Tơdrong Pơđơ̆k 24:13-14
Kơkuh kơ đĭ-đăng bơngai mă mơ̆ng,
Năr ‘nâu bơ̆n gô pơwao hơdai ‘bai pơhrăm đei kơ̆l ‘bai: Tơdrong Hơgei ‘Ngam ‘Lơ̆ng Dêh lăng đơ̆ng Hla bơar Tơdrong Pơđơ̆k 24:13-14.
13 Ơ dăm, sa bĕ đak sut, yua kơ sư ‘ngam ‘lơ̆ng. Kơ̆l sal sut jing ‘ngam kơ hơlŏng ih. 14 Ih athei băt tơdrong hơgei kư̆m đei ‘ngam lăm bơhngol ih thoi noh; Dah ih chă tơdrong hơgei đei boih, ih gô đei tơdrong hiôk chơt đơ̆ng âu tơ anăp. Păng tơdrong ih chang hơmĕng ưh kơ tôch ôh.
Trong tơm ‘bai pơhrăm ‘nâu:
“Hli yom kơ Kră Yang jơ̆ ‘lơ̆ng rơgoh, oei oei truh tơ ning-mônh, Dôm tơdrong Kră Yang pơkă jơ̆ sĭt tơpă, đĭ-đăng trŏ ngăl. Dôm tơdrong noh gĭt hloh kơ maih, gĭt hloh kơ ling maih; Kŭm ‘ngam hloh kơ đak sut đơ̆ng hơkoh sư.” (Hơriso 19:9-10)
Nơ̆r jet tơchĕng pơwao:
– Pơtao Salômôn pơting tơdrong hơgei hăm đak sut thoi yơ?
– Tơdrong hơgei ba ăn tơdrong đei yua kiơ?
– Pơm thoi yơ wă kơ gơh đei tơdrong hơgei?
Kơkuh kơ đĭ-đăng,
Pơtao Salômôn hlôi pơting bơih tơdrong ‘ngam ‘lơ̆ng đak sut hăm tơdrong ‘ngam ‘lơ̆ng đơ̆ng tơdrong hơgei ba ăn. Sư athei kon sư mă ‘mêm kơeng “Ơ dăm, sa bĕ đak sut yua kơ sư ‘ngam ‘lơ̆ng” (tr.13). Đak sut noh, lu bơngai oei tơ dêh char gah Hơlĕch juăt kơ sa, juăt kơ yua dêh yua kơ sa đak sut noh ưh kơ pôm ba ăn ‘ngam ‘lơ̆ng, tơgŭm akâu bek ‘lơ̆ng đĕch ôh, sư kư̆m gơh hơmet pơklaih tơdrong jĭ jăn hai dơ̆ng.Đak sut pơm ăn akâu jăn bơ̆n ‘lơ̆ng thoi yơ noh,tơdrong hơgei kư̆m tơgŭm ăn ‘lơ̆ng, ăn đei yua, ba ăn ‘ngam ‘lơ̆ng kơ bơhngol bơ̆n thoi noh mơ̆n. Nơ̆r lăm trong 14 “Ih athei băt tơdrong hơgei kư̆m đei’ngam lăm bơhngol ih thoi noh” wă khan ih athei mơ̆ng, iŏk tơdrong hơgei,mơn đei tơdrong hơgei lăm jơhngơ̆m. Bơngai bu đĭ jơhngơ̆m chơchă, păng iŏk hloi tơdrong hơgei tơmơ̆t lăm jơhngơ̆m bơhngol sư, tơpă bơngai noh gô đei tơdrong apah păng dôm tơdrong sư jang pơm kư̆m gô keh jing. Bơngai mă apinh chơchă tơdrong hơgei, bơngai noh sư gô hlôh băt, păng đei yua ăn kơ sư pŭn hiôk sot đunh ling-lang ling-lang.Kư̆m wă khan bơngai mă pơm trŏ thoi tơdrong sư băt kơnăl kơ tơdrong hơgei păng sư chă đei tơdrong hơgei noh bơih trong ‘lơ̆ng ngơngei wă kơ gơh đei truh tơ tơdrong hiôk chơt tơpă păng hiôk hreh đơ̆ng dôm tơdrong hơpơi wă. “Tơdrong hơgei kư̆m đei lăm bơhngol” Tơdrong ‘nâu lăm Kră Yang đĕch bơ̆n gơh đei yua kơ Kră Yang Sư tu tơm tơdrong hơgei, yua kơ “Hli yom kơ Kră Yang jing tơm tơdrong hơgei” (Pơđơ̆k 1:7). Bơ̆n kon pơlei Kră Yang gô chă păng iŏk đei tơdrong hơgei ) bơ̆n đĭ jơhngơ̆m hli yom kơ Kră Yang,chu pơm kiơ̆ dôm nơ̆r Sư bơtho khan wơh athei. Nơ̆r Kră Yang ling-lang kơ sĭt tơpă,’lơ̆ng tơpăt,gĭt hloh kơ hu maih, ‘ngam hloh,’lơ̆ng hloh kơ đak sut đơ̆ng hơkoh sư (Hơri 19:10). Dang ei ‘Bok Kei-Dei ăn kơ bơ̆n Sơ̆p Hla bơar Sư, noh Nơ̆r Sư, noh thoi hla kak tơhlâu tơ’bôh kơ bơ̆n trong yak năm lăm chăl arih,ba ăn bơhngol bơ̆n tơdrong hơgei. Mưh bơ̆n băt kơnăl kơ Nơ̆r ‘Bok Kei-Dei ‘ngam ‘lơ̆ng lei bơ̆n athei chơgăm pơnam kơ tơchĕng pơwao, hŏk pơhrăm Nơ̆r Kră Yang kơdih bơ̆n gơnang kơ Yang Bơhngol chông anhăk, bơtho tơ’bôh ăn kơ bơ̆n (Jôsuê 1:8). Hnam akŭm Khul lui athei ling-lang pơih ăn lu bơngai lui tơdrong hŏk pơhrăm Nơ̆r’BokKei-Dei,na lu bơngai lui athei hưch hanh kơdih kơdih ‘maih pơhrăm Nơ̆r ‘Bok Kei-Dei, pơnam kơ akŭm kơkuh kơ Kră Yang, mơ̆ng đe bơtho Nơ̆r Kră Yang ‘bơ̆t jơ akŭm kơkuh, hŏk pơhrăm trưng năr tơpơh, hŏk pơhrăm Nơ̆r Kră Yang lăm khul tŏ sĕt bơngai…Apinh Kră Yang ăn kơ bơ̆n đei jơhngơ̆m rơhing ‘maih wă dêh tơdrong hơgei, wă kơ đĭ jơhngơ̆m chơchă tơdrong hơgei kiơ̆ kơ Nơ̆r Kră Yang bơtho, rim năr wơ̆ ‘lŏ lăm tơdrong hlôh băt Nơ̆r Kră Yang jrŭ hlom păng tơgŭm dih băl wei kơjăp đon lui lăm Kră Yang. Bơngai hơgei hŏk pơhrăm Nơ̆r Kră Yang, pơm kiơ̆ Nơ̆r Kră Yang ưh kơ pôm đei tơdrong hiôk hreh, hiôk hian tơ teh đak âu đĕch ôh mălei đei tơdrong arih tơ pơlei ‘lơ̆ng, arih ling-lang ưh kơ đei la-yơ tôch thoi Nơ̆r Kră Yang đei pơkă bơih.
Bĕ bơ̆n pôm jơhngơ̆m đon lăm tơdrong krao khan,
Kơkuh kơ Ih Kră Yang, inh bơnê kơ Ih ăn kơ inh đei bơih ‘ngam ‘lơ̆ng đơ̆ng Nơ̆r Ih. Apinh ăn kơ inh đei đon lui, huay kơ bơ̆l hăl lăm tơdrong tơchĕng pơwao hŏk pơhrăm Nơ̆r Ih, lui kơjăp, đĭ jơhngơ̆m hli yom kơ Ih, chu pơm kiơ̆ kơ Ih bơtho khan wơh athei đĭ chăl arih inh.Inh krao khan yua anăn Kră Yang Yêsu Krist, Amen!
Ơ đĭ-đăng bơngai mơ̆ng mă ‘mêm kơeng,
Bơ̆n hăm tam đĭ jơhngơ̆m chơchă krao apinh tơdrong hơgei păng hăm mơn ‘ngam ‘lơ̆ng đơ̆ng Kră Yang ăn?
Kră Yang ăn asong ăn tơdrong hơgei
Jơhngơ̆m hiôk hreh, hiôk hian rim năr
Hơgei lăm Kră Yang gĭt dêh
Hu maih, đak sut ‘ngam ưh kơ gơh pơtŏ pơting
Đŏk sơ̆p Hla Bơar ‘Bok Kei-Dei lăm pêng sơnăm: Phi-lip 1
Kênh Youtube BHKTHN:
