Yakơ 5:1-6
Kơkuh kơ đĭ-đăng bơngai mơ̆ng,
Năr ‘nâu bơ̆n gô pơwao hơdai ‘bai pơhrăm đei kơ̆l’bai: Bơngai Mơdrŏng, Athei Kơchăng Hŏ! lăng đơ̆ng Hla bơar Yakơ 5:1-6.
1 Ơ lu bơngai mơdrŏng, mơ̆ng bĕ. Trŏ kơ iĕm nhơ̆m hmoi bĕ, mă iĕm nhơ̆m hmoi lê̆ hơdrol lăp boih, yua kơ dôm tơdrong gleh pơmat wă truh kơ iĕm. 2 Mŭk tơmam iĕm jing hach răm, hơbĕn ao iĕm mua reh sa; 3 tơmam hu maih iĕm gô đĭ kơ gơsang sa, noh na đe băt kơ iĕm bơngai hưch kơ mŭk tơmam dêh, tơmam iĕm gô hiong đĭ. Gơsang noh kư̆m wă sa akâu iĕm mơ̆n thoi lĕ kơ ŭnh. Iĕm chă mong mŭk tơmam lơ, mă-lei ưh kơ yua kiơ kơlih kơ wă jê̆ truh năr tôch boih. 4 Lu bơngai jang kơ mir iĕm, kĕch ‘ba iĕm, iĕm drơ̆ng kơ apah sư, mă iĕm ưh kơ apah, iĕm hơlĕnh pơ’brơh kơ sư, na ‘bơ̆r lu sư nhơ̆m hmoi kơtơ̆ng truh tơ Kră Yang ‘Bok Kei-Dei ti. 5 Iĕm oei tơ ala teh âu hiôk jơnap tơpă. Sŏng sa phĭ mah rơkah rơkai bek lơluĭnh thoi rơmo, na đe wă rơih rơmo bek noh boih ‘buh sa. 6 Iĕm jâu lu bơngai ‘lơ̆ng pơm kơnê̆ na pơlôch hloi lu sư, mă-lei lu sư ưh kơ pơjăng ôh.
Trong tơm ‘bai pơhrăm ‘nâu:
“Bơngai bu hăt kơ chă jên,sư gô pơm tôm tơdrong kơnê̆” (ITimôthê 6:10a)
Nơ̆r jet tơchĕng pơwao:
– Yakơ tơbăt krê hơmơt kơ lu bơngai mơdrŏng wă răm noh, sư tơbăt thoi yơ?
– Yua kơ kiơ Yakơ chrih kơ lu bơngai mơdrŏng hăm nơ̆r’bơ̆r arăng thoi noh?
– Nơ̆r Kră Yang lăm Hlabơar Yakơ’nâu hei tơ’blŏk kơ bơ̆n gah tơdrong juăt jên tơmam thoi yơ?
Kơkuh kơ đĭ-đăng,
‘Bok Yakơ tơbăt krê kơ lu bơngai mơdrŏng răm, sư tơbăt khan thoi âu: Trŏ kơ iĕm nhơ̆m hmoi bĕ, mă iĕm nhơ̆m hmoi lê̆ hơdrol lăp bơih, yua kơ dôm tơdrong gleh pơmat wă truh kơ iĕm” (tr.1). Nơ̆r “nhơ̆m hmoi” ‘Bok Yakơ yua nơ̆r noh đơ̆ng nơ̆r lu bơngai pơtruh nơ̆r ‘Bok Kei-Dei chăl pah so juăt kơ yua wă roi tơdrong hli krưp mă kon bơngai khŏm tơ’bơ̆p kơplah Kră Yang ‘Bok Kei-Dei sek tơlang ‘bơ̆t năr hơtuch ei kơnh. Kơthơ ‘bok Yakơ chih âu, sư chih ăn kơ lu bơngai lui, lu sư adrĕch Juđê đe pơm kơnê̆, lu sư tơklah tơklang jơ̆p jang anih (Yakơ 1). Lei na lu bơngai mă mơdrŏng ‘nâu wă khan lu bơngai khan kơdih lu sư Bơngai Lui mă tơpă lu sư ưh kơ lui. Lu sư trŏ kơ “nhơ̆m hmoi” yua kơ lu sư wă jê̆ tơ’bơ̆p tơdrong gleh pơmat, ưh kơ tơdrong gleh pơmat lăm chăl’nâu ôh, mălei tơdrong’Bok Kei-Dei hil mĭl wă jê̆ truh kơ lu sư ‘bơ̆t năr Kră Yang sek tơlang tơpăt ei kơnh.
Yakơ tơbăt khan ‘Bok Kei-Dei wă phak lu bơngai mơdrŏng yua kơ lu sư pơm dôm tơdrong tơ ala âu,mă minh, lu sư pôm hiơ̆k chă mong mŭk tơmam ding mah mŭk tơmam bŭk ôm, gơsang sa, ‘noh wă tơ’bôh jơhngơ̆m lu sư ham dêh păng kret tơsen dêh (tr.2-3), mă ‘bar, lu sư chă mơdrŏng đơ̆ng lu sư hơlĕnh iŏk sa pơgơ̆m jên lu bơngai mă jang kơ lu sư tr.4). Mă pêng, lu sư sŏng sa phĭ mah rơkah rơkai, hiôk kơ lu sư kơdih mă ưh kơ tơchĕng ‘blŏk kơ lu bơngai kơ’bah kơ’bôch tăp dăr kơ lu sư (tr.5), mă puăn, lu bơngai pơm ‘lơ̆ng, lu sư jô̆ khan pơm kơnê̆ na pơlôch lê̆ hloi. Tơpă thoi noh, “Bơngai bu hăt kơ chă jên, sư gô pơm tôm tơdrong kơnê̆”, (ITimôthê 6:10). Lu bơngai mơdrŏng ‘nâu hei lu sư lê̆ jên tơmam jing tơm lăm chăl arih sư, lu sư pơm tôm tơdrong kơnê̆ pôm wă kơ đei jên rai lơ hloh, lu sư hiôk breh hreh hrăp kơ tơdrong kơdih lu sư ‘maih wă đĕch.
Đơ̆ng nơ̆r Yakơ tơbăt ră tơdrong wă truh ‘nâu hei, đei tơ’blŏk kơ bơ̆n tơdrong juăt gah jên tơmam. Bơ̆n kăl kơ khan hơđăl thoi âu: Sơ̆p Hla bơar ‘Bok Kei-Dei ưh kơ bơtho khan mơdrŏng đei ‘bôh noh kơnê̆ ôh. Lu’bok kơdră bơ̆n sơ̆ thoi ‘bok Abraham, Isăk, Jakôp, đe ư-ang kơ lu sư mơdrŏng, đei ‘bôh ngăl. Yua kơ thoi noh bơih, tơdrong sư noh, ưh kơ trŏ kơ jên tơmam noh kơnê̆ ôh, mălei bơngai mă yua jên tơmam noh sư yua liơ, yua thoi yơ ei. Mă minh, mong jên tơmam lăm teh đak âu gô bŭk ôm, lei na adrol hloh, bơ̆n athei mong mŭk tơmam tơ Dêh char tơ plĕnh mă ưh kơ pơchah răm noh; bơ̆n mong tơ noh wă khan bơ̆n pơyơ̆r jên tơmam ăn tơdrong jang Kră Yang, pơyơ̆r hăm jơhngơ̆m hơlăng hơmrah. Mă ‘bar, bơ̆n kăl kơ chă jên tơmam,mălei chă hăm tơdrong jang ‘lơ̆ng trŏ,chă hăm jơhngơ̆m tơpăt ‘lơ̆ng.Mă pêng,mă khan Kră Yang ăn kơ bơ̆n mơdrŏng đei ‘bôh, kư̆m ‘nĕ kơ pơ’mêm pơhuach kư̆-kă, ‘nĕ kơ pơang, pơrŏ, pơhiôk kơdih akâu, mălei athei arih tơmơ̆t bơ̆n hơdai bôl buăl jih ‘ma, hăm pơlei pơla rông ‘bôt. Mă puăn, ‘nĕ kơ yua iŏk tơdrong mơdrŏng đei ‘bôh bơ̆n noh wă pơgŏ pơkep bơngai nai, mălei athei đei jơhngơ̆m ‘brơ̆k mơnat dŏng tơgŭm lu bơngai hoh kơ’bah, arih pơmat tat tŏk bŏk oei kăl kơ bơngai dŏng tơgŭm noh. Lăm tôm tơdrong bơ̆n athei ‘blŏk thoi âu: Đei jên tơmam noh wă kơ bơ̆n yua,na đei kon bơngai noh wă kơ bơ̆n’mêm mơnat.
Bĕ bơ̆n pôm jơhngơ̆m đon krao khan,
Kơkuh kơ Ih Kră Yang,inh oei lăm teh đak anih mă lơ bơngai chơchă dêh tơdrong mơdrŏng, apinh Ih bơtho inh băt mong ‘măn mŭk tơmam tơ Dêh char Ih tơ plĕnh, păng đei jơhngơ̆m hơlăng hơmrah, mơnat kơ lu bơngai pơmat tat tăp dăr kơ inh. Apinh Ih ăn kơ inh băt yua dôm lu tơmam kiơ đơ̆ng Ih ăn noh pơm trong pơih să Dêh char Ih, pơm kơ tơdrong jang Ih wơ̆ tŏk păng tơgŭm lơ bơngai băt kơ năl kơ Ih.Inh krao khan yua anăn Kră Yang Yêsu Krist, Amen.
Ơ lu bơngai mơ̆ng mă ‘mêm kơeng,
Dang ei bơ̆n tŏk bŏk oei yua jên tơmam, oei ‘mêm mơnat kơ bôl buăl dah mă bơ̆n tŏk bŏk oei yua iŏk bơngai, pơgŏ pơkep lu sư, păng hưch ‘mêm dêh kơ jên tơmam?
‘Nĕ kơ ham kơ mŭk tơmam mă ‘bônh kơ hiong tôch
‘Nĕ kơ hăt chă wă kơ đe ư-ang anăn bơ̆n tơ ala teh âu
Dang ei hloi, bơ̆n athei yua jên tơmam
Tơgŭm lu bơngai pơmat, mơnat kơ lu bơngai hoh kơ’bah tăp dăr kơ bơ̆n
Đŏk Sơ̆p Hla bơar’Bok Kei-Dei lăm pêng sơnăm: Philip 3
Kênh Youtube BHKTHN:
