Chivkeeb 1:28-31
Nqe cim:
“Vajtswv foom koob hmoov rau nkawd thiab hais tias: Neb cia li muaj tub muaj ki kom coob, neb tej xeebntxwv yuav huamvam mus nyob thoob plaws txhua qhov chaw kom puv ntiajteb thiab lawv yuav kav tagnrho lub ntiajteb. Kuv tsa neb kav tej ntses hauv hiavtxwv, tej noog uas ya saum nruab ntug, thiab txhua tsav yam tsiaj uas nyob hauv ntiajteb no.” (Chivkeeb 1:28)
Lus nug rau sawvdaws xav:
– Tom qab uas tsim tibneeg lawm, tus Tswv tau qhia dabtsi rau lawv?
– Nws tau pub txhua yam rau tibneeg lub neej licas?
– Peb yuav tsum ua neej raws li lub luag haujlwm uas tus Tswv muab rau peb li cas?
Tom qab uas tsim tibneeg lawm, tus Tswv tau muab ib lub luag haujlwm rau tibneeg, tsis hais txivneej thiab pojniam hais tias: “Neb cia li muaj tub muaj ki kom coob, neb tej xeebntxwv yuav huamvam mus nyob thoob plaws txhua qhov chaw kom puv ntiajteb thiab lawv yuav kav tagnrho lub ntiajteb. Kuv tsa neb kav tej ntses hauv hiavtxwv, tej noog uas ya saum nruab ntug, thiab txhua tsav yam tsiaj uas nyob hauv ntiajteb no” (nqe 28). Nyob hauv lub luag haujlwm no, peb pom tau hais tias: Qhov ib, tibneeg yuav tsum yug menyuam, ua kom neeg coob zuj zus thiab nyob puv thoob ntiajteb. Qhov no yog daim duab qhia txog kev muaj tub muaj ki coob, kev huamvam tsis tu ncua ntawm tej tsev neeg thiab zej zog. Qhov ob, tibneeg yuav tsum kov yeej thiab kav lub ntiajteb. Qhov no yog daim duab qhia txog ib lub qab ntuj uas muaj qib muaj quas, yog ib qho chaw tsimnyog rau txhua yam muaj sia loj hlob. Qhov peb, tibneeg yuav tsum kav txhua yam tsiaj, uas yog saib xyuas, tu thiab ua kom muaj kev huamvam hauv lub ntiajteb ntuj tsim.
Tus Tswv tsis yog tsuas muab ib lub luag haujlwm rau tibneeg xwb, tiamsis Nws tseem foom koob hmoov thiab npaj txhua yam uas tsimnyog rau lawv. Nyob hauv Vajtswv kev foom koob hmoov, Nws kuj pub zaub mov rau tibneeg noj yug lawv txojsia (nqe 29). Tej ntawd tsis yog zaub mov yug txojsia txhua hnub xwb, tiamsis tseemceeb dua, yog daim duab qhia tias tibneeg nyob hauv Vajtswv txojkev saib xyuas thiab kev tu. Hnub ntawd yog hnub rau uas Vajtswv tsim, thiab Nws pom hais tias yeej zoo kawg nkaus.
Tus Tswv xav kom cov uas yog Nws tus duab yuav tsum sawv cev rau Nws los kav lub ntiajteb, tswj txhua yam tsiaj txhu, thiab saibxyuas kom lub ntiajteb no tsis yog tsuas ua haujlwm zoo li ib txwm xwb, tiamsis tseem ua kom huamvam zuj zus mus ntxiv. Los ntawm qhov ntawd, Vajtswv uas yog Tus Tsim lub ntiajteb thiaj tau koob meej. Qhov no yuav tsum yog ib lo lus niaj hnub ceebtoom rau peb txhua tus kom peb ua neej raws li txoj hauj lwm uas yog tus saib xyuas, tu thiab pab tsim kho lub ntiajteb no, tsis yog ua neeg tsuas paub rau siab noj hnav kom txaus xwb. Pib ntawm tej haujlwm yooj yim xws li tsis txhob pov khoom liamsim lwj liam, txuag kev siv hluav taws xob, txuag chaw nyob, mus txog rau cov haujlwm tshwjxeeb xws li ua xibhwb qhia ntawv, kws ua tej tshuab, kws kho mob, tus ua zog, ua teb,… txhua tus yuav tsum ua tej haujlwm zoo tshaj plaws kom muaj nqis rau lub ntiajteb uas Vajtswv pub. Qhov ntawd yog tej hau kev tiag tiag uas peb yuav tsum ua kom tiav txoj haujlwm tswjhwm thiab tsim kho lub ntiajteb uas tus Tswv tau tsim.
Thov Vajtswv,
Tus Tswv, ua tsaug rau Koj uas Koj tau tsim nyuam yaus muaj lub luag haujlwm los tswjhwm thiab tsim kho lub ntiajteb no. Thov Koj pab nyuam yaus txhua hnub hauv tes haujlwm ntawm lub neej, thiab hauv tej kev sib raug zoo, kom txhua yam pab tsim kho lub ntiajteb uas Koj tau tsim. Nyuam yaus lub neej yuav tsum ua neej raws nraim txoj haujlwm uas Koj muab, kom lub ntiajteb no ib hnub ib zoo ntxiv mus, thiab Koj lub Npe thiaj tau tsa siab thoob plaws ntiajteb. Nyuam yaus tuav Yexus Khetos lub npe thov, Amees
Peb tabtom ua txoj haujlwm tswjhwm lub ntiajteb no licas nyob hauv peb lub neej txhua hnub?
Nyeem Vajluskub hauv peb lub xyoos: Yelemis 9
Kênh Youtube BHKTHN:
