Klei Aê Diê Blŭ: II Klei Yăl Dliê 33:21-25
Êlan kliăng: “Đăm bi mni kơ hruê mgi ôh, kyuadah ih amâo thâo ôh ya srăng truh grăp hruê” (Klei Bi Hriêng 27:1)
Klei êmuh ksiêm mĭn: Si klei msĕ leh anăn mdê Mtao Amôn hŏng ama ñu? Ya boh jhat mtao tŭ? Si klei hriăm drei mâo mơ̆ng klei hdĭp bhiâo riâo rĭt Mtao Amôn?
Mtao Amôn đĭ ngă mtao hlăk dua pluh dua thŭn leh anăn knŏng kiă kriê dua thŭn. Msĕ hŏng Mtao Ama jing Y-Manasê, Mtao Amôn ngă klei ƀai ti anăp ală Yêhôwa, kkuh kơ rup yang mtao ama ngă leh leh anăn mă bruă kơ digơ̆. Ƀiădah mdê hŏng mtao ama, Mtao Amôn amâo bi ti gŭ pô ôh ti anăp Yêhôwa ƀiădah ngă soh ƀrư̆ hruê ƀrư̆ lu hĭn. Kyua anăn, Mtao Amôn amâo mâo Aê Diê dôk mbĭt leh anăn hơêč hmưi msĕ si ama ñu jing Mtao Manasê leh wĭt hŏng Aê Diê ôh. Mtao Manasê wăt tơdah arăng mă jing mnă ti Ƀaƀilôn ƀiădah tơdah kmhal klei soh, bi ti gŭ pô ti anăp Aê Diê snăn mâo Ñu bi mtlaih, brei wĭt ti Yêrusalem lŏ dơ̆ng jing mtao. Mtao Amôn amâo bi ti gŭ pô ti anăp Aê Diê ôh kyua anăn wăt tơdah dôk hlăm boh klei găl ênưih, lŏ tuôm hĕ hŏng phung roh bi kdơ̆ng bi mdjiê ti sang mtao mtam.
Wăt tơdah Mtao Manasê gĭr ngă mdê hŏng klei ƀai ngă leh êlâo dih, ƀiădah mtao ăt ba klei hmăi amâo jăk ôh kơ phung ƀuôn sang (II Klei Yăl Dliê 33:17), leh anăn hlăm klei hdĭp Anak êkei Mtao Amôn. Hlăm klei hdĭp pô, Mtao Amôn wăt tơdah mâo klei găl čiăng bi ti gŭ pô ti anăp Yêhôwa hlue si klei ama pô bi hmô ƀiădah mtao lŏ ruah ngă klei ƀai ama pô. Tơdah ruah ngă klei ƀai snăn mtao ăt ruah leh kơ pô klei Aê Diê phat kđi (II Klei Yăl Dliê 7:19-20). Klei phat kđi truh kơ Mtao Manasê tơdah jing mtao êbeh pluh thŭn, ƀiădah klei phat kđi truh kơ Mtao Amôn knŏng leh dua thŭn jing mtao. Mtao Amôn amâo mâo lu mmông čiăng kmhal msĕ si mtao ama ôh leh anăn bi luč leh mmông găl lă lar. Klei yăl dliê kơ klei hdĭp bhiâo riâo rit Mtao Amôn čih leh brei ƀuh arăng dưi ruah hlue si Aê Diê amâodah hơăi, mă bruă kơ Ñu amâodah hơăi, ƀiădah amâo djŏ ôh grăp mnĭt mmông ăt adôk mâo nanao mmông găl.
Mơ̆ng ai tiê mgao leh anăn klei hlơr phung mda asei ngă kơ Mtao Amôn amâo bi mĭn ôh ya ngă pô djiê hnưm msĕ snăn. Hrô kơ kkuh mpŭ kơ Aê Diê jing Aê Diê kpă ênô ama pô (II Klei Yăl Dliê 33:13) snăn mtao lŏ kkuh leh anăn mă bruă kơ rup yang hơăi mang ti lăn ala. Jing phung anak Aê Diê, drei ăt bi mĭn pô adôk sui snăk srăng bi tuôm hŏng Khua Yang, êla mâo klei hdĭp hơĭt kjăp amâodah khua thŭn kơh srăng mă bruă kơ Ñu, amâodah drei ăt srăng bi kdung kơ klei hưn Anăn Aê Diê kơ hlei pô… Klă sĭt amâo mâo pô thâo ôh hbĭl Yang Krist srăng lŏ hriê leh anăn ăt kăn thâo mơh ya klei srăng truh kơ pô. Drei ăt kăn thâo mơh mnuih pô mĭn tĭng srăng hưn klei đăo dôk mâo dŭm mmông găl čiăng kmhal klei soh wĭt hŏng Aê Diê. Kyua anăn, đăm mâo hlei pô bi kdung ôh, brei mă bruă kơ Aê Diê mtam leh anăn hur har hiu hưn Klei Mrâo Mrang Jăk knư̆ hnưm knư̆ jăk.
Drei dôk mă bruă kơ Aê Diê amâodah dôk mă bruă kơ hlei pô hlăm klei hdĭp bhiâo riâo rit anei?
Wah lač: Ơ Khua Yang, akâo kơ Ih pap brei klei kâo bi kdung mă bruă Khua Yang leh anăn klei đăo kơ Ih. Akâo kơ Ih đru kâo hur har mă bruă Ih leh anăn hiu hưn Klei Mrâo Mrang Jăk hruê anei mtam čiăng amâo bi luč ôh mmông găl Aê Diê brei. Kâo wah lač hlăm Anăn Khua Yang Yêsu Krist , Amen.
Dlăng Klei Aê Diê Blŭ hlăm tlâo thŭn: Y-Yêrêmi 16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
