Klei Aê Diê Blŭ: II Klei Yăl Dliê 32:24-33
Êlan kliăng: “Yêhôwa bi êmut kheh kơ phung mâo ai tiê mgao, brei ih thâo sĭt diñu amâo srăng tlaih kơ klei bi kmhal ôh” (Klei Bi Hriêng 16:5)
Klei êmuh ksiêm mĭn: Ya ngă klei Aê Diê ngêñ truh kơ Mtao Hêsêkia? Ya ñu ngă leh čiăng tlaih mơ̆ng klei Aê Diê ngêñ? Si ih hriăm knuih bi luă gŭ pô Khua Yang Yêsu?
Mtao Hêsêkia mâo klei ruă kjham tơl giăm djiê. “Hlăm ênuk anăn” (êlan 24), jing dŭm hruê êlâo kơ Y-Sênakêrip, mtao čar Asiri hriê wang blah čar Yuđa. Ñu wah lač kơ Aê Diê, Aê Diê lŏ wĭt lač leh anăn brei kơ ñu sa klei bi knăl čiăng ñu thâo Aê Diê srăng bi hlao klei ruă ñu. II Bruă Mtao 20:1-11 brei thâo klei bi knăl anăn jing Aê Diê bi kdŭn phă tluôn êyui mmông yang hruê pluh knhuang. Aê Diê bi hlao klei ruă Mtao Hêsêkia leh anăn brei ñu lŏ hdĭp thiăm pluh êma thŭn. Ƀiădah ñu amâo bi wĭt klei djŏ kơ Aê Diê tui si klei jăk Aê Diê ngă leh kơ ñu ôh, kyuadah ai tiê ñu jing mgao. Kyuanăn, klei Aê Diê ngêñ truh kơ ñu, kơ phung Yuđa leh anăn kơ phung ƀuôn Yêrusalem. Ƀiădah ti knhal tuč, mtao leh anăn phung ƀuôn sang ƀuôn Yêruslem kmhal kơ klei soh, bi luă gŭ diñu pô leh anăn lui jih klei mgao snăn klei Aê Diê ngêñ amâo truh kơ diñu ôh.
Năng ai kyua Y-Hêsêkia “mâo klei mdrŏng, mâo klei mpŭ prŏng snăk” leh anăn “Y-Hêsêkia čăt đĭ hlăm jih jang bruă ñu ngă” (êlan 27, 30), kyuanăn ai tiê ñu jing mgao. Tơdah phung dĭng ktang mơ̆ng čar Ƀaƀilôn hriê “Aê Diê lui tha ñu, čiăng lông dlăng ñu leh anăn čiăng thâo jih jang klei hlăm ai tiê ñu” (êlan 31), leh anăn ăt čiăng ñu thâo săng kơ klei ñu dôk kƀah mơh. Boh kơ klei anăn jing ai tiê mgao ñu bi êdah kyuanăn ñu brei phung dĭng ktang anăn dlăng jih jang mnơ̆ng ñu mâo hlăm sang ñu čiăng hưn kơ klei ñu jing mdrŏng. Kyuanăn yơh, êdei tinăn jih jang ngăn drăp anei phung Ƀaƀilôn plah mă jih (II Bruă Mtao 20:16-17).
Trăn Klei Aê Diê Blŭ anei dua blư̆ mñă kơ klei mgao hlăm ai tiê (êlan 25-26), leh anăn dua blư̆ mơh mñă kơ klei Aê Diê ngêñ. Klei Aê Diê ngêñ amâo bi truh kyua sa mta klei mkăn ôh hlăm klei hdĭp Mtao Hêsêkia tơdah ñu mă bruă kơ Aê Diê hŏng jih ai tiê. Ƀiădah klei Aê Diê ngêñ “truh kơ ñu” kyua klei ai tiê ñu mgao, leh anăn klei ngêñ anăn hlai tơdah “Y-Hêsêkia bi luă gŭ ñu pô kyua klei mgao ai tiê ñu” (êlan 26). Wăt snăn dưn mơh, kơanăp phung Yuđa ăt tŭ boh jhat bŏ hŏng klei ênguôt mơh kyua klei mgao anei leh anăn tŭ klei phung Ƀaƀilôn plah mă čar diñu.
Aê Diê bi êmut kheh kơ phung mâo ai tiê mgao, leh anăn diñu amâo srăng tlaih kơ klei bi kmhal ôh (Klei Bi Hriêng 16:5). Phung mgao mmiă mă kơ diñu pô klei guh kơang pioh kơ Aê Diê, leh anăn lač kyua diñu pô yơh diñu mâo djăp mta mnơ̆ng. Tơdah Aê Diê brei kơ drei klei jăk jĭn, klei jing hlăm bruă, hlăk anăn mơh yang jhat mplư phung drei ktang snăk čiăng kơ drei mâo ai tiê mgao, leh anăn mơ̆ng anăn klei Aê Diê ngêñ srăng truh kơ drei. Jing phung anak čô Aê Diê, brei phung drei tui klei Khua Yang Yêsu bi hmô leh hlăm klei bi luă gŭ Ñu pô, hŏng klei mơak Ñu hriê ti lăn ala jing msĕ si sa čô dĭng buăl, tŭ klei djiê bŏ hŏng klei hêñ, klei ruă ti kyâo bi kal čiăng bi mtlaih drei (Philip 2:5-9). Brei drei lui hĕ ai tiê mgao čiăng kơ drei amâo dôk hlăm klei Aê Diê ngêñ ôh.
Drei ƀuh drei dôk bi mni kơ drei pô kơ ya klei?
Wah lač: Ơ Khua Yang, brei kâo mâo klei mĭn msĕ si Yêsu Krist mâo leh čiăng kơ kâo thâo bi luă gŭ kâo pô, lui hĕ jih ya klei mgao hlăm ai tiê kâo, čiăng kơ kâo amâo ngă klei soh Ih bi êmut kheh ôh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
