Klei Aê Diê Blŭ: I Y-Pêtrôs 2:1-3
Êlan kliăng: “Msĕ si phung hđeh mrâo kkiêng, brei diih mhao kơ êa ksâo doh kơ ai mĭn, čiăng kơ hŏng mnơ̆ng anăn diih dưi hriê kơ prŏng hlăm klei bi mtlaih, tơdah diih djiêl thâo sĭt Khua Yang jing jăk” (I Y-Pêtrôs 2:2-3)
Klei êmuh ksiêm mĭn: Leh đăo kơ Khua Yang, bi doh leh ai tiê pô, phung đăo srăng êpa hmao kơ ya mnơ̆ng? Si klei hdĭp djiêl leh, thâo sĭt kơ Khua Yang jing jăk? Ya drei ngă čiăng kơ drei đĭ hriê kơ prŏng hĭn leh anăn bi êdah kơ klei hdĭp tuôm djiêl leh thâo sĭt kơ Khua Yang jing jăk?
Khua ƀĭng kna Y-Pêtrôs mtă kơ phung đăo dôk bra đuĕ tơdah “bi doh leh mngăt hŏng klei gưt asăp kơ klei sĭt nik” (I Y-Pêtrôs 1:22), “brei diih lui klei ƀai, jih klei mnêč, klei ai ngăm, klei nač, leh anăn jih klei mčeh luar” (êlan 1), snăn klei yuôm hĭn jing khăp kơ Klei Aê Diê Blŭ msĕ si phung hđeh khăp kơ êa ksâo.
Boh blŭ “tơdah” kŏ êlan 3 brei ƀuh kơ ayŏng adei tuôm djiêl thâo sĭt leh kơ Khua Yang jing jăk. Boh blŭ “djiêl” lŏ mblang jing tuôm găn, tuôm bi knal. Tơdah sa čô mnuih tuôm djiêl thâo sĭt kơ Khua Yang jing jăk, mơ̆ng klei tuôm găn leh klei ênưih amâodah klei dleh dlan snăn klei êpa mhao kơ Klei Aê Diê Blŭ leh anăn klei gưt kơ Klei Ñu Blŭ yơh jing êlan čiăng kơ ai tiê drei dưi bi doh nanao mơ̆ng klei soh, klei ƀai. Klei anăn knŏng dưi mâo tơdah pô anăn thâo sĭt kơ lăn ala anei jing knŏng anôk dôk jưh bhiâo đuč, leh anăn “Kyuadah “Jih jang kđeh jing msĕ si rơ̆k, leh anăn jih klei guh kơang ñu msĕ si mnga rơ̆k. Rơ̆k krô, leh anăn mnga ñu luh”” (I Y-Pêtrôs 1:24).
Sa čô mnuih tuôm djiêl leh thâo sĭt kơ Khua Yang jing jăk, ñu amâo mjưh mă tăp klei gưt asăp kơ Klei Aê Diê Blŭ čiăng tlaih mơ̆ng klei soh jhat ôh, ƀiădah ñu ăt lŏ “khăp kơ êa ksâo doh kơ ai mĭn msĕ si phung hđeh” (êlan 2). Boh blŭ “khăp” čiăng lač kơ klei mhao ktang snăk. Klei bi msĕ klei mhao kơ Klei Aê Diê Blŭ hŏng klei phung hđeh mhao kơ êa ksâo brei ƀuh sa čô mnuih đăo sĭt leh kơ Khua Yang čiăng snăk dưi đĭ hriê kơ prŏng hlăm klei hdĭp myang, čiăng dưi đĭ hriê kơ prŏng hlăm klei bi mtlaih brei drei khăp kơ Klei Aê Diê Blŭ, dlăng, hriăm leh anăn ksiêm mĭn hŏng klei êpa mhao msĕ si phung hđeh khăp kơ êa ksâo čiăng dưi đĭ hriê kơ prŏng. Hŏng klei anăn, pô anăn dưi dôk kjăp hlăm klei đăo tơdah tuôm hŏng klei lông dlăng, klei knap mñai hlăm klei hdĭp truh kơ hruê bi tuôm hŏng Khua Yang (êlan 3).
Jing phung đăo kơ Krist, mâo klei Khua Yang pap brei leh kơ klei soh, mâo leh klei lŏ bi kkiêng mrâo snăn brei drei khăp leh anăn gưt kơ Klei Aê Diê Blŭ. Brei drei khăp leh anăn êpa mhao kơ klei hriăm Klei Aê Diê Blŭ hŏng klei djŏ pruê̆ êlan čiăng kơ klei đăo drei ƀrư̆ hruê ƀrư̆ đĭ hriê kơ prŏng leh anăn dưi bi kdơ̆ng hŏng klei lông dlăng, klei knap mñai truh kơ klei hdĭp msĕ si Khua Yang drei. Tơdah drei jing sa čô mnuih prŏng leh hlăm klei hdĭp myang, dôk mă bruă kơ Khua Yang hŏng klei kiă phung biăp điêt amâodah prŏng, snăn ƀai êjai hĭn brei drei luă gŭ leh anăn hriăm čiăng đĭ hriê kơ prŏng hĭn hlăm klei hdĭp myang wăt klei hdĭp kđeh tui knuih Khua ƀĭng kna Y-Pôl snei “ƀiădah kâo bi knap asei mlei kâo leh anăn bi mjuăt ñu gưt, huĭdah leh kâo mtô kơ phung mkăn, kâo pô mơh Aê Diê srăng hngah” (I Kôrantô 9:27).
Hŏng ya êlan drei khăp leh anăn mhao kơ klei hriăm Klei Aê Diê Blŭ?
Wah lač: Ơ Khua Yang, bi mni kơ Ih kyuadah Ih brei kâo djiêl thâo sĭt kơ Ih jing jăk mơ̆ng klei jăk jĭn wăt klei dleh dlan hlăm klei hdĭp kâo.Akâo Khua Yang brei kơ kâo mâo ai tiê khăp leh anăn mhao kơ Klei Ih Blŭ msĕ si phung hđeh mhao kơ êa ksâo, čiăng kơ kâo hdĭp bi mơak kơ Ih nanao. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yêrêmi 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
