bruă Yêhôwa; sĭt nik kâo srăng hdơr kơ bruă yuôm bhăn Ih mphŭn dô. Kâo srăng mĭn kơ jih bruă Ih ngă leh, leh anăn ksiêm kơ klei Ih ngă leh.” (Klei Mmuñ Hđăp 77:11-12). Tal dua, hŏng ai tiê thâo hdơr knga kơ Khua Yang, Mtao Y-Đawit mtă mtăn brei bi mni bĕ kơ Khua Yang hŏng klei kkuh mpŭ leh anăn mmuñ bi mni Ñu (êlan 9, 23). “Ơ mngăt kâo, hơêč hmưi bĕ kơ Yêhôwa, leh anăn đăm wơr bĭt ôh jih klei jăk Ñu ngă.” (Klei Mmuñ Hđăp 103:2). Tal tlâo, ñu mtô phung ƀuôn sang yăl dliê bĕ kơ mnuih mkăn hmư̆ jih “bruă yuôm bhăn” Khua Yang ngă leh čiăng hưn bi sĭt kơ diñu snei “Kyuadah Yêhôwa jing prŏng, năng sĭt kơ arăng bi mni, leh anăn ñu jing năng kơ arăng huĭ mpŭ hĭn kơ jih jang phung yang. Kyuadah jih jang yang phung ƀuôn sang jing knŏng rup krah, ƀiădah Yêhôwa mjing leh adiê.” (êlan 25-26). Hưn bi sĭt klei pap Khua Yang jing sa hdră jăk siam hĭn čiăng bi êdah ai tiê thâo hdơr knga kơ Khua Yang. Knhal tuč, ñu iêô mthưr jih jang mnuih bi mni kơ Khua Yang hŏng klei “Yap bĕ jing dŏ Yêhôwa klei guh kơang djŏ kơ anăn ñu; djă ba bĕ mnơ̆ng myơr leh anăn hriê ti anăp ñu! Kkuh mpŭ kơ Yêhôwa hŏng kdrăp doh jăk.” (êlan 29), mblang jing klei myơr klei hdĭp pô jing mnơ̆ng myơr ngă yang hdĭp leh anăn doh jăk pioh bi mni kơ Khua Yang (Rôm 12:1).
Hlăk êlâo, khua pô hưn êlâo Y-Êsai iêô mthưr phung ƀuôn sang, “Hlăm hruê anăn ih srăng lač: “Bi mni bĕ kơ Yêhôwa, iêô wah lač kơ anăn Ñu; yăl dliê bĕ bruă Ñu ngă ti krah phung găp djuê mnuih; hưn bĕ anăn Yêhôwa mâo klei mpŭ.” (Y-Êsai 12:4). Hlăm klei wah lač amâo dưi kƀah ôh klei bi mni kơ Khua Yang. Brei drei hŏng ai tiê sĭt kpă lŏ dlăng wĭt čiăng thâo ƀuh jih klei jăk jĭn Khua Yang brei leh kơ drei pô, kơ gŏ sang drei leh anăn kơ Phung Sang Aê Diê, čiăng kăp myơr kơ Khua Yang hruê mmông, ai ktang, leh anăn wăt klei hdĭp pô jing sa mnơ̆ng myơr ngă yang bi mni Ñu. Bi mni bĕ kơ Khua Yang hŏng lu hdră êlan, kyuadah klei anăn amâo knŏng jing klei mtă ƀiădah wăt jing klei Aê Diê čiăng hlăm Khua Yang Yêsu Krist (I Têsalônik 5:18).
Si ngă drei lŏ dlăng wĭt nanao mơ̆ kơ jih jang klei Khua Yang brei leh kơ drei, čiăng myơr klei bi mni kơ Khua Yang?
Wah lač: Ơ Ama kâo khăp! Tơdah hdơr wĭt kơ klei jăk jĭn Ama brei, kâo lač jăk kơ Ama êdimi, Aê Diê klei jăk, amâo djăl ăl ôh leh anăn ktang myang. Kâo ƀuăn yua kluôm jih ƀăng êgei, klei mĭn leh anăn klei hdĭp kâo jing mnơ̆ng myơr ngă yang bi mni myơr kơ Ama! Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yêrêmi 27
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
