Ntawv Nkauj 1:1-2
Nqe cim:
“Cov neeg uas tau koob hmoov yog cov uas tsis ua raws li cov neeg siab phem tej lus haub ntxias, thiab tsis xyaum ua raws li cov neeg txhaum ua lossis tsis nrog cov neeg uas tsis hwm Vajtswv koom ua ib lub siab. Tiamsis cov uas tau kev kaj siab yog cov uas hwm tus TSWV txoj Kevcai thiab kawm txoj kevcai ntawd nruab hnub hmo ntuj.” (Ntawv Nkauj 1:1-2)
Lus nug rau sawvdaws xav:
– Tus sau Phau Ntawv Nkauj tshooj ib qhia hais tias tus uas tau koob hmoov muaj tej yam dabtsi tshwjxeeb?
– Yam tshwjxeeb tshaj ntawm tus uas tau koob hmoov yog dabtsi?
– Kev xav thiab kawm Vajtswv txoj kevcai tseemceeb npaum licas nyob hauv peb lub neej?
Tus sau Phau Ntawv Nkauj tshooj ib qhia hais tias tus neeg tau koob hmoov yog tus uas tsis mloog cov neeg phem tej tswv yim, thiab tsis cia nws lub neej raug cuam tshuam rau neeg ntiajteb txojkev ua neej. Lawv tsis sawv ntawm cov neeg txhaum txojkev; tsis txhob txwm tawmtsam Vajtswv, tiamsis ncaj ncees taug tus Tswv txojkev. Lawv tsis hais tej lus thuam luag, thiab tsis zaum nrog cov uas hais lus thuam, tsis ua phoojywg thiab tsis koom nrog cov uas khav theeb hais saib tsis taus tus Tswv (nqe 1). Txawm lawv ntsib kev txomnyem, los lawv tseem cia siab rau Vajtswv ib yam li Yauj, txawm raug Xatas sim siab, raug pojniam hais tias: “Ua li cas koj tsis cem koj tus Vajtswv thiab tuag mus?!” Tiamsis Yauj muab tej lus ntawd suav ua lus ruam, thiab nws tseem tuav ruaj txojkev ntseeg rau Vajtswv (Yauj 2:9-10).
Yam tshwjxeeb tshajplaws ntawm tus uas tau koob hmoov yog nyiam Vajtswv txoj kevcai thiab xav txog txoj kevcai ntawd nruab hnub hmo ntuj (nqe 2). Raws li lawv, Vajtswv Txojlus yog yam qab zib, lawv nyiam kawm thiab xav txog, tsis yog raug yuam. Vajntxwv Daviv paub hais tias: “Hwm tus TSWV yog qhov uas zoo tshaj plaws, thiab nyob ruaj khov mus ibtxhis. Tus TSWV yeej txiav txim ncaj ncees thiab ua raws li qhov tseeb. Tej lus ntawd muaj nqis tshaj tej tseem kub, thiab tej lus ntawd qab zib tshaj tej tseem zib ntab” (Ntawv Nkauj 19:9-10). Tus uas tau koob hmoov mas ib txwm muaj kev sib raug zoo nrog Vajtswv dhau ntawm Nws Txojlus, cia Vajtswv tej kevcai coj txhua yam uas lawv xav, lawv ua, thiab lawv hais raws li Vajtswv Txojlus uas hais tias: “Koj txojlus zoo ib yam li lub teeb uas taws ua kuv ntej thiab ci rau kuv txoj haukev” (Ntawv Nkauj 119:105). Qhov no yog lub tswvyim uas pab kom lawv tsis qaug rau cov neeg phem tej tswv yim, ceev faj tej lus dag ntxias ntawm cov neeg limhiam; yog lub hauv paus thiab lub zog sab ntsujplig uas pab kom lawv tsis raws, tsis sawv, thiab tsis zaum nrog cov neeg txhaum.
Txawm yog tus uas tau Vajtswv foom koob hmoov yeej tseem qaug zog thiab txawj ua yuamkev, los lawv yeej tsis rov taug tus neeg txhaum txojkev lossis tsau tsawv hauv txojkev txhaum ntawd, tiamsis lawv niaj hnub cia Vajtswv Txojlus qhuab ntuas, txhim kho, hloov siab thiaj tau txais kev zam txim thiab tau nrog tus Tswv mus ntxiv kom tau Nws tej koob hmoov.
Tus ntseeg uas muaj kev ntseeg tseeb yuav hwm thiab hlub tus Tswv, xav nrhiav kev sib raug zoo nrog Nws. Lawv yuav tseg sijhawm tseemceeb, qhov chaw ntsiag to los nyeem thiab xav txog Vajtswv Txojlus. Qhov uas tseg sijhawm thov Vajtswv txhua hnub coj peb los nyob ze Vajtswv heev dua; tau Nws nyob nrog nraim, coj kev thiab pab cawm, kom peb txais tau tej koob hmoov zoo uas Nws pub.
Thov Vajtswv,
Tus Tswv! Nyuam yaus hlub Koj, cheem tsum Koj txoj kev pab hauv lub neej. Thov cia Koj Txojlus coj nyuam yaus txhua kauj ruam, cawm nyuam yaus dim ntawm cov neeg phem tej tswv yim, thiab txav deb ntawm txoj kev phem. Thov kom nyuam yaus tej kev xav, tej haujlwm thiab tej lus hais ua haum Koj lub siab nyiam tas mus li. Nyuam yaus tuav Yexus Khetos lub npe thov, Amees.
Peb puas tseg sijhawm los xav txog Vajtswv Txojlus txhua hnub?
Nyeem Vajluskub hauv peb lub xyoos: Yelemis 10
Kênh Youtube BHKTHN:
