I Pêtrôs 1:1-7
“…wă kơ băt bơ̆n lui tơpă dah ưh. Bĭ maih đe kư̆m ‘buh pơlong sư tơ ŭnh wă kơ băt sư maih tơpă dah ưh; na tơdrong bơ̆n lui kơ Yêsu Krist kăl hloh kơ maih tơpă, yua kơ maih sư gô hiong răm. Na bơ̆n kon bơngai trŏ kơ ‘Bok Kei-Dei pơlong lăng tơdrong lui bơ̆n wă kơ bơ̆n lui kơjăp, na Sư gô bơnê kơ bơ̆n, hăm ăn kơ bơ̆n hiôk kơplah năr Yêsu Krist jur ning-mônh.” (I Pêtrôs 1:7)
Nơ̆r jet tơchĕng pơwao:
– ‘Bok Pêtrôs chih kơthơ I Pêtrôs ăn kơ đe bu?
– Sư bơtho pơlung lu sư tơdrong kiơ?
– Đei bơtho kơ bơ̆n thoi yơ kơplah tơ’bưh hăm tơdrong pơlong?
‘Bok Pêtrôs chih kơthơ I Pêtrôs lăm sơnăm 64 ĐK., wă bơtho kơ lu bơngai lui mă oei tơklah jơ̆p dêh tơmoi. Lu bơngai lui ‘nâu đe Rôm pơm kơnê̆ jing lu sư arih tơklah tơklang mălei Pêtrôs bơtho lu sư adrin kơjăp mă khan đei tơdrong pơm kơnê̆, chơt hiôk hăm tơdrong chang hơmĕng yua kơ Kră Yang ‘Bok Kei-Dei rơih iŏk lu sư bơih, đei Yang Bơhngol ‘Lơ̆ng tơplih wă chu kiơ̆ ‘Bok Kei-Dei rim năr rai nhen thoi Kră Yang hloh (trong 1-2).
Tơdrong wă pơm kơ Pêtrôs păng lu bơngai lui gơh kơjăp tơ’bơ̆p tơ’bưh hăm dôm tơdrong pơlong, rôp pơm kơnê̆, đơ̆ng noh “Bơnê kơ Kră Yang ‘Bok Kei-Dei ‘Bă Yêsu Krist Yŏng bơ̆n, Sư ‘mêm mơnat kơ bơ̆n tơpă na Sư ăn kơ bơ̆n tơpŭ ming ‘nao, yua kơ Yêsu Krist iung arih đơ̆ng lôch. Thoi noh bơ̆n băt tơpă ning-mônh bơ̆n gô iung arih đei tôm tơdrong hiôk ‘lơ̆ng Sư wă ăn kơ bơ̆n.” (trong 3 BTTHĐ). Bơngai lui ‘noh lu bơngai mă đei tơpŭ ming ‘nao, jing bơngai ‘nao lăm Kră Yang Yêsu Krist. Yua kơ đon lui bơ̆n sơng iŏk tơdrong arih ling lang. “Tôm tơdrong noh Sư hơmet ăn kơ bơ̆n tơ plĕnh boih, na tôm tơdrong noh ưh kơ đei layơ hiong răm bŭk ôm ôh.” (trong 4). Ưh kơ sĭ thoi lu tơmam mă arih pơdơh lăm teh đak âu.
Năm lăm trong hrăt kiơ̆ Kră Yang, phŏ phŏ akâu bơ̆n đei tơdrong pơlong, đe pơm kơnê̆, pơm pơrăm phŏ bơ̆n lôch yua kơ Kră Yang tăm, mălei tơdrong gĭt kăl noh bơhngol bơ̆n ưh kơ đei răm kiơ. Kră Yang Yêsu bơtho: “Iĕm ‘nĕ hli kơ đe pơlôch akâu iĕm, mă-lei bơhngol iĕm sư ưh kơ gơh pơlôch ôh. Iĕm athei hli kơ ‘Bok Kei-Dei đĕch, Sư gơh pơrăm akâu iĕm hăm bơhngol iĕm tơ dơnâu ŭnh.” (Mathiơ 10:28). Athei kơjăp kơplah tơ’bơ̆p hăm tơdrong pơlong “păng tơdrong gleh sư ưh kơ ling lang ôh” (trong 6). Mălei Kră Yang ưh kơ ăn bơ̆n chu gleh hloh kơ jơhngơ̆m bơ̆n ôh, păng đơ̆ng rŏng kơ tơdrong pơlong gleh noh tơdrong pŭn hiôk. “Tơdrong gleh ‘Bok Kei-Dei wă pơlong lăng tơdrong lui bơ̆n, wă kơ băt bơ̆n lui tơpă dah ưh. Bĭ maih đe kư̆m ‘buh pơlong sư tơ ŭnh wă kơ băt sư maih tơpă dah ưh; na tơdrong bơ̆n lui kơ Yêsu Krist kăl hloh kơ maih tơpă, yua kơ maih sư gô hiong răm. Na bơ̆n kon bơngai trŏ kơ ‘Bok Kei-Dei pơlong lăng tơdrong lui bơ̆n wă kơ bơ̆n lui kơjăp, na Sư gô bơnê kơ bơ̆n, hăm ăn kơ bơ̆n hiôk kơplah năr Yêsu Krist jur ning-mônh.” (trong 7).
Satan ling lang chă trong pơhlŭ chă arum kơ blah lu kon Kră Yang, mă đơ̆ng sơ̆ bơ̆n kư̆m thoi dang ei hăm tơdrong âu tơdrong to. Apinh Kră Yang ăn kơ bơ̆n adrin kơjăp kơplah tơ’bơ̆p tơ’bưh hăm tơdrong pơm kơnê̆, lu tơdrong pơlong đon lui. Păng athei ‘blŏk bơ̆n âu bơngai mă oei pơdơh lăm teh đak âu, tơdrong bơ̆n chang hơmĕng ưh kơ sĭ lăm teh đak na noh tơdrong arih ling lang kơplah Kră Yang Yêsu jur dơ̆ng.
Ơ ‘Bă mă ‘mêm kơ inh, apinh Ih ăn kơ inh ling lang băt ‘blŏk kơdih akâu khan inh đei tơdrong chang hơmĕng arih gơnang kơ Kră Yang wă kơ inh gơh chơt hiôk păng kơjăp kơplah tơ’bơ̆p tơ’bưh hăm tơdrong gleh pơlong lăng pơm kơnê̆ lăm trong inh yak kiơ̆ Ih. Yua anăn Kră Yang Yêsu Krist, Amen.
Bơ̆n gô chang hơmĕng gơnang kơ tơdrong kiơ kơplah tơ’bơ̆p tơ’bưh hăm tơdrong gleh pơlong?
Đon lui hloh kơ hu maih
Mă khan lơ tơdrong pơhlŭ gĭt hloh
Ư-ang, pơyom, bơnê ư-ang
Arih bơ̆jang kơ Kră Yang, tơm tơdrong lui
Đŏk Sơ̆p Hla bơar ‘Bok Kei-Dei lăm pêng sơnăm: II Pêtrôs 3
Kênh Youtube BHKTHN:
