Klei Aê Diê Blŭ: Y‑Mathiơ 21:14-17
Êlan kliăng: “Ih brei phung hđeh điêt wăt phung arăng dôk bi mam bi mni kơ ih, kyua phung roh ih, čiăng brei pô roh leh anăn pô rŭ ênua dôk ñăt.” (Klei Mmuñ Hđăp 8:2)
Klei êmuh ksiêm mĭn: Ya klei Khua Yang Yêsu ngă kơ phung đŏng dlơt jơ̆ng, leh anăn si arăng hơêč hmưi bi mni kơ Ñu? Si klei phung khua ngă yang bi kdơ̆ng? Mâo klei pap prŏng mơ̆ng Khua Yang, si brei drei hdĭp?
Leh Khua Yang Yêsu suôt jih phung čhĭ mnia leh anăn bi mlih prăk hlăm Sang Kkuh Mpŭ, phung đŏng dlơt jơ̆ng, jing phung mâo ayŏng adei pô lăm lui, nao kơ Khua Yang leh anăn mâo Ñu bi hlao jih. Khua Yang pap brei klei ruă duam phung anei ƀiădah phung khua ngă yang leh anăn phung hriăm lu amâo mđing ƀiă ôh. Dlăng kơ klei yuôm bhăn Khua Yang Yêsu ngă ƀiădah diñu amâo mpŭ mni Khua Yang ôh, ƀiădah, tơdah hmư̆ klei blŭ mơ̆ng ƀăng êgei phung hđeh snăn diñu lŏ đĭ ai ngêñ. Diñu ăl snăk kyua boh phŭn mơ̆ng klei mmuñ “Hôsana kơ Anak Y‑Đawit!” sa blư̆ dơ̆ng bi mklă Khua Yang Yêsu jing Yang Mêsi, klei phung khua ngă yang leh anăn phung hriăm lu amâo čiăng tŭ yap ôh. Diñu brei Khua Yang Yêsu lač kơ phung hđeh brei mdei ur kraih kơ Ñu msĕ snăn, ƀiădah Khua Yang mă hlăm Klei Mmuñ Hđăp 8:2 čiăng hŏng diñu wăt kơ phung hđeh điêt leh anăn phung hđeh dôk mam ăt srăng bi mni kơ Khua Yang tơdah ƀuh bruă Ñu ngă leh. Ƀiădah năng ênguôt snăk, phung khua ngă yang leh anăn phung hriăm lu jing phung prŏng leh, mâo klei hriăm ƀiădah amâo bi mni kơ Khua Yang ôh, lŏ bi kgăn hĕ. Hlăm Y‑Luk 19:40 čih Khua Yang Yêsu wĭt lač kơ phung khua ngă yang tơdah diñu brei Khua Yang mgang phung ƀĭng kna dôk ñăt kriêp, “…tơdah diñu dôk kriêp snăn boh tâo srăng ur.” Khua Yang čiăng diñu thâo săng ai tiê pô khăng hlăk êjai mnơ̆ng dhơ̆ng amâo thâo săng ăt čiăng bi mni kơ Khua Yang mơh.
Hruê anei, brei drei thâo săng drei jing phung bum ală hlăm mngăt čiăng mâo Aê Diê mdrao hlao, drei jing phung tue amâo dưi nao giăm Khua Yang čiăng kkuh mpŭ kyua klei kčah mơ̆ng Hdră Bhiăn. Ƀiădah drei mâo leh klei pap prŏng snăk mơ̆ng Khua Yang Yêsu tơdah dưi mŭt hlăm Sang Aê Diê čiăng êngiê kkuh mpŭ kơ Ñu. Brei jing phung bi mni kơ Khua Yang hŏng jih ai tiê pô, brei myơr jih klei hdĭp pô kơ Khua Yang čiăng mă bruă kơ Ñu. Drei đăm msĕ si khua ngă yang leh anăn khua čih hră hlăm Sang Yang mphŭn dô amâo thâo ƀuh ôh klei pap Khua Yang, amâo bi mni, mpŭ kơ Khua Yang ôh hlăm klei hdĭp pô. Đăm mâo ôh hlei pô hdĭp ngơi mang hŏng klei Khua Yang ngă leh kơ drei, leh anăn ăt kăn ăl rei amâodah ghă ayŏng adei pô mpŭ mni, hơêč hmưi Khua Yang. Drei đăm ôh knŏng bi mni kơ Khua Yang hjăn păn ƀiădah ăt brei mđĭ ai leh anăn đru lu mnuih bi mni kơ Khua Yang hŏng pô.
Klei hdĭp, klei blŭ drei dôk ngă gun kpăk kơ ayŏng amai adei mkăn bi mni kơ Khua Yang mơ̆?
Wah lač: Ơ Khua Yang pô myang, kâo thâo kâo mâo klei pap prŏng snăk tơdah Khua Yang Yêsu tŭ klei djiê čiăng bi mtlaih leh anăn bi mrâo klei hdĭp kâo. Akâo kơ Ih đru kâo bi mni nanao klei pap Ih hlăm djăp klei mâo hlăm klei hdĭp, leh anăn ăt mđĭ ai lu pô mkăn bi mni kơ Khua Yang mơh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Klei Yăl Dliê 14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
