Yakaunpaus 4:17
Nqe cim:
“Yog li ntawd tus uas paub ua qhov zoo, tiamsis nws tsis ua, tus ntawd txhaum.” (Yakaunpaus 4:17)
Lus nug rau sawvdaws xav:
– Ua li cas paub tsis ua yog kev txhaum?
– Qhov kev txhaum no hnyav npaum twg?
– Peb yuav tsum ua dabtsi kom peb niaj hnub ua tau qhov zoo txhua lub sijhawm?
Feem ntau peb pheej xav txog kev txhaum ces yog ua tej uas Vajtswv txwv tsis pub ua. Yog Vajtswv qhia kom tsis txhob hais lus phem, ib leeg hais tsis zoo rau ib leeg tiamsis yog peb pheej ua li ces qhov ntawd yog ua txhaum. Yog Vajtswv qhia kom tsis txhob ua li tej neeg ntiajteb ua tiamsis yog pheej ua ces qhov ntawd yog kev txhaum. Tiamsis hauv Yakaunpaus 4:17, kev txhaum tsis yog tej uas peb ua xwb, nws tseem yog tej uas peb tsis ua, txawm yog twb paub meej tias qhov ntawd yog yam yuav tsum tau ua: “tus uas paub ua qhov zoo, tiamsis nws tsis ua, tus ntawd txhaum.” “Paub ua qhov zoo” yog paub Vajtswv Txojlus qhia txog kev ua zoo. Paub tiamsis tsis ua yog saib tsis taus Vajtswv Txojlus, thiab qhov kev txhaum no tseem hnyav dua cov kev txhaum uas neeg ua, Tswv Yexus hais tias, “tus tubtxib uas paub nws tus tswv lub siab lawm, tiamsis nws tsis ua raws li tus tswv xav kom nws ua. Tus tubtxib ntawd yuav mag nplawm.” (Lukas 12:47). Hauv Mathais 25:41-46, Tswv Yexus rau txim rau cov neeg uas tsis pom, tsis pab cov neeg txomnyem, ua ntsuag, muaj mob, thiab Nws qhia paub lawv tus cwjpwm ua li ntawd yog ua saib tsis taus tus Tswv. Lawv yuav raug txim mus ibtxhis.
Hauv kev ua neej, peb muaj ntau lub sijhawm ua yam zoo. Ua zoo rau tus neeg nug kev, zam txim rau cov neeg uas ua txhaum paub lees txim, muaj nplooj siab ntsia pom cov neeg txomnyem, lossis thov Vajtswv ntsiag to pab cov neeg ib ncig… Rau qhov lub neej ua zoo pub rau txhua tus, yog peb tsis ua ces yog ua txhaum. Hais thaub, tus Tswv tej koob hmoov muaj pub rau cov neeg uas paub ua yam zoo.
Cia kom zoo siab hlo ua tej no, thawj qhov peb yuav tsum qhib siab, kawm Vajtswv Txojlus kom paub Nws lub siab nyiam thiab cia Vaj Ntsujplig coj peb. Txaus siab nqis tes ua haujlwm pab Pawg Ntseeg thiab tej neeg sawvdaws, ua tus neeg muaj lub neej muab pub ntau dua li uas pheej txais xwb… Cheemtsum nco ntsoov tias yog paub Vajtswv lub siab nyiam tsis ua ces yog ua txhaum, thiab kev ntseeg tus Tswv nws tsis yog nyob twjywm txais koob hmoov, tiamsis yog qhia tawm kev ua neej rau luag pom. Tej uas ua los ntawm txojkev ntseeg yog timkhawv qhia paub lub neej tau txais kev cawm dim, ua zoo li Tswv Yexus ua.
Thov Vajtswv,
Tus Tswv, nyuam yaus ua Koj tsaug vim Koj pub sijhawm ntau heev rau nyuam yaus ua haujlwm, qhia tawm kev hlub, thiab Koj txojkev zoo rau tej neeg sawvdaws. Thov Koj pub kom nyuam yaus zeem paub tej sijhawm ua zoo, thiab qhia nyuam yaus paub hlub kom txaus. Thov kom nyuam yaus yog ib qhov timkhawv ntsig txog Koj kev hlub. Nyuam yaus tuav Tswv Yexus lub npe thov, Amees.
Peb zeem paub tej haujlwm zoo uas tus Tswv xav kom peb ua hnub no yog dabtsi? Peb puas txaus siab hlo thiab tas siab ua?
Nyeem Vajluskub hauv peb lub xyoo: Filipis 2
Kênh Youtube BHKTHN:
