Klei Aê Diê Blŭ: Y‑Yakơ 4:17
Êlan kliăng: “Hlei pô thâo ngă jăk ƀiădah amâo ngă ôh, jing soh yơh” (Y‑Yakơ 4:17)
Klei êmuh ksiêm mĭn: Ya ngă thâo ƀiădah amâo ngă ôh jing soh yơh? Si ngă boh kjham klei soh anei? Ya drei srăng ngă čiăng kơ drei kăp mă nanao jih jang mmông găl pioh ngă jăk?
Năng ai drei mĭn kơ klei soh jing ngă klei Aê Diê kăm. Tơdah Aê Diê mtă đăm bi blŭ jhat ôh ƀiădah ăt blŭ jhat anăn jing soh. Tơdah Aê Diê mtă đăm jing mah jiăng hŏng lăn ala ôh ƀiădah ăt hdĭp tui si hnơ̆ng čuăn lăn ala anăn jing soh. Ƀiădah hlăm Y‑Yakơ 4:17, klei soh amâo djŏ knŏng ya klei drei ngă ôh, ƀiădah wăt hŏng klei drei amâo ngă ôh, wăt tơdah drei thâo klă anăn jing klei jăk brei drei ngă “hlei pô thâo ngă jăk ƀiădah amâo ngă ôh, jing soh yơh.” “Thâo ngă jăk” jing thâo Klei Aê Diê Blŭ mtô kơ bruă jăk. Thâo ƀiădah amâo ngă ôh jing mưč kơ Klei Aê Diê Blŭ, leh anăn dưi lač klei soh anei jing ktrŏ hĭn kơ jih jang klei soh anak mnuih čŏng čiăng ngă, msĕ si Khua Yang Yêsu lač, “Dĭng buăl anăn thâo leh klei khua ñu čiăng, ƀiădah amâo mkra leh anăn amâo ngă ôh tui si khua ñu čiăng, srăng tŭ klei čăm ktang” (Y‑Luk 12:47). Hlăm Y‑Mathiơ 25:41-46, Khua Yang Yêsu phat kđi phung amâo thâo uêñ, amâo thâo đru phung ƀun ƀin, phung tue, phung ruă duam, leh anăn Ñu lač klei phung anăn amâo mâo uêñ kơ phung tuôm hŏng klei dleh dlan msĕ snăn jing msĕ si amâo uêñ kơ Ñu mơh. Leh anăn klei knhal tuč kơ phung amâo thâo uêñ anei jing klei bi kmhal hlŏng lar.
Hlăm klei hdĭp, mâo lu mmông găl pioh kơ drei ngă jăk. Ktrâo brei êlan kơ pô êmuh êlan, pap brei kơ pô ngă soh thâo kmhal kơ klei soh, thâo pap kơ phung knap mñai, amâodah đru wah lač brei kơ phung riêng gah hlăm anôk hgăm…Kyuadah mmông găl ngă jăk Aê Diê brei leh kơ grăp čô drei, kyuanăn jing soh yơh tơdah drei amâo ngă ôh. Ƀiădah klei jăk jĭn Aê Diê pioh leh kơ hlei pô thâo ngă jăk.
Čiăng dưi mă mmông găl anăn, êlâo hĭn brei drei pŏk ai tiê, ksiêm êlam kơ Klei Aê Diê Blŭ čiăng thâo săng klei Ñu čiăng leh anăn gưt kơ klei Yang Mngăt Jăk atăt gai. Đru bruă Sang Aê Diê leh anăn bruă ƀuôn sang hŏng klei čŏng čiăng, hdĭp hŏng klei hdĭp brei jing jăk hĭn kơ mă tŭ…Hdơr bĕ, thâo klei Aê Diê čiăng ƀiădah amâo ngă ôh jing soh yơh, leh anăn klei đăo kơ Khua Yang amâo djŏ knŏng dôk kăp mă tŭ klei pap ôh, ƀiădah wăt brei drei pô bi êdah mơh klei đăo ti krah phung amâo đăo ôh. Jih jang bruă ngă mơ̆ng klei đăo yơh jing mnơ̆ng hưn bi sĭt kơ klei hdĭp tuôm bi knal leh klei bi mtlaih, klei hdĭp jing msĕ si Yêsu Krist.
Ih thâo mơ̆ ya jing bruă jăk Khua Yang čiăng ih ngă hruê anei? Si ngă ih srăng ngă mtam leh anăn ngă hŏng jih ai tiê mơ̆?
Wah lač: Ơ Khua Yang, kâo lač jăk kơ Ih kyua mmông găl Ih brei leh kơ klei hdĭp kâo čiăng kâo dưi mă bruă kơ Ih, bi êdah klei khăp, klei sĭt suôr leh anăn klei jăk Ih kơ jih jang mnuih. Đru kâo djăl thâo kral mmông găl ngă jăk, leh anăn ngă hŏng jih ai tiê hŏng klei khăp bŏ ênŭm. Brei klei hdĭp kâo jing mnơ̆ng hưn bi sĭt kơ klei jăk Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Philip 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
