Tơdrong Pơđơ̆k 24:27
“Pơm đang tơdrong jang ih tơ ‘nguaih pơgar bĕ, choh bĕ mir na ih; Đơ̆ng rŏng kơ noh pơm bĕ hnam ih.” (Tơdrong jang 24:27)
Nơ̆r jet tơchĕng pơwao:
– Nơ̆r “ pơm đang tơdrong jang” wă khan kiơ?
– Yua kơ kiơ kăl kơ proh hơmet tơdrong jang lăm tơdrong arih?
– ‘Bai pơhrăm âu tơgŭm lu bơ̆n ‘blŏk tơtăm proh hơmet tơdrong jang lăm hnam dơnŏ thoi yơ?
Pơtao Salômôn bơtho kon minh tơdrong juăt arih athei proh hơmet tơdrong jang mă tơnăp tơnen păng pơm pơkeh tơdrong jang đêl proh hơmet kiơ̆ thoi kơnao dŏng dan. Nơ̆r “pơm đang tơdrong jang” lăm nơ̆r tơm Aram wă khan “ pơjing dah hơmet adrol” thoi noh, kon athei proh hơmet trŏ kơ tơdrong jang, adrol hloh athei proh hơmet păng pơm đang tơdrong jang tơ ‘nguaih, đơ̆ng noh truh tơ mir pơgar hnam, đơ̆ng rŏng kơ noh gơh pơjing hnam, Lu “ tơdrong jang tơ ‘nguaih” noh tơdrong jang tơ rok trong lăm anih đe akŭm tih (lăng lăm Tơdrong Pơđơ̆k 1:20), pơma gah tơdrong jang đei anăn, wă tơbăt kơ đe đei lui ngeh “hơmet tôm tơdrong lăm mir” wă pơma gah pơjing kơjăp jên tơmam, đei yua tơdrong jang hơđơ̆ng tôm mah. Jang “pơm hnam” wă pơma kơ tơdrong pơjing anih oei pơdơh lăm hnam dơnŏ păng bơngai tơgŭm tơdrong jang. Nơ̆r tơdrong pơđơ̆k ‘nâu ưh kơ sĭ yua ăn kơ bơngai jang chŭn mir mă kư̆m yua iŏk kơ đĭ đăng bơngai đei tơdrong jang. Athei pơjing tơdrong ư-ang ‘lơ̆ng, tơdrong jang, đei lĕch yua kơjăp tôm mah adrol kơ pơjing hnam. Thoi noh bơngai arih gơh hơgei păng keh jing ‘lơ̆ng noh bơngai đei proh hơmet adrol păng pơkeh kiơ̆ kơ tơdrong kăl hloh. Proh hơmet lăm tơdrong jang păng pơ’lơ̆ng pơm pơkeh noh bơih trong ba truh tơ keh jing ‘lơ̆ng. Lơ bơngai chu iŏk pơmat wă jang sa mă-lei ưh kơ keh jing ‘lơ̆ng yua kơ tơiung jơ ‘năr, jơhngơ̆m pran ưh kơ trŏ tơdrong, ưh kơ trŏ kơ anih, lơ bơngai nai kư̆m ưh kơ hiơ̆k proh hơmet lê̆ adrol, tơdrong arih nhen thoi bô̆i đak đông. Nơ̆r Kră Yang khan: “ Tơdă lu bơngai hiă pơnam đei tơmam rơkah rơkai. Mă-lei đei lu bơngai pơm hăt-hot gô jing pơngot dơnuh.” (Tơdrong Pơđơ̆k 21: 5). Bơngai lui bơih jing kon Tơ’ngla hơgei, thoi noh athei gơh hơgei lăm tơdrong arih, adrol hloh păng kăl Hloh kơ tôm tơdrong. Lu bơ̆n athei adrin krao khan đĭ jơhngơ̆m, roi pơjao kơ Kră Yang ‘Bok Kei-Dei dôm tơdrong đei proh hơmet adrol wă kơ Kră Yang lăp đon, păng kư̆m apĭnh sư ăn gơh hơgei, ăn thim jơhngơ̆m pran wă kơ pơkeh tơdrong đei proh hơmet. Nơ̆r Kră Yang khan: “ jao bĕ dôm tơdrong jang ih kơ Kră Yang; Na đĭ tơdrong ih wă chă gô đei.” (Tơdrong Pơđơ̆k 16: 3 BTTHĐ). Kăl kơ ‘blŏk thoi âu keh jing ‘lơ̆ng dah ưh, đĭ đăng đơ̆ng Kră Yang hơgăt ăn (I Kôrintô 3: 4-8).
Apinh Kră Yang ăn kơ rim ‘nu lu bơ̆n chơ chă tơdrong tơ’bôh đơ̆ng Yang Bơhngol ‘Lơ̆ng, đei tơdrong gơh hơgei đơ̆ng Kră Yang wă kơ proh hơmet tơdrong jang tơnăp tơnen păng pơ’lơ̆ng pơm pơkeh wă kơ đei yua keh jing ‘lơ̆ng lăm tơdrong arih pơchrang hơdah anăn Kră Yang kơ kon pơlei, wang tơiung pơjing khul bơngai lui wơ̆ tŏk, păng hnam dơnŏ arih chơt hiôk.
Kơkuh kơ Ih Kră Yang, inh bơnê kơ Kră Yang đei ăn kơ inh Nơ̆r Sư, apĭnh ăn kơ inh ling lang đĭ jơhngơ̆m chơ chă tơdrong kiơ̆ thoi Kră Yang wă lăm tôm tơdrong đei proh hơnet păng pơnam kơ jang wă kơ đei yua tôm mah kơ hnam dơnŏ păng pơchrang hơdah anăn Kră Yang kơ kon pơlei, krao khan yua anăn Kră Yang Yêsu Krist. Amen.
Lu bơ̆n hăm apĭnh Kră Yang ăn gơh hơgei wă kơ proh hơmet adrol kơ wă bơ̆jang?
Đŏk sơ̆p hla bơar nơ̆r ‘Bok Kei-Dei lăm pêng sơnăm: II Hơ’mon 17
Kênh Youtube BHKTHN:
