II Xwmtxheej 33:21-25
Nqe cim:
“Tsis txhob khav rau tagkis. Koj twb tsis paub hais tias thaum tseem tsis tau txog tagkis yuav muaj xwm dabtsi.” (Pajlug 27:1)
Lus nug rau sawvdaws xav:
– Vajntxwv Amoos zoo thooj thiab txawv nws txiv qhov twg?
– Qhov teebmeem uas vajntxwv tau txais yog dabtsi?
– Peb kawm tau zaj kawm dabtsi txog Vajntxwv Amoos lub neej uas luv luv?
Vajntxwv Amoos kav tebchaws thaum nws muaj nees nkaum ob xyoos, thiab tsuas kav tau ob lub xyoos xwb. Vajntxwv Amoos ua txhaum rau tus Tswv ib yam li nws txiv Manaxes ua ntag, thiab nws pe tej mlom uas nws txiv pe. Tiamsis txawv nws txiv Manaxes, Vajntxwv Amoos tsis txo hwjchim tabmeeg tus Tswv tiamsis tseem ua txhaum ntau zuj zus xwb. Vim li ntawd, Vajntxwv Amoos thiaj tsis tau tus Tswv nyob nrog thiab foom koob hmoov zoo li nws txiv uas yog Vajntxwv Manaxes thaum tig rov los cuag tus Tswv. Txawm Vajntxwv Manaxes raug ntes coj mus ua qhev nyob hauv tebchaws Npanpiloos, los thaum nws lees txim thiab txo hwjchim tabmeeg tus Tswv, ces nws tau tus Tswv cawmdim, tso rov los ua vajntxwv kav hauv nroog Yeluxalees dua. Tshuav Vajntxwv Amoos tsis kam txo hwjchim tabmeeg tus Tswv, txawm yog nws nyob hauv qhov chaw tau zoo, los nws tseem raug nws cov neeg ntxeev siab tua tuag hauv nws lub tsev vajntxwv.
Txawm tias Vajntxwv Manaxes twb siv zog hloov tej yam phem uas thaum ub nws ua, los nws yeej tseem muaj kev cuam tshuam phem rau cov pejxeem (II Xwmtxheej 33:17), thiab rau nws tus tub uas yog Amoos. Thaum tseem ua neej, Vajntxwv Amoos yeej muaj caij nyoog los txo hwjchim tabmeeg tus Tswv xws li nws txiv tus qauv, tiamsis nws yeej xaiv taug nws txiv txoj kev phem thaum ub. Thaum nws xaiv taug kev phem, ces nws yeej xaiv Vajtswv txoj kev txiav txim rau nws lawm thiab ntag (II Xwmtxheej 7:19-20). Vajtswv txoj kev txiav txim tau los raug Vajntxwv Manaxes tomqab uas nws twb kav tau ntau xyoo lawm, tiamsis Vajtswv txojkev txiav txim los raug Vajntxwv Amoos tsuas yog tomqab nws kav tau ob lub xyoos xwb. Vajntxwv Amoos tsis muaj sijhawm ntev li nws txiv kom hloov siab lees txim, thiab nws tau plam mus ibtxhis. Zaj uas sau txog Vajntxwv Amoos lub neej luv luv no qhia rau peb pom tias tibneeg yeej muaj cai xaiv los mloog Vajtswv lossis tsis mloog, ua Nws tes haujlwm lossis tsis ua, tiamsis tsis yog txhua zaus puav leej muaj sijhawm rau tibneeg hloov siab tig rov los.
Vim lub siab khavtheeb thiab xav yuamkev ntawm lub neej hluas, thiaj ua rau Vajntxwv Amoos xav tsis txog hais tias nws yuav tau tso lub ntiajteb ntxov tas npaum ntawd. Tsimnyog pehawm tus Tswv uas yog nws txiv tus Vajtswv tseeb (II Xwmtxheej 33:13) tiamsis nws ho mus pehawm thiab teev tiam tej mlom tsis paub qabhau hauv ntiajteb. Yog tus Tswv haiv neeg, qee zaug peb kuj xav tias tseem tshuav sijhawm ntev heev mam txog hnub ntsib tus Tswv, tos txog thaum peb lub neej ruaj khov lossis thaum laus mam pib ua Vajtswv haujlwm, lossis peb ho ncua sijhawm tsis mus ua timkhawv rau ib tug twg… Qhov tseeb tiag mas tsis muaj leejtwg paub tias Tswv Yexus yuav rov los thaum twg thiab tsis muaj leejtwg paub txog yam uas yuav tshwm sim rau peb tus kheej. Peb kuj tsis paub tias tus uas peb xav ua timkhawv rau ntawd tseem tshuav pestsawg sijhawm hloov siab tig rov los cuag tus Tswv. Vim li ntawd, thov kom tsis txhob muaj leejtwg ncua sijhawm ntxiv lawm, peb cia li mus ua Vajtswv haujlwm tamsim no thiab rau siab tshajtawm Txojmoo Zoo sai li sai tau.
Thov Vajtswv,
Tus Tswv, thov Koj zam txim rau nyuam yaus txojkev ncua sijhawm ua Koj tes haujlwm thiab ua timkhawv txog Koj. Thov pab kom nyuam yaus muaj siab kub lug ua Koj haujlwm thiab tshajtawm Txojmoo Zoo txij hnub no mus kom tsis nkim lub sijhawm uas Koj pub. Nyuam yaus tuav Yexus Khetos lub npe thov, Amees.
Peb tabtom ua Vajtswv tes haujlwm lossis peb tabtom ua leejtwg tes haujlwm hauv peb lub neej uas luv luv no?
Nyeem Vajluskub hauv peb lub xyoos: Yelemis 16
Kênh Youtube BHKTHN:
