Klei Aê Diê Blŭ: Rôm 16:21-24
Êlan kliăng: “Y-Timôthê, pô mă bruă mbĭt hŏng kâo, kkuh čhưn hŏng diih. Y-Lusius, Y-Jasôn, leh anăn Y-Sôsipater, phung găp djuê kâo, kkuh čhưn hŏng diih msĕ mơh” (Rôm 16:21)
Klei êmuh ksiêm mĭn: Hlei pô mơĭt klei kkuh čhưn knhal tuč hră Rôm anei? Ya klei drei ƀuh hlăm jih anăn phung mơĭt klei kkuh čhưn anăn? Si drei mă yua klei hriăm anei hlăm klei drei pô mă bruă kơ Aê Diê?
Khua ƀĭng kna Y-Pôl čih hră Rôm anei hlăk ñu dôk ti sa ƀuôn prŏng hlăm kwar Dhŭng Grĕk jing ƀuôn prŏng Kôrantô. Leh mtô lu mta klei hŏng lu klei hriăm yuôm bhăn kơ klei đăo kơ Krist, hlăm kdrêč knhal tuč hră mơĭt msĕ si klei čih knhal tuč, Khua ƀĭng kna Y-Pôl brei kơ phung ƀĭng găp mă bruă mbĭt hŏng ñu mơĭt klei êmuh hrăm truh kơ phung ƀuôn sang Aê Diê ti Sang Aê Diê Rôm. Mâo jih jang 8 čô mâo yap anăn tinei, anăn jing Y-Timôthê, Y-Lusius, Y-Jasôn, Y-Sôsipater, Y-Tertius, Y-Gaius,Y-Êrast, Y-Kartus.
Mơ̆ng anăn phung mơĭt klei kkuh čhưn knhal tuč hră Rôm, drei thâo Khua ƀĭng kna Y-Pôl mâo sa êpul mă bruă mbĭt lu snăk, mâo phung drei thâo leh kyua mâo anăn leh hlăm Klei Aê Diê Blŭ, ƀiădah ăt mâo mơh phung drei amâo thâo ôh kyua ka ƀuh hưn anăn ôh hlăm dŭm hră Khua ƀĭng kna Y-Pôl čih. Wăt tơdah snăn dưn, diñu mâo sa ai tiê jing phung mă bruă mbĭt jih ai tiê hlăm klei mă bruă kơ Aê Diê mbĭt hŏng Khua ƀĭng kna Y-Pôl. Sapăn čô mơĭt klei kkuh čhưn ti anei digơ̆ mơ̆ng mdê mdê snăk phŭn agha, ƀuôn sang, thŭn, klei thâo, bruă ngă hlăm ala ƀuôn, thŭn đăo kơ Khua Yang, mâo phung jing mnuih ƀuôn sang hŏng ñu, mâo mnuih jing pô ñu atăt gai hlăm klei hdĭp mngăt, leh anăn mâo phung jing ƀĭng găp… Khădah snăn, ai tiê diñu bi mguôp jing sa anăn. Diñu jing phung khăp kơ Khua Yang, mâo sa ai tiê mă bruă kơ Khua Yang, jih ai tiê đru kơ Khua ƀĭng kna Y-Pôl hlăm klei hâo hưn klei đăo leh anăn pŏk mlar Phung Sang Aê Diê boh nik kơ phung ƀuôn sang tue. Mơ̆ng anăn, Khua ƀĭng kna Y-Pôl ăt čiăng bi mni kơ diñu leh anăn hdơr knga kơ jih êpul myơr leh hlăm bruă kluôm mbĭt kơ Khua Yang.
Hlăm êpul êya Phung Sang Aê Diê hruê anei, amâo mâo ôh hlei pô hlăm phung drei dưi mă bruă hjăn păn kơ Aê Diê ƀiădah ăt mâo klei tŭ dưn jăk hĭn. Aê Diê dưm drei hlăm êpul êya klei đăo hŏng phung mdê mdê kơ lu mta. Ñu čiăng drei hrăm mbĭt hlăm êlan hdră tui hlue Ñu, sa ai tiê hlăm klei mă bruă kơ Aê Diê, jih ai tiê bi đru mă bruă kơ Khua Yang tui si klei pap Ñu brei. Čiăng dưi ngă klei anei, drei đăm dlăng ôh hdơ̆ng pô čiăng bi msĕ, bi lông, ƀiădah hrăm mbĭt wir ai tiê phă sa klei kñăm mbĭt jing mă bruă kơ Khua Yang leh anăn mă bruă kơ ayŏng adei. Grăp čô brei bi mpŭ hdơ̆ng pô, đup gưt leh anăn bi hdơr knga hdơ̆ng pô čiăng kơ êpul êya phung đăo kơ Krist, Phung Sang Aê Diê alŭ wăl, êpul điêt leh anăn gŏ sang drei dưi mkŏ mjing leh anăn mđĭ kyar.
Aê Diê ruah leh hlei phung mnuih mdê hjăn kơ drei hlăm klei hdĭp tui hlue Khua Yang leh anăn mă bruă kơ Ñu? Ya klei brei drei bi mlih čiăng mâo klei tŭ dưn jăk hĭn kơ Khua Yang?
Wah lač: Ơ Khua Yang, kâo bi mni kơ Ih kơ phung Ih ruah leh čiăng mđrăm mbĭt mă bruă kơ Khua Yang mbĭt hŏng kâo. Ih đru kâo jih ai tiê huĭ mpŭ kơ Ih leh anăn bi mđĭ ai mă bruă kơ Khua Yang. Akâo kơ Ih brei kơ kâo mâo ai tiê sa ai, luă gŭ, thâo mpŭ leh anăn bi hdơr knga hdơ̆ng pô čiăng hrăm mbĭt hlăm hdră tui hlue Khua Yang leh anăn mă bruă kơ Ih tŭ dưn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 28
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
