Mathiơ 21:28-32
“Sơ̆ iĕm ưh kơ hlôh tơdrong ‘Bok Kei-Dei na iĕm hưch-hanh lơ tơdrong kơnê̆. Dang ei iĕm jing kon ‘Bok Kei-Dei boih, iĕm athei chu kơ ‘Bok Kei-Dei, ‘nĕ pă pơm tơdrong kơnê̆ dơ̆ng.” (I Pêtrôs 1:14)
Nơ̆r jet tơchĕng pơwao:
– Kră Yang Yêsu roi hơ’mon thoi yơ gah ‘bar ‘nu kon?
– Kră Yang wă bơtho tơdrong kiơ lăm tơdrong hơ’mon âu?
– ‘Bai pơhrăm âu khan tơbăt păng kư̆m pơtrŭt lu bơ̆n tơdrong kiơ?
Wă kơ tơ’bôh rơđah tơdrong arăng kơ̆l ưh kơ chu yom lu thây bơtho khôi juăt păng bơngai Pharisi, Kră Yang Yêsu roi hơ’mon minh ‘nu bơngai wơh ‘bar ‘nu năm jang tơ mir hơmu. Kon sư mă mĭnh drơ̆ng ŏ mă-lei ưh kơ jang, kon sư mă ‘bar blŭng a drơ̆ng ưh mă-lei đơ̆ng rŏng kơ noh tơbral păng pơm kiơ̆ thoi ‘bă sư wơh. Kră Yang wă kơ lu bơngai Pharisi tơlĕch nơ̆r pơma thoi noh Kră Yang jet, “ Thoi noh boih na iĕm tơchĕng lăng, ‘bar ‘nu kon noh, kon ayơ chu kơ nơ̆r ‘bă sư? Lu sư khan: “Kon mă ‘bar ” (trong 31a) Kră Yang Yêsu roi hơ’mon dơ̆ng wă kơ lu sư hlôh kơplah Kră Yang khan “… Na Yêsu khan: “Inh khan kơ iĕm tơpă, lu bơngai iŏk jên thuê̆, lu drŏ-kăn pơm đi, lu sư chu thoi kon kơdră noh boih. Lu sư băt ăn kơ ‘Bok Kei-Dei pơgơ̆r lu sư boih mă-lei gah lu iĕm tam mă chu ‘mơ̆i.” (trong 31b). Bơngai Pharisi lăng hơi gah lu bơngai iŏk jên thưê̆ păng lu bơngai drŏ-kăn pơm đi, lu sư khan lu bơngai noh ‘bĕnh kơ tơdrong yoch kơnê̆ ‘mê̆ ‘mach dêh. Kră Yang Yêsu tơ’bôh kơ lu sư băt lu bơngai mă lu sư lăng khan yoch, ưh kơ trŏ păng ‘mê̆ ‘mach noh gơh mơ̆t lăm Plei ‘Lơ̆ng. Yua kơ đơ̆ng kơplah lu sư mơ̆ng Yôhan ‘Batem bơtho gah tơdrong yoch, lu sư mơn kơdih akâu đei tơdrong yoch na apĭnh Sư pơm ‘Batem tơbral wă kơ mơnat ăn tơdrong yoch. Mă lu bơngai bơngai bơtho khôi juăt păng bơngai Pharisi kơplah mơ̆ng Yôhan ‘Batem bơtho mă-lei arăng kơ̆l, ưh kơ chu tơbral tơdrong yoch sư kơdih thoi noh ưh kơ gơh mơ̆t tơ Plei ‘Lơ̆ng.
‘Bai pơhrăm ‘nâu kư̆m tơbăt kơ đĭ đăng khul bơngai lui chăl dang ei lu bơ̆n hăm trŏ kơ bơngai kon tơpă chu yom Kră Yang? Lei mă lu bơ̆n mơ̆ng păng hlôh băt tơdrong Kră Yang wă mă-lei ưh kơ wă pơm kiơ̆ Nơ̆r sư tơtă. Lu bơ̆n oei wă bơwei dôm tơdrong kiơ̆ kơdih ‘maih wă, lu tơdrong yoch bơn ôn hlơp. Kră Yang Yêsu bơtho: “Bu pơm kiơ̆ kơ ‘Bă Inh mă oei tơ plĕnh ti, bơngai ‘noh dang ‘nhŏng oh Inh păng mĕ Inh.” (Mathiơ 12: 50). Mă khan mơ̆ng nơ̆r Kră Yang hơnơ̆ng, mă khan oei wei tơdrong jang pơgơ̆r, mă-lei ưh kơ pơm kiơ̆ oei ưh kơ đei tơdrong tơ’bưh hăm Sư.
Nơ̆r Kră Yang khan tơbăt. “Lu bơngai iŏk jên thuê̆ păng lu drŏ-kăn pơm đi gô oei tơ dêh char ‘Bok Kei-Dei” wă pơtrŭt lu bơ̆n ‘nĕ kơ pơtuah kơdih gah tơdrong yoch lu bơ̆n hlôi bơih, lu bơ̆n kăl kơ băt bơ̆n kơdih Kră Yang mơnat tơdrong yoch, oei rơngei wă kơ gơh arih ‘nao pơchrang hơdah anăn Kră Yang, păng tơ anăp ning mônh kơplah Kră Yang jur dơ̆ng lu bơ̆n gơh oei hơdai hăm Sư tơ Plei ‘Lơ̆ng ‘lơ̆ng rŏ. Tơdrong mă Kră Yang ‘blŏk tơtăm lu bơ̆n hăm trŏ kơ “ jing kon băt kơ chu yom” lei mă pơma đĕch mă ưh kơ jang ( I Pêtrôs 1:14 BTTHĐ).
Kơkuh kơ Ih Kră Yang, bơnê kơ Ih dŏng pơklaih inh păng ăn kơ inh Sơ̆p Hla Bơar Nơ̆r Ih wă kơ inh arih kiơ̆ thoi Ih wă, apinh Ih tơgŭm inh ling lang mơ̆ng Nơ̆r Ih wă kơ inh wơ̆ pran tơdrong lui păng arih pơchrang hơdah anăn Kră Yang, krao khan yua anăn Kră Yang Yêsu Krist. Amen.
Lu bơ̆n “jing kon băt kơ chu yom” dah mă mơ̆ng lơ păng pơma gơh mă ưh kơ pơm kiơ̆?
Đŏk sơ̆p hla bơar nơ̆r ‘Bok Kei-Dei lăm pêng sơnăm: II Hơ’mon 18
Kênh Youtube BHKTHN:
