Rôm 16:1-2
Kơkuh kơ đĭ đăng bơngai mă mơ̆ng,
Năr ‘nâu lu bơ̆n gô tơchĕng pơwao ‘bai pơhrăm đei kơ̆l ‘bai: Tơbăt Kơ Bơngai Lui Kră Hnam Yang Anăn Sư Yă Phêbê kiơ̆ kơ Sơ̆p Hla bơar ‘Bok Kei-Dei Rôm 16:1-2.
1-2 Âu duch nă bơ̆n yă Phêbê wă năm ngôi hơpong tơ iĕm. Sư bơngai jang lăm hnam ‘Bok Kei-Dei tơ Pơlei Sankrê. Sư bơngai ‘lơ̆ng, na inh apinh iĕm sơng iŏk sư mă trŏ ‘biơ̆ hŏ, yua kơ sư kư̆m hơdai bơngai lui kơ Kră Yang Yêsu Krist thoi bơ̆n. Păng inh wă kơ iĕm tơgŭm sư tôm tơmam sư kăl yua, yua kơ sư bơngai tơgŭm đe dêh sơ̆, truh tơ inh sư kư̆m tơgŭm mơ̆n.
Trong tơm ‘bai pơhrăm ‘nâu:
“apinh iĕm sơng iŏk sư mă trŏ ‘biơ̆ hŏ, yua kơ sư kư̆m hơdai bơngai lui kơ Kră Yang Yêsu Krist thoi bơ̆n. Păng inh wă kơ iĕm tơgŭm sư tôm tơmam sư kăl yua, yua kơ sư bơngai tơgŭm đe dêh sơ̆, truh tơ inh sư kư̆m tơgŭm mơ̆n.” (Rôm 16:2a)
Nơ̆r jet tơchĕng pơwao:
– ‘Bok Pôl roi tơbăt tơdrong kiơ gah yă Phêbê?
– “Sơng iŏk sư lăm Kră Yang bơ̆n” wă khan kiơ?
– Ih tơ’bôh tơdrong ih tơchĕng ‘blŏk tơgŭm dih băl lăm Kră Yang thoi yơ?
Kơkuh kơ đĭ-đăng,
‘Bok Pôl roi tơbăt khan yă Phêbê ‘nâu mai oh,duch nă sư lăm Kră Yang, kư̆m mai oh,duch nă lu bơngai lui tơ pơlei Rôm mơ̆n. Yă ei tŏk-bŏk oei awih awăn kơ Kră Yang lăm tơdrong jang kră hnam yang tơ pơlei Sankrê, pơlei ‘noh oei ‘bơ̆t ter đak dơsĭ anih mă đe ‘măn thŏng nan chơ tơmam mơdro mơchan;pơlei Sankrê ‘nâu hơlĕch kơ pơlei Kôrintô, đơ̆ng pơlei Sankrê năm tơ tŏk-bŏk pơlei tih Kôrintô ataih sư dang mơjĭt kâysô̆. Yă Phêbê âu ‘Bok Pôl kơnăl kơ sư bơngai lui,đei jơhngơ̆m hơlăng hơmrah tơgŭm lơ bơngai tơ pơlei Kôrintô, sư kư̆m tơgŭm ‘Bok Pôl lăm tơdrong jang ră roi Tơdrong’Nao ‘Lơ̆ng. “Bơngai lui” wă khan “bơngai ‘lơ̆ng rơgoh”, bơngai mă lui sơng iŏk Kră Yang Yêsu tơpă. Bơngai lui đe krao bơngai ‘lơ̆ng rơgoh ưh kơ trŏ đơ̆ng sư pơm ‘lơ̆ng kơdih ôh, mălei đơ̆ng sư lui gơnang kơ Kră Yang Yêsu, Tơ’ngla pơm ăn kơ sư jing‘lơ̆ng rơgoh. Đơ̆ng nơ̆r’Bok Pôl roi tơbăt noh bơ̆n băt kơ yă Phê’bê đei dôm tơdrong ‘lơ̆ng lăm jơhngơ̆m sư pơm kơ kon pơlei Kră Yang ‘mêm, gĭt păng lui ngeh kơ sư âu bơngai lui yom kơ Kră Yang, gơh pơma dơnuh sơng bôl buăl, pơnam kơ jang, ling-lang jang keh tơdrong jang đei pơjao. Tơ pơlei Kôrintô, yă âu hlôi tơgŭm lơ bơngai, tơgŭm ‘bok Pôl hai, ‘noh tơ’bôh sư bơngai đei jên tơmam ‘biơ̆ mơ̆n,mălei lăp sư năm tơ pơlei Rôm, hăm jơhngơ̆m iŏk đon ala, yă Phêbê lăp đon iŏk tơmam đơ̆ng lu bơngai lui pơlei Rôm ăn kơ sư kiơ̆ thoi ‘Bok Pôl đei roi tơbăt păng athei noh. Tơdrong đei tơpă ‘nâu tơ’bôh ăn kơ bơ̆n tơdrong jang bơngai drŏ-kăn lăm jơhnơr bơngai lui blŭng a sơ̆ kăl tơpă.Lu sư bơngai ‘mêm kơ Kră Yang, hơgei, gơh jang, pơnam, hưch hanh lăm tơdrong awih awăn kơ Kră Yang.’Bok Pôl, lăm tơdrong jang pơgơ̆r tơdrong arih gah bơhngol, sư dang roh ăn gơng tơ’bưh yă Phêbê hăm lu bơngai lui ‘bơ̆t sư roi tơbăt ăn kơ lu bơngai lui tơ pơlei Rôm băt tơdrong arih yă Phê’bê păng athei lu sư sơng iŏk yă ei noh. ’Bok Pôl hlôi tơ’bôh jơhngơ̆m sư tơchĕng ‘blŏk kơ bơngai jang hơdai sư ‘bơ̆t sư athei ‘nhŏng oh bơngai lui tơ pơlei Rôm sơng iŏk yă ei lăm Kră Yang mă ‘lơ̆ng mă trŏ noh.Kơplah lu bơngai lui kơnăl kơ yă Phê’bê sư minh ‘nu bơngai lăm hnam dơnŏ tih Kră Yang, lu sư ‘bôh rup Kră Yang đơ̆ng tơdrong arih yă ei jang pơm noh ‘mơ̆i na lu sư gơh sơng iŏk yă ei trŏ thoi minh ‘nu bơngai ‘lơ̆ng tơpăt, wă khan tơ’bôh tơdrong lu sư tơchĕng ‘blŏk,’bôh băt tơdrong yă ei kăl wă na lăp đon dŏng tơgŭm hloi yă ei.
Rim ‘nu Bơngai Lui bơ̆n dang ei kăl kơ rok kơmĭl yă Phêbê, jơhngơ̆m hưch hanh jang kơ Kră Yang, ling-lang tơchĕng ‘blŏk kơ ‘nhŏng oh bơ̆n lăm tơdrong lui, ’bôh băt tơdrong lu sư kăl wă na lăp đon dŏng tơgŭm. Tơdrong bơ̆n dŏng tơgŭm buăl bơ̆n noh phŏ kơnh bơ̆n ‘măn jơ mơ̆ng ‘nhŏng oh, mai oh bơ̆n pơma dơnuh roi tơdrong arih sư thoi yơ noh,bơ̆n krao khan tơgŭm, bơ̆n yua nơ̆r ‘Bok Kei-Dei pơlung tơiung lu sư, phŏ kơnh lu sư đei tơdrong truh anat kăl kơ pơdŏng, mưh bơ̆n oei đăi jên mĭnh ‘bar hlak, oei đei đăi tơmam kiơ mă khan kơbĭ dôm yơ ră, chă yôk yak chro ăn, tơgŭm asong lu bơngai noh mơ̆n.
Mưh bơ̆n tơgŭm lu ‘nhŏng oh bơ̆n lăm Kră Yang, Kră Yang ‘bôh, Sư chih răk jô̆ bơ̆n tơgŭm Sư, jô̆ bơ̆n jang, pơm ăn kơ Sư (Mathiơ 25:31-40).
Bĕ bơ̆n pôm jơhngơ̆m đon krao khan,
Kơkuh kơ Ih Kră Yang, inh bơnê kơ Ih hlôi dŏng pơklaih huai iŏk inh, ăn kơ inh jing minh chăl lăm akâu Ih, Apinh Ih ăn kơ inh hưch hanh,’bônh kơ ‘bôh tơdrong Ih wă,păng yua iŏk dôm lu jơ trŏ ’blep wă awih awăn kơ Ih, lăp đon sơng iŏk,dŏng tơgŭm lu ‘nhŏng oh inh pôm tơdrong lui, jang keh tơdrong jang Ih pơjao ăn. Inh krao khan yua anăn Kră Yang Yêsu Krist, Amen.
Ơ đĭ-đăng bơngai mơ̆ng mă ‘mêm kơeng,
Bơ̆n hăm lăp đon dŏng tơgŭm dih băl thoi yă Phê’bê ưh?’
‘Nhŏng oh lăm Kră Yang, minh pôm akâu
Iŏk đon ala, sơng iŏk, dŏng tơgŭm dih băl
Tơchĕng ‘blŏk, băt ‘bôh tơdrong ‘nhŏng oh kăl wă
‘Mêm mơnat, tơgŭm tơiung, pơlung pơdrŭt đơ̆ng dang ei truh ning mônh
Đŏk Sơ̆p Hla bơar ‘BokKei-Dei lăm pêng sơnăm: Êphêsô 6
Kênh Youtube BHKTHN:
