II Lu Pơtao 6:15-16
“Êlisê khan: ‘Nĕ kơ hli đei lu bơngai oei hăm bơ̆n lơ hloh kơ bơngai oei hăm lu sư.” (II Lu Pơtao 6:16)
Nơ̆r jet tơchĕng pơwao:
– Đĭch đam ‘Bok khan lê̆ adrol Êli ‘bôh tơdrong kiơ păng gô pơm thoi yơ?
– ’Bok khan lê̆ adrol Êli sư pơma kiơ hăm sư kơdih?
– Lu bơ̆n đei tơbăt tơdrong kiơ đơ̆ng ‘bai pơhrăm năr âu ?
Kiơ̆ pơge hrôih,đich đam Êli ‘Bok khan lê̆ adrol iung hrôih păng hli tơrơ yua kơ “’bôh minh khul linh lơ păng gre aseh wang tăp dăr pơlei”, păng yua kơ sư ưh kơ ‘bôh tơdrong kiơ nai thoi sư đei ‘bôh! Kơplah pơtao Si-ri pơang khan sư gơh hơmet mă tơdrong anat anot na đĭch đam Êli ‘Bok khan lê̆ adrol rai hli hloh dơ̆ng, mă khan lei ră, gah akâu akar, bre sư âu lei lăi: Bre sư lăp ‘bôh tơdrong ‘bơ̆t anăp măt păng ưh kơ’bôh tơdrong ‘Bok Kei-Dei pơm.Tơdah pơtao Si-ri lăp ‘bôh ‘Bok khan lê̆ adrol Êli bơngai pơm tơdrong anat na bơngai đĭch đam ‘bok Êli lăp ‘bôh khul linh noh bơih tơdrong anat. Mă khan gơh kĕ dah ưh ‘noh jơ̆ lăp ‘bar pah tơdrong mă đei ‘bôh dôm tơdrong lăm teh đak ‘nâu ‘bôh băt đĕch. Kơplah pơtao Si-ri jơ̆ bơngai tơmoi kơkuh kơ rup yang, na bơngai đĭch đam âu awih awăn kơ Êli ‘Bok khan lê̆ adrol wă khan bơngai awih awăn kơ Kră Yang. Mă khan pha ra adrĕch adrŭng păng tơdrong lui,mă lei bre sư đei ‘bôh tơdrong truh ‘bơ̆t măt. Ưh kơ băt kơ ‘Bok Kei-Dei jơ̆ Tơ’ngla wei pơgơ̆r dôm tơdrong truh. Tơpă tơdrong âu tơbăt ăn kơ lơ bơngai lui đei ‘bôh ưh kơ pha ra kiơ kơ bơngai ưh kơ lui! Bơngai ưh tam mă lui lu sư ưh kơ lui kơ ‘Bok Kei-Dei, bơngai lui sư lui ngeh mălei phŏ sư hiơt kơ Kră Yang ‘Bok Kei-Dei Tơ’ngla wei lăng pơgơ̆r, jơ̆ Tơ’ngla gơh pơm tôm tơdrong, băt tôm tơdrong, ’mêm mơnat, tơpăt. Păng minh tơdrong tơbăt mă kăl hloh dơ̆ng, jơ̆ lu bơngai bơ̆ jang lăm tơdrong lui, mă đơ̆ng lubơngai bơ̆jang, phŏ sư ưh kơ đei đon lui kơ Kră Yang. Bơ̆n ‘nĕ kơ hăt tơchĕng khan bơ̆n bơngai ‘lơ̆ng hloh kơ đĭch đam ‘bok Êlisê ‘Bok khan lê̆ adrol, mălei athei kơchăng lăng hơlen đon lui bơ̆n kơdih, inh tam lui kơ Kră Yang ưh? Tơdrong tơ’bưh inh hăm Kră Yang thoi, jơhngơ̆m đon inh hăm tơdrong tơchĕng Kră Yang păng Nơ̆r Sư thoi yơ? Mă bu bu kư̆m dang măt tol gah bơhngol. Mă khan lu bơngai đêl mơn đei tơdrong pŭn hiôk hlôi bơih kư̆m ăn kơ tơdrong yoch, pơang, jô̆ đei yua đơ̆ng tơdrong jang kơdih pĕng lê̆ tơdrong ‘bôh băt kơ Kră Yang. Lơ tơdrong anat truh lăm chăl arih kơdih akâu, hnam dơnŏ, păng Hnam Akŭm đơ̆ng tơdrong lăp ‘bôh đơ̆ng măt bơ̆n kơdih, na athei tơlĕch tơ’bôh dôm tơdrong bơ̆n pơm kiơ̆ tơdrong gơh hơgei bơ̆n kơdih, ngăl druh kiơ̆ dah pơgơ̆r jơhngơ̆m đon bơngai nai chă tơchĕng khan trŏ…Hơlơ̆ dơ̆ng, phŏ đei bơngai mă la yơ kư̆m hli tơ rơ, ưh kơ hiôk hơđơ̆ng lăm jơhngơ̆m kơdih, na adrin chơchă tơdrong tơgŭm đơ̆ng kon bơngai. Tơdah tơdrong pơang dah gơnang kơdih gô pơrăm chăl arih lơ bơngai ‘bôh nhen dêh, na tơdrong hli tơ rơ, hiơ̆k bơngơ̆t, mă khan đei truh mă măt ưh kơ’bôh, kư̆m gô ‘bôh thoi noh mơ̆n.
Ơ Kră yang, apinh mơnat kơ inh păngtơgŭm inh ling lang bơwei tơdrong tơ’bưh inh hăm Ih, apinh ăn kơ inh gơh lăng ‘bôh gah bơhngol tôm tơdrong lăm chăl arih. Yua anăn Kră Yang Yêsu Krist, Amen.
Lu bơ̆n hăm apinh Kră Yang pơklaih gah bơhngol lu bơ̆n wă kơ ‘bôh băt gah bơhngol đei tơdrong mơsêh Kră yang pơgơ̆r ưh?
‘Nĕ kơhli tơrơ, ưh kơ hơđơ̆ng
Kră yang ling lang wei lăng mă khan lơ tơdrong truh anat
Hăt lăm teh đak, ưh kơ yua kiơ
Minh tơdrong lăng tơ Kră Yang đĕch gô hiôk chơt
Đŏk Nơ̆r ‘Bok Kei-Dei lăm pêng sơnăm: I Hơ’mon 26
Kênh Youtube BHKTHN:
