I Pêtrôs 2:1-3
“Bơ̆n athei pơm thoi kon nge ‘nao tơpŭ, sư ling lang ‘maih kơ mŏm đak toh ngăl. Na iĕm kư̆m lei-lăi athei hưch-hanh kơdih kơdih ‘maih mơ̆ng tơdrong ‘lơ̆ng tơpăt ‘Bok Kei-Dei pơma, wă kơ iĕm rai đunh rai wơ̆ gah tơdrong Sư, na ning-mônh Sư gô iŏk iĕm. Yua kơ iĕm ‘bôh boih Kră Yang Yêsu Krist Sư ‘mêm mơnat kơ bơ̆n tơpă.” (I Pêtrôs 2:2-3)
Nơ̆r jet tơchĕng pơwao:
– Đơ̆ng rŏng kơ lui kơ Kră Yang, Sư pơm kơ jơhngơ̆m bơ̆n rơgoh, Bơngai Lui athei rơhing kơ tơdrong kiơ?
– Thoi yơ tơdrong arih minh ‘nu bơngai băt mơn ‘mêm kơ Kră Yang?
– Lu bơ̆n pơm thoi yơ wă kơ băt păng tơ’bôh tơdrong arih băt ‘mêm kơ Kră Yang?
‘Bok Pêtrôs đei bơtho lu bơngai lui mă arih tơklah băl phara tơ anih khan “chu lui kơ tơdrong ‘Bok Kei-Dei, bơ̆n băt kơ lê̆ đĭ tôm tơdrong yoch” (I Pêtrôs 1:22), “Thoi noh na bơ̆n ‘nĕ pă pơm dôm tơdrong kơnê̆, dôm tơdrong hơlĕnh pơdăr kơ đe, ‘nĕ kơ ‘nhĕng đe, ‘nĕ kơ bâu roi pơjăm đe.” (trong 1), na tơdrong gĭt kăl noh athei rơhing kơ nơ̆r Kră Yang thoi lu hơ’lơ̆p rơhing kơ đak toh.
Nơ̆r “dah” trong 3 blŭng a tơ’bôh kơ lu bơ̆n băt kơ tơdrong bơ̆n ‘mêm kơ Kră Yang. Nơ̆r “’Mêm” wă khan đêl mơn ‘mêm bơih. Mưh minh ‘nu băt ‘mêm kơ Kră Yang, mă tơ’bơ̆p tơdrong chơt hiôk dah ơh sơ’ngon mălei lăm jơhngơ̆m oei rơhing kơ nơ̆r Kră Yang păng chu kiơ̆ nơ̆r Sư ‘noh bơih trong wă kơ jơhngơ̆m gơh rơgoh đơ̆ng lăm tơdrong kơnê̆, tơdrong yoch. Tơdrong noh gơh đei kơplah bơngai noh băt kơnăl kơ pơlei bơ̆n oei tơ teh đak âu pơlei ưh kơ đei sot ôh, “Tơdrong noh kư̆m thoi đe chih lê̆ tơ lăm sơ̆p hla bơar Sư thoi âu: “Đĭ đăng kon bơngai thoi lĕ kơ hla ‘nhĕt, tơdrong ‘lơ̆ng rŏ sư thoi lĕ kơ pơkao ‘nhĕt. ‘Nhĕt sư jing jô, pơkao sư gô đum hơlŭng,” (I Pêtrôs 1:24).
Tơdrong arih minh ‘nu bơngai băt mơn ‘mêm kơ Kră Yang bơih, ưh kơ sĭ khan chu kiơ̆ nơ̆r Kră Yang wă kơ gơh weh đơ̆ng tơdrong yoch kơnê̆ đĕch ôh, mălei athei kang rai “Hưch hanh kơdih kơdih ‘maih mơ̆ng tơdrong ‘lơ̆ng tơpăt ‘Bok Kei-Dei thoi kon nge đe ‘nao tơpŭ ling lăng ‘maih mŏm đak toh ngăl” (trong 2). Nơ̆r “Ling lang ‘maih” pơma kơ jơhngơ̆m rơhing dêh. Pơting tơdrong rơhing ‘maih mơ̆ng nơ̆r Kră Yang hăm kon nge đe ‘nao tơpŭ ‘maih mŏm đak toh đei tơ’bôh kơ bơ̆n minh ‘nu bơngai lui sơng iŏk Kră Yang ‘maih wơ̆ ‘lŏ gah bơhngol, ‘maih wơ̆ ‘lŏ lăm tơdrong dŏng pơklaih lei na athei ‘maih rơhing nơ̆r Kră Yang, đŏk, pơhrăm, tơchĕng hăm jơhngơ̆m rơhing thoi kon nge ‘maih mŏm đak toh na wă kơ wơ̆ ‘lŏ. Đơ̆ng noh, “Yua kơ iĕm ‘bôh boih Kră Yang Yêsu Krist Sư ‘mêm mơnat kơ bơ̆n tơpă.” (trong 3).
Ơ Bơngai Lui, đei Kră Yang mơnat ăn dôm tơdrong yoch bơih, Kră Yang tơlih jing bơngai ‘nao na lu bơ̆n athei ‘mêm băl păng chu yom kơ Kră Yang, athei pơnam păng ‘maih pơhrăm nơ̆r Kră Yang kiơ̆ kơ hơrĭ hơrĭ wă kơ đon lui rai đunh rai wơ̆ ‘lŏ kĕ jei đơ̆ng tơdrong pơlong, tơdrong truh lăm chăl arih kiơ̆ Kră Yang. Dah lu bơ̆n jing minh ‘nu bơngai wơ̆ ‘lŏ gah bơhngol, oei bơ̆jang kơ Kră Yang hăm khul triu iĕ dah tih, bơ̆n athei kang rai pơyơ̆r akâu jăn gah bơhngol păng arih kiơ̆ kơmĭl ‘bok Pôl “Inh adrin pơm jơhngơ̆m chơ̆n kuă ăn akâu inh pơm yoch, hli kơ inh bơtho đe, đe lui mơ̆n, mă akâu inh kơdih hiong tơdrong apah.” (I Kôrintô 9:27).
Ơ Kră Yang, inh bơnê kơ Ih yua kơ Ih pơklaih inh, apinh Ih ăn kơ inh băt ‘mêm kơ Ih mă đơ̆ng đei dôm tơdrong pŭn hiôk dah tơdrong sơ’ngon lăm chăl arih inh. Apinh Ih ăn thim jơhngơ̆m inh băt ‘mêm păng rơhing kơ nơ̆r Ih thoi kon nge rơhing kơ đak toh, wă kơ inh arih kiơ̆ kơ Ih lăp đon, krao khan yua anăn Kră Yang Yêsu Krist, Amen.
Lu bơ̆n athei pơnam păng ‘maih đŏk pơhrăm nơ̆r Kră Yang thoi yơ?
Đŏk Sơ̆p Hla bơar lăm pêng sơnăm: Jêrêmi 5
Kênh Youtube BHKTHN:
